በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

1 ጴጥሮስ 3:1-22

3  በተመሳሳይም እናንተ ሚስቶች፣ ለቃሉ የማይታዘዙ ባሎች ካሉ ያለ ቃል በሚስቶቻቸው ምግባር እንዲማረኩ ለገዛ ባሎቻችሁ ተገዙ፤  ሊማረኩ የሚችሉትም ንጹሕ ምግባራችሁንና የምታሳዩትን ጥልቅ አክብሮት በዓይናቸው ሲመለከቱ ነው።  ውበታችሁ በውጫዊ ነገሮች በማጌጥ ይኸውም ሹሩባ በመሠራት፣ የወርቅ ጌጣ ጌጦች በማድረግ ወይም በልብስ አይሁን፤  ከዚህ ይልቅ ውበታችሁ የማያረጀውን ልብስ ይኸውም በአምላክ ዓይን ከፍተኛ ዋጋ ያለውን ጭምትና ገር መንፈስ የተላበሰ የተሰወረ የልብ ሰው ይሁን።  ተስፋቸውን በአምላክ ላይ የጣሉ በቀድሞ ጊዜ የነበሩ ቅዱሳን ሴቶችም ራሳቸውን ለገዛ ባሎቻቸው በማስገዛት በዚህ ዓይነት ሁኔታ ራሳቸውን ያስውቡ ነበር፤  ይህም ሣራ አብርሃምን “ጌታዬ” እያለች በመጥራት ትታዘዘው እንደነበረው ነው። እናንተም መልካም ማድረጋችሁን ከቀጠላችሁና ሊያስፈሩ በሚችሉ ነገሮች ካልተሸበራችሁ ልጆቿ ሆናችኋል።  ባሎች ሆይ፣ እናንተም ከእነሱ ጋር የሕይወትን ጸጋ ወራሾች ስለሆናችሁ ጸሎታችሁ እንዳይታገድ ከእናንተ ይበልጥ ተሰባሪ ዕቃ ለሆኑት ለሴቶች ክብር በመስጠት ልክ እንደዚሁ ከእነሱ ጋር በእውቀት መኖራችሁን ቀጥሉ።  በመጨረሻም፣ ሁላችሁም አንድ ዓይነት አስተሳሰብ ይኑራችሁ፣ የሌላውን ስሜት የምትረዱ ሁኑ፣ የወንድማማች መዋደድ ይኑራችሁ፣ ከአንጀት የምትራሩ ሁኑ፣ ትሕትና የሚንጸባረቅበት አስተሳሰብ ይኑራችሁ፣  ክፉን በክፉ ወይም ስድብን በስድብ አትመልሱ፤ ከዚህ ይልቅ ባርኩ፤ ምክንያቱም የተጠራችሁት በረከትን ትወርሱ ዘንድ በዚህ ጎዳና እንድትሄዱ ነው። 10  ስለዚህ “ሕይወትን የሚወድና መልካም ቀኖችን ማየት የሚፈልግ ሰው ምላሱን ከክፉ፣ ከንፈሮቹንም የማታለያ ቃላት ከመናገር ይከልክል፤ 11  ክፉ ከሆነው ነገር ይራቅ፤ እንዲሁም መልካም የሆነውን ነገር ያድርግ፤ ሰላምን ይፈልግ፣ ይከተለውም። 12  ምክንያቱም የይሖዋ ዓይኖች ጻድቃንን ይመለከታሉ፤ ጆሮዎቹም ምልጃቸውን ለመስማት የተከፈቱ ናቸው፤ የይሖዋ ፊት ግን ክፉ ነገሮችን በሚያደርጉ ላይ ነው።” 13  ደግሞም ለመልካም ነገር ቀናተኞች ብትሆኑ ጉዳት የሚያደርስባችሁ ማን ነው? 14  ሆኖም ለጽድቅ ስትሉ መከራ ብትቀበሉ እንኳ ደስተኞች ናችሁ። ይሁን እንጂ እነሱ የሚፈሩትን ነገር እናንተ አትፍሩ፣ ደግሞም አትሸበሩ። 15  ነገር ግን እናንተ ስላላችሁ ተስፋ፣ ምክንያት እንድታቀርቡ ለሚጠይቃችሁ ሰው ሁሉ መልስ ለመስጠት ዘወትር ዝግጁዎች በመሆን ክርስቶስን እንደ ጌታ አድርጋችሁ በልባችሁ ቀድሱት፤ ይህን ስታደርጉ ግን በገርነት መንፈስና በጥልቅ አክብሮት ይሁን። 16  መልካም ክርስቲያናዊ ምግባራችሁን አጥላልተው የሚናገሩ ሰዎች ስለ እናንተ በሚናገሩት በዚያ መጥፎ ነገር እንዲያፍሩ ጥሩ ሕሊና ይኑራችሁ። 17  የአምላክ ፈቃድ ይህ ከሆነ ክፉ ነገር ሠርታችሁ መከራ ከምትቀበሉ ይልቅ መልካም ነገር ሠርታችሁ መከራ ብትቀበሉ ይሻላል። 18  ጻድቅ ሰው የሆነው ክርስቶስ እንኳ ለዓመፀኞች ሲል ለአንዴና ለመጨረሻ ጊዜ በመሞት ከኃጢአት ነፃ አውጥቷቸዋል። ይህንም ያደረገው እናንተን ወደ አምላክ ለመምራት ነው። በሥጋ እያለ ተገደለ፤ ሆኖም መንፈስ ሆኖ ሕያው እንዲሆን ተደረገ። 19  በዚህ ሁኔታ እያለም ሄዶ በእስር ላሉት መናፍስት ሰበከላቸው፤ 20  እነዚህ መናፍስት በኖኅ ዘመን ጥቂት ሰዎች ይኸውም ስምንት ነፍሳት ከውኃው የዳኑበት መርከብ እየተሠራ በነበረበት ጊዜ አምላክ በትዕግሥት እየጠበቀ ሳለ ሳይታዘዙ የቀሩ ናቸው። 21  አሁንም ከዚህ ጋር የሚመሳሰል ነገር እናንተን እያዳናችሁ ሲሆን ይህም ጥምቀት ነው (ጥምቀት የሰውነትን እድፍ ማስወገድ ሳይሆን ጥሩ ሕሊና ለማግኘት ለአምላክ የሚቀርብ ልመና ነው)፤ የሚያድናችሁም በኢየሱስ ክርስቶስ ትንሣኤ አማካኝነት ነው። 22  እሱም ወደ ሰማይ የሄደ ሲሆን አሁን በአምላክ ቀኝ ይገኛል፤ እንዲሁም መላእክት፣ ሥልጣናትና ኃይላት እንዲገዙለት ተደርጓል።

የግርጌ ማስታወሻዎች