በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

2 ጢሞቴዎስ 1:1-18

1  ከክርስቶስ ኢየሱስ ጋር አንድነት በመፍጠር የሚገኘውን ሕይወት በተመለከተ ከተገባው ቃል ጋር በሚስማማ ሁኔታ በአምላክ ፈቃድ የክርስቶስ ኢየሱስ ሐዋርያ ከሆነው ከጳውሎስ፣  ለተወዳጁ ልጄ ለጢሞቴዎስ:- አባት ከሆነው አምላክና ከጌታችን ክርስቶስ ኢየሱስ ጸጋ፣ ምሕረትና ሰላም ለአንተ ይሁን።  ሌሊትና ቀን አንተን ዘወትር በምልጃዬ ሳስታውስ የቀድሞ አባቶቼ እንዳደረጉት ቅዱስ አገልግሎት የማቀርብለትንና በንጹሕ ሕሊና የማገለግለውን አምላክ አመሰግናለሁ፤  እንባህን ሳስታውስ በደስታ እሞላ ዘንድ ላይህ እናፍቃለሁ።  ምክንያቱም በአንተ ውስጥ ያለውን ምንም ግብዝነት የሌለበት እምነት አስታውሳለሁ፤ ይህ እምነት በመጀመሪያ በአያትህ በሎይድ እንዲሁም በእናትህ በኤውንቄ ውስጥ የነበረ ነው፤ ይሁንና በአንተ ውስጥም እንዳለ እርግጠኛ ነኝ።  ስለዚህ በአንተ ላይ እጄን በጫንኩበት ጊዜ የተቀበልከውን የአምላክ ስጦታ እንደ እሳት እንድታቀጣጥል አሳስብሃለሁ።  ምክንያቱም አምላክ የኃይል፣ የፍቅርና የጤናማ አእምሮ መንፈስ እንጂ የፍርሃት መንፈስ አልሰጠንም።  ስለሆነም ስለ ጌታችን ለመመሥከርም ሆነ ለእሱ ስል እስረኛ በሆንኩት በእኔ አትፈር፤ ከዚህ ይልቅ በአምላክ ኃይል በመታመን አንተም ለምሥራቹ የበኩልህን መከራ ተቀበል።  እሱ በእኛ ሥራ የተነሳ ሳይሆን በራሱ ዓላማና ጸጋ የተነሳ አዳነን፤ እንዲሁም ቅዱስ በሆነ ጥሪ ጠራን። ይህ ጸጋ ከክርስቶስ ኢየሱስ ጋር በተያያዘ ከረጅም ዘመናት በፊት ተሰጠን፤ 10  አሁን ግን ይህ ጸጋ ሞትን አስወግዶ በምሥራቹ አማካኝነት በሕይወትና ባለመበስበስ ላይ ብርሃን በፈነጠቀው በአዳኛችን በክርስቶስ ኢየሱስ መገለጥ አማካኝነት ግልጽ ሆኖ ታይቷል፤ 11  እኔም ለዚህ ምሥራች ሰባኪ፣ ሐዋርያና አስተማሪ ሆኜ ተሹሜያለሁ። 12  ይህን መከራ እየተቀበልኩ ያለሁትም ለዚሁ ነው፤ ሆኖም አላፍርበትም። ምክንያቱም ያመንኩበትን እሱን አውቀዋለሁ፤ በአደራ የሰጠሁትንም እስከዚያ ቀን ድረስ ጠብቆ ማቆየት እንደሚችል እተማመናለሁ። 13  ከእኔ የሰማሃቸውን ጤናማ ቃላት ንድፍ ከክርስቶስ ኢየሱስ ጋር ዝምድና ካለው እምነትና ፍቅር ጋር ምንጊዜም አጥብቀህ ያዝ። 14  ይህን መልካም አደራ በእኛ ውስጥ በሚኖረው መንፈስ ቅዱስ አማካኝነት ጠብቅ። 15  በእስያ አውራጃ ያሉት ሁሉ ትተውኝ እንደሄዱ ታውቃለህ። ከእነሱም መካከል ፊጌሎስና ሄርሞጌኔስ ይገኙበታል። 16  ጌታ ለኦኔሲፎሮስ ቤተሰብ ምሕረትን ይስጥ፤ ምክንያቱም እሱ በተደጋጋሚ ጊዜያት መንፈሴን አድሶልኛል፤ በታሰርኩበት ሰንሰለትም አላፈረም። 17  እንዲያውም ወደ ሮም በመጣ ጊዜ ፈልጎ አፈላልጎ አገኘኝ። 18  ጌታ ይሖዋ በዚያ ቀን ምሕረቱን ይስጠው። ደግሞም በኤፌሶን ያከናወነውን አገልግሎት ሁሉ በሚገባ ታውቃለህ።

የግርጌ ማስታወሻዎች