በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

2 ተሰሎንቄ 3:1-18

3  በመጨረሻም ወንድሞች፣ በእናንተ ዘንድ እንደሆነው ሁሉ የይሖዋ ቃል በፍጥነት መስፋፋቱን እንዲቀጥልና እንዲከበር ስለ እኛ መጸለያችሁን አታቋርጡ፤  ደግሞም እምነት ሁሉም ሰው የሚኖረው ነገር ስላልሆነ ከመጥፎና ከክፉ ሰዎች እንድንድን ጸልዩልን።  ይሁንና ጌታ ታማኝ ነው፤ እሱ ያጸናችኋል፤ እንዲሁም ከክፉው ይጠብቃችኋል።  ከዚህም በላይ እኛ የጌታ ተከታዮች እንደመሆናችን መጠን፣ ያዘዝናችሁን እያደረጋችሁ እንዳለና ወደፊትም ማድረጋችሁን እንደምትቀጥሉ በእናንተ እንተማመናለን።  አምላክን እንድትወዱና ለክርስቶስ ጽናት እንድታሳዩ ጌታ ልባችሁን በትክክለኛው አቅጣጫ መምራቱን ይቀጥል።  ወንድሞች፣ በሥርዓት ከማይሄድና ከእኛ የተቀበላችሁትን ወግ ከማይከተል ማንኛውም ወንድም እንድትርቁ በጌታ ኢየሱስ ክርስቶስ ስም እናዛችኋለን።  እኛን እንዴት ልትኮርጁ እንደሚገባ እናንተ ራሳችሁ ታውቃላችሁ፤ ምክንያቱም በመካከላችሁ ሳለን ሥርዓት በጎደለው መንገድ አልተመላለስንም፤  እንዲሁም የማንንም ምግብ በነፃ አልበላንም። ከዚህ ይልቅ ብዙ ወጪ በማስወጣት በማንኛችሁም ላይ ሸክም ላለመሆን ሌት ተቀን በመሥራት እንደክምና እንለፋ ነበር።  ይህን ያደረግነው እኛን እንድትኮርጁ ራሳችንን ለእናንተ ምሳሌ አድርገን ለማቅረብ ብለን እንጂ ሥልጣን ሳይኖረን ቀርቶ አይደለም። 10  እንዲያውም ከእናንተ ጋር በነበርንበት ጊዜ “መሥራት የማይፈልግ ሁሉ አይብላ” የሚል ትእዛዝ በተደጋጋሚ ሰጥተናችሁ ነበር። 11  ምክንያቱም አንዳንዶች ጭራሽ ሥራ ፈት በመሆን በማይመለከታቸው ጉዳይ ጣልቃ እየገቡ ሥርዓት በጎደለው መንገድ በመካከላችሁ እንደሚመላለሱ እንሰማለን። 12  እንዲህ ያሉ ሰዎች አርፈው ሥራቸውን በመሥራት በድካማቸው ያገኙትን እንዲበሉ በጌታ ኢየሱስ ክርስቶስ እናዛቸዋለን፤ እንዲሁም አጥብቀን እንመክራቸዋለን። 13  እናንተ ግን ወንድሞች፣ መልካም የሆነውን ከማድረግ አትታክቱ። 14  ሆኖም በዚህ ደብዳቤ አማካኝነት ላስተላለፍነው ቃል የማይታዘዝ ሰው ቢኖር ይህን ሰው ምልክት አድርጉበት፤ ያፍር ዘንድም ከእሱ ጋር የነበራችሁን ግንኙነት አቁሙ። 15  ይሁን እንጂ እንደ ጠላት አትመልከቱት፤ ከዚህ ይልቅ እንደ ወንድም አጥብቃችሁ መምከራችሁን ቀጥሉ። 16  የሰላም ጌታ ራሱ በሁሉም መንገድ ዘወትር ሰላም ይስጣችሁ። ጌታ ከሁላችሁም ጋር ይሁን። 17  እኔ ጳውሎስ በገዛ እጄ የጻፍኩላችሁ ሰላምታ ይድረሳችሁ፤ ይህ በእያንዳንዱ ደብዳቤ ላይ ያለ መለያ ነው፤ የምጽፈው እንዲህ ነው። 18  የጌታችን ኢየሱስ ክርስቶስ ጸጋ ከሁላችሁም ጋር ይሁን።

የግርጌ ማስታወሻዎች