በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

1 ጴጥሮስ 4:1-19

4  ስለዚህ ክርስቶስ በሥጋ መከራ ስለተቀበለ እናንተም በዚሁ ዓይነት አስተሳሰብ ራሳችሁን አስታጥቁ፤ ምክንያቱም በሥጋ መከራ የተቀበለ ሰው ኃጢአት መሥራት አቁሟል፤  ይህንም የሚያደርገው ከእንግዲህ ወዲህ በሥጋ በሚኖርበት ቀሪ ሕይወቱ ለሰው ፍላጎት ሳይሆን ለአምላክ ፈቃድ መኖር ይችል ዘንድ ነው።  የብልግና* ተግባሮችን በመፈጸም፣ ልቅ በሆነ የሥጋ ፍላጎት፣ ከልክ በላይ በመጠጣት፣ መረን በለቀቀ ፈንጠዝያ፣ በፉክክር ብዙ በመጠጣትና በአስጸያፊ የጣዖት አምልኮ በመካፈል የአሕዛብን ፈቃድ እየፈጸማችሁ ትመላለሱበት የነበረው ያለፈው ጊዜ በቂ ነው።  ይህን በመሰለው ያዘቀጠ ወራዳ ሕይወት ከእነሱ ጋር መሮጣችሁን ስለማትቀጥሉ ይደነቃሉ እንዲሁም ይሰድቧችኋል።  ይሁንና እነዚህ ሰዎች በሕያዋንና በሙታን ላይ ሊፈርድ ለተዘጋጀው መልስ ይሰጣሉ።  እንዲያውም ምሥራቹ ለሙታንም የተሰበከው በዚህ ምክንያት ነው፤ ይኸውም ከሰው አመለካከት አንጻር በሥጋ እንዲፈረድባቸው ከአምላክ አመለካከት አንጻር ግን በመንፈስ እንዲኖሩ ነው።  ሆኖም የሁሉም ነገር መጨረሻ ቀርቧል። ስለዚህ ጤናማ አስተሳሰብ ይኑራችሁ፤ እንዲሁም በጸሎት ረገድ ንቁዎች ሁኑ።  ከሁሉም በላይ አንዳችሁ ለሌላው የጠለቀ ፍቅር ይኑራችሁ፤ ምክንያቱም ፍቅር የኃጢአትን ብዛት ይሸፍናል።  ያለ ማጉረምረም አንዳችሁ ለሌላው የእንግዳ ተቀባይነት መንፈስ አሳዩ። 10  እያንዳንዱ ሰው በተቀበለው ስጦታ መሠረት በልዩ ልዩ መንገዶች የተገለጸው የአምላክ ጸጋ መልካም መጋቢዎች በመሆን፣ የተሰጣችሁን ስጦታ አንዳችሁ ሌላውን ለማገልገል ተጠቀሙበት። 11  የሚናገር ማንም ቢኖር የአምላክን ቅዱስ ቃል ይናገር፤ የሚያገለግል ማንም ቢኖር አምላክ በሚሰጠው ኃይል ተመክቶ ያገልግል፤ ይህም በኢየሱስ ክርስቶስ አማካኝነት አምላክ በሁሉም ነገር እንዲከበር ነው። ክብርና ኃይል ከዘላለም እስከ ዘላለም የእሱ ነው። አሜን። 12  የተወደዳችሁ ወንድሞች፣ እንደ እሳት በሚያቃጥሉ አስቸጋሪ ሁኔታዎች ስትፈተኑ እንግዳ የሆነ ነገር እንደደረሰባችሁ አድርጋችሁ በማሰብ ግራ አትጋቡ። 13  ከዚህ ይልቅ ክርስቶስ በክብሩ በሚገለጥበት ወቅት እናንተም እንድትደሰቱና እጅግ ሐሴት እንድታደርጉ እሱ የተቀበለው መከራ ተካፋዮች በሆናችሁበት በዚያው መጠን ምንጊዜም ደስ ይበላችሁ። 14  ለክርስቶስ ስም ስትሉ ብትነቀፉ ደስተኞች ናችሁ፤ ምክንያቱም የክብር መንፈስ እንዲያውም የአምላክ መንፈስ በእናንተ ላይ ያርፋል። 15  ይሁን እንጂ ከእናንተ መካከል ማንም ነፍሰ ገዳይ ወይም ሌባ ወይም ክፉ አድራጊ ወይም በሌሎች ሰዎች ጉዳይ ጣልቃ የሚገባ በመሆን መከራ አይቀበል። 16  ይሁንና ክርስቲያን በመሆኑ መከራ ቢደርስበት ምንም ኀፍረት አይሰማው፤ ይልቁንም በዚህ ስም አምላክን ማክበሩን ይቀጥል። 17  ምክንያቱም ፍርድ ከአምላክ ቤት የሚጀምርበት አስቀድሞ የተወሰነው ጊዜ ይህ ነው። እንግዲህ ፍርድ በቅድሚያ በእኛ የሚጀምር ከሆነ ለአምላክ ምሥራች ታዛዥ ያልሆኑ ሰዎች መጨረሻ ምን ይሆን? 18  “እንግዲህ ጻድቅ በጭንቅ የሚድን ከሆነ ፈሪሃ አምላክ የሌለውና ኃጢአተኛ ሰው የት ሊገኝ ይችላል?” 19  ስለዚህ የአምላክን ፈቃድ በማድረጋቸው መከራ የሚደርስባቸው ሰዎች መልካም እያደረጉም ነፍሳቸውን ታማኝ ለሆነው ፈጣሪ አደራ ይስጡ።

የግርጌ ማስታወሻዎች

1ጴጥ 4:3 ገላትያ 5:19 ላይ የሚገኘውን የግርጌ ማስታወሻ ተመልከት።