በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጠበቂያ ግንብ  |  ቁጥር 2 2016

 የሽፋኑ ርዕሰ ጉዳይ | ኢየሱስ የተሠቃየውና የሞተው ለምንድን ነው?

ታሪኩ እውነት ነው?

ታሪኩ እውነት ነው?

በ33 ዓ.ም. በጸደይ ወቅት የናዝሬቱ ኢየሱስ ተገደለ። ኢየሱስ፣ ሕዝብን ለዓመፅ አነሳስቷል የሚል የሐሰት ክስ የተሰነዘረበት ሲሆን በጭካኔ ከተገረፈ በኋላ በእንጨት ላይ ተቸነከረ። የሞተውም እጅግ ተሠቃይቶ ነው። ይሁን እንጂ አምላክ ከሞት አስነሳው፤ ከ40 ቀን በኋላም ወደ ሰማይ አረገ።

ይህ አስገራሚ ዘገባ ተመዝግቦ የሚገኘው፣ በክርስቲያን ግሪክኛ ቅዱሳን መጻሕፍት (በተለምዶ አዲስ ኪዳን ይባላሉ) ውስጥ ባሉት አራት ወንጌሎች ላይ ነው። ሆኖም ይህ ዘገባ እውነት ነው? ይህ አግባብነት ያለውና በቁም ነገር ሊታሰብበት የሚገባ ጥያቄ ነው። ምክንያቱም ዘገባው እውነት ካልሆነ የክርስትና እምነት ዋጋ ቢስ ይሆናል፤ በገነት ውስጥ የዘላለም ሕይወት የማግኘት ተስፋም እንዲሁ ምኞት ብቻ ሆኖ ይቀራል። (1 ቆሮንቶስ 15:14) በሌላ በኩል ደግሞ ዘገባው እውነት ከሆነ አንተን ጨምሮ መላው የሰው ዘር ብሩህ ተስፋ አለው ማለት ነው። ታዲያ የወንጌል ዘገባዎች እውነት ናቸው ወይስ ልብ ወለድ?

ማስረጃዎቹ ምን ያሳያሉ?

በምናብ ከተፈጠሩ አፈ ታሪኮች በተለየ መልኩ የወንጌል ጸሐፊዎች፣ ትክክለኛ ዘገባ ለማስፈር ከፍተኛ ጥረት እንዳደረጉና ለእያንዳንዱ ዝርዝር ጉዳይ ትኩረት እንደሰጡ ከዘገባው ማየት ይቻላል። ለምሳሌ ያህል፣ በዘገባዎቹ ላይ የብዙ ቦታዎች ስም የተጠቀሰ ሲሆን ከእነዚህ አብዛኞቹን አሁንም ሄዶ መጎብኘት ይቻላል። በዘገባዎቹ ላይ የተጠቀሱት ሰዎች በገሃዱ ዓለም ላይ የነበሩ ናቸው፤ ይህንንም የዓለም ታሪክ ምሁራን አረጋግጠዋል።—ሉቃስ 3:1, 2, 23

 በመጀመሪያውና በሁለተኛው መቶ ዘመን የኖሩ የዓለም ታሪክ ጸሐፊዎች ኢየሱስን በጽሑፎቻቸው ላይ ጠቅሰውታል። * የተገደለበትን መንገድ በተመለከተ በወንጌል ዘገባዎች ላይ የሰፈረው ሐሳብ፣ በዘመኑ ሮማውያን የሞት ቅጣት ከሚፈጽሙበት መንገድ ጋር ይስማማል። በተጨማሪም ዘገባዎቹ በማስረጃ የተደገፉና ሐቀኝነት የሚንጸባረቅባቸው ናቸው፤ እንዲያውም ከኢየሱስ ደቀ መዛሙርት የአንዳንዶቹ ድክመት እንኳ በወንጌሎች ላይ ተካቷል። (ማቴዎስ 26:56፤ ሉቃስ 22:24-26፤ ዮሐንስ 18:10, 11) እነዚህ ሁሉ ማስረጃዎች፣ የወንጌል ጸሐፊዎች ስለ ኢየሱስ ያሰፈሩት ዘገባ እውነተኛና ትክክለኛ እንደሆነ በሚገባ ያሳያሉ።

ስለ ኢየሱስ ትንሣኤ ምን ማለት ይቻላል?

ኢየሱስ በአንድ ወቅት የነበረ ሰው መሆኑና መሞቱ በብዙዎች ዘንድ ተቀባይነት ቢያገኝም ከሞት መነሳቱን ግን የሚጠራጠሩ ሰዎች አሉ። የኢየሱስ ሐዋርያትም እንኳ ጌታቸው ትንሣኤ እንዳገኘ መጀመሪያ ሲነገራቸው አላመኑም ነበር። (ሉቃስ 24:11) ይሁን እንጂ እነዚህም ሆኑ ሌሎች ደቀ መዛሙርቱ፣ ትንሣኤ ያገኘውን ኢየሱስን በተለያዩ ወቅቶች ካዩት በኋላ የነበራቸው ጥርጣሬ በሙሉ ተወገደ። እንዲያውም ኢየሱስ ትንሣኤ ካገኘ በኋላ ከ500 ለሚበልጡ የዓይን ምሥክሮች የተገለጠበት ጊዜ አለ።—1 ቆሮንቶስ 15:6

ደቀ መዛሙርቱ ሊታሰሩና ሊገደሉ እንደሚችሉ እያወቁ፣ ኢየሱስ ከሞት መነሳቱን ለሁሉም ሰው ሌላው ቀርቶ እሱን ላስገደሉት ሰዎች እንኳ በድፍረት አውጀዋል። (የሐዋርያት ሥራ 4:1-3, 10, 19, 20፤ 5:27-32) እነዚያ ሁሉ ደቀ መዛሙርት፣ ኢየሱስ ከሞት እንደተነሳ ፍጹም እርግጠኞች ባይሆኑ ኖሮ የዚህን ያህል በልበ ሙሉነት ይናገሩ ነበር? እንዲያውም ክርስትና በዚያ ዘመንም ሆነ ዛሬ ባለው ዓለም ላይ ይህን ያህል ተጽዕኖ እንዲያሳድር ያደረገው ኢየሱስ ትንሣኤ ማግኘቱ ነው።

ስለ ኢየሱስ ሞትና ትንሣኤ የሚገልጹት የወንጌል ዘገባዎች፣ ተአማኒ ታሪካዊ መዛግብት መሆናቸውን ለማረጋገጥ የሚያስፈልጉትን መሥፈርቶች በሙሉ አሟልተዋል። ዘገባዎቹን በትኩረት ማንበብህ ታሪኩ እውነት መሆኑን እንድታምን ያደርግሃል። ኢየሱስ የሞተውና የተነሳው ለምን እንደሆነ ስትገነዘብ ደግሞ እምነትህ ይበልጥ ይጠናከራል። የሚቀጥለው ርዕስ ይህን ጉዳይ ያብራራል።

^ አን.7 በ55 ዓ.ም. ገደማ የተወለደው ታሲተስ እንዲህ ሲል ጽፏል፦ “[ክርስቲያኖች] ለሚለው ስም መገኛ የሆነው ክርስቱስ [ክርስቶስ] በጢባርዮስ የንግሥና ዘመን ከአስተዳዳሪዎቻችን አንዱ በነበረው በጳንጥዮስ ጲላጦስ እጅ ከፍተኛ የሆነ ቅጣት ተቀብሏል።” በተጨማሪም ስዊቶኒየስ (አንደኛው መቶ ዘመን)፣ አይሁዳዊው የታሪክ ምሁር ጆሴፈስ (አንደኛው መቶ ዘመን) እንዲሁም የቢቲኒያ አገረ ገዢ የነበረው ትንሹ ፕሊኒ (ሁለተኛው መቶ ዘመን መጀመሪያ) ኢየሱስን ጠቅሰውታል።