በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

2 ጴጥሮስ 1:1-21

1  የኢየሱስ ክርስቶስ ባሪያና ሐዋርያ ከሆነው ከስምዖን ጴጥሮስ፣ በአምላካችን ጽድቅ እንዲሁም በአዳኛችን በኢየሱስ ክርስቶስ ጽድቅ አማካኝነት እኛ ያገኘነውን ዓይነት መብት የሚያስገኝ እምነት ለተቀበሉ:-  ስለ አምላክና ስለ ጌታችን ኢየሱስ በምትቀስሙት ትክክለኛ እውቀት ጸጋና ሰላም ይብዛላችሁ።  መለኮታዊ ኃይሉ፣ በክብርና በበጎነት ስለጠራን አምላክ ባገኘነው ትክክለኛ እውቀት አማካኝነት ለአምላክ ያደርን ለመሆንና ለሕይወት የሚያስፈልገንን ነገር ሁሉ በነፃ ሰጥቶናል።  በእነዚህ ነገሮች አማካኝነት ክቡርና እጅግ ታላቅ የሆነ ተስፋ በነፃ ሰጥቶናል፤ ይህን ያደረገውም ኃይለኛ ከሆነ የሥጋ ምኞት የተነሳ በዓለም ካለው የሥነ ምግባር ብልሹነት አምልጣችሁ፣ በዚህ ተስፋ አማካኝነት ከመለኮታዊ ባሕርይ ተካፋዮች እንድትሆኑ ነው።  ከዚህም የተነሳ በምላሹ ልባዊ ጥረት በማድረግ በእምነታችሁ ላይ በጎነትን ጨምሩ፤ በበጎነት ላይ እውቀትን፣  በእውቀት ላይ ራስን መግዛትን፣ ራስን በመግዛት ላይ ጽናትን፣ በጽናት ላይ ለአምላክ ማደርን፣  ለአምላክ በማደር ላይ ወንድማዊ መዋደድን፣ በወንድማዊ መዋደድ ላይ ፍቅርን ጨምሩ።  እነዚህ ነገሮች በውስጣችሁ ቢኖሩና ቢትረፈረፉ፣ ስለ ጌታችን ኢየሱስ ክርስቶስ ያላችሁን ትክክለኛ እውቀት ተግባራዊ በማድረግ ረገድ ሥራ ፈቶችና ፍሬ ቢሶች እንዳትሆኑ ይጠብቋችኋል።  ማንኛውም ሰው እነዚህ ነገሮች በውስጡ የማይገኙ ከሆነ ብርሃን ላለማየት ዓይኑን የጨፈነ ዕውር ሰው ነው፤ ደግሞም ከቀድሞ ኃጢአቱ መንጻቱን ረስቷል። 10  በመሆኑም ወንድሞች፣ መጠራታችሁንና መመረጣችሁን አስተማማኝ ለማድረግ ከበፊቱ ይበልጥ የተቻላችሁን ሁሉ ጥረት አድርጉ። እነዚህን ነገሮች የምታደርጉ ከሆነ ፈጽሞ አትወድቁም። 11  እንዲያውም ወደ ጌታችንና አዳኛችን ኢየሱስ ክርስቶስ ዘላለማዊ መንግሥት የሚያስገባው በር በሰፊው ይከፈትላችኋል። 12  ስለዚህ ምንም እንኳ እነዚህን ነገሮች የምታውቁና በውስጣችሁ በሚገኘው እውነት ጸንታችሁ የቆማችሁ ብትሆኑም፣ ስለ እነዚህ ነገሮች ሁልጊዜ እናንተን ከማሳሰብ ወደኋላ አልልም። 13  በዚህ ድንኳን* እስካለሁ ድረስ እናንተን በማሳሰብ ማነቃቃት ተገቢ ይመስለኛል፤ 14  ምክንያቱም ጌታችን ኢየሱስ ክርስቶስ እንደገለጠልኝ ይህን ድንኳን ትቼ የምሄድበት ጊዜ እንደቀረበ አውቃለሁ። 15  ስለዚህ እኔ ከሄድኩ በኋላ እነዚህን ነገሮች ሁልጊዜ ማስታወስ እንድትችሉ አቅሜ የፈቀደውን ሁሉ አደርጋለሁ። 16  የጌታችን የኢየሱስ ክርስቶስን ኃይልና መገኘት* ያሳወቅናችሁ በብልሃት የተፈጠረውን ተረት ተከትለን ሳይሆን ግርማውን በገዛ ዓይናችን አይተን ነው። 17  ከግርማዊው ክብር “እኔ ራሴ በጣም የምደሰትበት፣ የምወደው ልጄ ይህ ነው” የሚል ቃል ስለ እሱ በተነገረ ጊዜ ከአባታችንና ከአምላካችን ክብርና ሞገስ ተቀብሏል። 18  ከእሱ ጋር በቅዱሱ ተራራ በነበርንበት ጊዜ ይህ ቃል ከሰማይ ሲነገር ሰምተናል። 19  በመሆኑም ትንቢታዊው ቃል ይበልጥ ተረጋግጦልናል፤ ጎህ እስኪቀድና የንጋት ኮከብ በልባችሁ እስኪበራ ድረስ በጨለማ ቦታ ለሚበራ መብራት የምትጠነቀቁትን ያህል ለትንቢታዊው ቃል ትኩረት እየሰጣችሁ መሆኑ መልካም ነው። 20  በመጀመሪያ ደረጃ፣ በቅዱሳን መጻሕፍት ውስጥ ያለው ትንቢት ሁሉ ሰው ከራሱ ሐሳብ ያፈለቀው እንዳልሆነ ታውቃላችሁ። 21  ምክንያቱም መቼም ቢሆን ትንቢት በሰው ፈቃድ አልመጣም፤ ከዚህ ይልቅ ሰዎች ከአምላክ የተቀበሉትን ትንቢት በመንፈስ ቅዱስ ተመርተው ተናገሩ።

የግርጌ ማስታወሻዎች

2ጴጥ 1:13 * ሥጋዊ አካልን ያመለክታል።
2ጴጥ 1:16 * ከተጨማሪው መረጃ ላይ 5ኛውን ርዕስ ተመልከት።