በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

2 ቆሮንቶስ 13:1-14

13  ወደ እናንተ ለመምጣት ሳስብ ይህ ሦስተኛ ጊዜዬ ነው። “ማንኛውም ጉዳይ በሁለት ወይም በሦስት ምሥክሮች አፍ የጸና ሊሆን ይገባል።”  ምንም እንኳ አሁን ከእናንተ ርቄ ያለሁ ቢሆንም ለሁለተኛ ጊዜ አብሬያችሁ እንዳለሁ አድርጋችሁ በማሰብ ቃሌን ተቀበሉ። በመሆኑም ዳግመኛ ከመጣሁ ከዚህ በፊት እንዳደረግኩት ማንንም ሳልገሥጽ እንደማላልፍ ቀደም ሲል ኃጢአት ለሠሩትም ሆነ ለተቀሩት ሁሉ አስቀድሜ እናገራለሁ፤  ይህም ክርስቶስ በእኔ አማካኝነት እንደሚናገር የሚያሳይ ማስረጃ ስለፈለጋችሁ ነው፤ ክርስቶስ ደግሞ በእናንተ መካከል በድካም ሳይሆን በኃይል እንደሚሠራ ታይቷል።  እርግጥ ነው፣ እሱ የተሰቀለው በደካማ* ሁኔታ ላይ እያለ ነው፤ ይሁንና በአምላክ ኃይል ሕያው ሆኗል። እርግጥ እኛም ከእሱ ጋር ደካሞች ነን፤ ሆኖም በእናንተ ላይ እየሠራ ባለው የአምላክ ኃይል አማካኝነት ከእሱ ጋር እንኖራለን።  በእምነት ውስጥ እየተመላለሳችሁ መሆናችሁን ለማወቅ ዘወትር ራሳችሁን መርምሩ፤ ማንነታችሁን ለማወቅ ራሳችሁን ዘወትር ፈትኑ። ኢየሱስ ክርስቶስ ከእናንተ ጋር ኅብረት እንዳለው አትገነዘቡም? ተቀባይነት አጥታችሁ ካልሆነ በስተቀር ይህን ልትገነዘቡ ይገባል።  እኛ ግን ተቀባይነት ያለን መሆናችንን እንደምትገነዘቡ ተስፋ አደርጋለሁ።  ምንም መጥፎ ነገር እንዳትሠሩ ወደ አምላክ እንጸልያለን፤ ይህን የምናደርገው እኛ ተቀባይነት ያለን ሆነን እንድንታይ አይደለም፤ ከዚህ ይልቅ እኛ ተቀባይነት ያላገኘን መስለን ብንታይም እንኳ እናንተ መልካም የሆነውን ነገር እንድታደርጉ ነው።  ምክንያቱም እኛ ለእውነት እንሠራለን እንጂ እውነትን የሚጻረር ምንም ነገር ማድረግ አንችልም።  እኛ በደከምንበት ጊዜ ሁሉ እናንተ ብርቱዎች ብትሆኑ እኛ ምንጊዜም ደስተኞች ነን፤ መስተካከላችሁን እንድትቀጥሉም እንጸልያለን። 10  ከእናንተ ርቄ ሳለሁ እነዚህን ነገሮች የምጽፍላችሁ በመካከላችሁ በምሆንበት ጊዜ ጠበቅ ያለ እርምጃ እንዳልወስድ ነው፤ ጌታ ሥልጣን የሰጠኝ እናንተን ለማነጽ እንጂ ለማፍረስ አይደለም። 11  በተረፈ ወንድሞች፣ መደሰታችሁን፣ መስተካከላችሁን፣ ማጽናኛ መቀበላችሁን፣ በሐሳብ መስማማታችሁንና በሰላም መኖራችሁን ቀጥሉ፤ የፍቅርና የሰላም አምላክም ከእናንተ ጋር ይሆናል። 12  እርስ በርሳችሁ በተቀደሰ መሳሳም ሰላምታ ተለዋወጡ። 13  ቅዱሳን ሁሉ ሰላምታ ያቀርቡላችኋል። 14  የጌታ ኢየሱስ ክርስቶስ ጸጋና የአምላክ ፍቅር እንዲሁም በጋራ የምንቀበለው መንፈስ ቅዱስ ከሁላችሁ ጋር ይሁን።

የግርጌ ማስታወሻዎች

2ቆሮ 13:4 * ሰው በመሆኑ የተነሳ።