በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

2 ቆሮንቶስ 8:1-24

8  ወንድሞች፣ በመቄዶንያ ላሉት ጉባኤዎች ስለተሰጠው የአምላክ ጸጋ ልናሳውቃችሁ እንወዳለን፤  ከባድ ፈተና ደርሶባቸው በመከራ ውስጥ በነበሩበት ጊዜ ታላቅ ደስታ የነበራቸው ከመሆኑም በላይ ከፍተኛ ልግስና አሳይተዋል፤ ይህንም ያደረጉት ከባድ ድህነት ውስጥ እያሉ ነው።  እንደ አቅማቸው እንዲያውም ከአቅማቸው በላይ እንደሰጡ እመሠክርላቸዋለሁ፤  ምክንያቱም እነዚህ ወንድሞች ለቅዱሳን የልግስና ስጦታ ለመስጠትና በዚህ መንገድ እነሱን ከሌሎች ጋር ለማገልገል የሚያስችል መብት እንዲሰጣቸው በራሳቸው ፍላጎት ተነሳስተው ይለምኑን እንዲያውም ይማጸኑን ነበር።  ደግሞም ከጠበቅነው በላይ አድርገዋል፤ ምክንያቱም ራሳቸውን በመጀመሪያ ለጌታ ከዚያም በአምላክ ፈቃድ ለእኛ ሰጥተዋል።  ከዚህም የተነሳ ቲቶ ቀደም ሲል በእናንተ መካከል የልግስና ስጦታችሁን የማሰባሰቡን ሥራ እንዳስጀመረ ሁሉ ይህንኑ ሥራ ወደ ፍጻሜ እንዲያደርስ አበረታታነው።  ስለዚህ በሁሉም ነገር ይኸውም በእምነት፣ በቃል፣ በእውቀት፣ በትጋት ሁሉና እኛ ለእናንተ ባለን በዚህ ፍቅር ባለጸጋ እንደሆናችሁ ሁሉ የልግስና ስጦታ በመስጠት ረገድም ባለጸጋ ሁኑ።  ይህን የምላችሁ በትእዛዝ መልክ ሳይሆን ሌሎች የሚያሳዩትን ትጋት ግምት ውስጥ በማስገባት የፍቅራችሁን እውነተኝነት ለመፈተን ነው።  ምክንያቱም የጌታችንን የኢየሱስ ክርስቶስን ጸጋ ታውቃላችሁ፤ በእሱ ድህነት እናንተ ባለጸጋ ትሆኑ ዘንድ እሱ ባለጸጋ ሆኖ ሳለ ለእናንተ ሲል ድሃ ሆኗል። 10  በዚህ ረገድ የምሰጠው ሐሳብ አለ:- ከአንድ ዓመት በፊት ይህን ለማድረግ መነሳሳት ብቻ ሳይሆን ማድረግም ስለጀመራችሁ ይህን ማከናወኑ ለእናንተ ይጠቅማችኋል፤ 11  ስለዚህ አሁን ይህን ጉዳይ ዳር አድርሱት፤ ይህን ለማድረግ ፈቃደኝነቱ እንደነበራችሁ ሁሉ፣ አሁንም ካላችሁ ላይ በመስጠት ሥራው ከፍጻሜ እንዲደርስ አድርጉ። 12  ለመስጠት ፈቃደኝነቱ ካለ ስጦታው ይበልጥ ተቀባይነት የሚኖረው አንድ ሰው ባለው መጠን ሲሰጥ እንጂ በሌለው መጠን ሲሰጥ አይደለም። 13  ይህን የምለውም ሌሎች እንዲቀላቸው አድርጌ እናንተ እንዲከብዳችሁ ለማድረግ አይደለም፤ 14  ከዚህ ይልቅ የእናንተ ትርፍ የእነሱን ጉድለት እንዲሸፍን፣ የእነሱ ትርፍ ደግሞ የእናንተን ጉድለት እንዲሸፍን ነው፤ ይህም ሸክሙን እኩል እንድትጋሩ ያስችላል። 15  ይህ ደግሞ “ብዙ የሰበሰበ ብዙ አላተረፈም፤ ጥቂት የሰበሰበም ምንም አልጎደለበትም” ተብሎ እንደተጻፈው ነው። 16  እኛ ለእናንተ ያለንን ዓይነት ቀና አመለካከት በቲቶ ልብ ውስጥ ያሳደረ አምላክ የተመሰገነ ይሁን፤ 17  ምክንያቱም ቲቶ ወደ እናንተ የሚመጣው የእኛን ማበረታቻ በመቀበል ብቻ ሳይሆን በታላቅ ጉጉት በራሱ ፈቃድ ተነሳስቶ ነው። 18  ይሁንና ከምሥራቹ ጋር በተያያዘ እያከናወነ ባለው ሥራ በጉባኤዎች ሁሉ የተመሰገነውን ወንድም ከእሱ ጋር እንልከዋለን። 19  ከዚህም በላይ ይህ ወንድም ጌታን ለማስከበርና እኛ ሌሎችን ለመርዳት ዝግጁ መሆናችንን ለማሳየት ይህን የደግነት ስጦታ በማከፋፈል ከምናከናውነው አገልግሎት ጋር በተያያዘ የጉዞ አጋራችን እንዲሆን በጉባኤዎች ተሹሟል። 20  ስለዚህ እኛ እንድናከፋፍለው በአደራ ከተሰጠን የልግስና መዋጮዋችሁ ጋር በተያያዘ ማንም ሰው ምንም ዓይነት ስህተት እንዳያገኝብን እንጠነቀቃለን። 21  ምክንያቱም “በይሖዋ ፊት ብቻ ሳይሆን በሰዎችም ፊት ሁሉንም ነገር በሐቀኝነት እናከናውናለን።” 22  በተጨማሪም በተደጋጋሚ ጊዜ በብዙ ነገር ተፈትኖ ትጉ ሆኖ ያገኘነውን ወንድማችንን ከእነሱ ጋር እንልከዋለን፤ እንዲያውም አሁን በእናንተ ላይ ባለው ጠንካራ እምነት የተነሳ ትጋቱ እጅግ ጨምሯል። 23  ይሁን እንጂ ቲቶን በተመለከተ ጥያቄ የሚያነሳ ካለ እሱ ለእናንተ ጥቅም አብሮኝ የሚሠራ ባልደረባዬ ነው፤ ወይም ደግሞ ስለ ወንድሞቻችን ጥያቄ ካለ እነሱ የጉባኤዎች ሐዋርያትና* የክርስቶስ ክብር ናቸው። 24  ስለሆነም የፍቅራችሁን እውነተኝነትና በእናንተ የምንኮራው በከንቱ እንዳልሆነ በጉባኤዎች ፊት በተግባር አሳዩአቸው።

የግርጌ ማስታወሻዎች

2ቆሮ 8:23 * ወይም፣ “መልእክተኞች፤ የተላኩ ሰዎች።”