በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

1 ጴጥሮስ 2:1-25

2  እንግዲህ ክፋትን ሁሉ፣ ማታለልን ሁሉ፣ ግብዝነትን፣ ምቀኝነትንና ማንኛውንም ዓይነት የሰላ ትችት አስወግዱ፤  እንዲሁም ገና እንደተወለዱ ሕፃናት በአምላክ ቃል ውስጥ ለሚገኘው ያልተበረዘ ወተት ጉጉት አዳብሩ፤ ይህም በእሱ አማካኝነት ወደ መዳን ማደግ እንድትችሉ ነው፤  ይህ የሚሆነው ደግሞ ጌታ ደግ መሆኑን ከቀመሳችሁ ነው።  እርግጥ በሰዎች ወደተናቀው በአምላክ ግን ወደተመረጠውና በፊቱ ክቡር ወደሆነው ወደ እሱ ይኸውም ሕያው ወደሆነው ድንጋይ በመምጣት  እናንተ ራሳችሁም ቅዱሳን ካህናት በመሆን በኢየሱስ ክርስቶስ አማካኝነት በአምላክ ዘንድ ተቀባይነት ያለው መንፈሳዊ መሥዋዕት ማቅረብ ትችሉ ዘንድ እንደ ሕያዋን ድንጋዮች መንፈሳዊ ቤት ለመሆን እየተገነባችሁ ነው።  ምክንያቱም በቅዱስ መጽሐፉ ውስጥ “እነሆ፣ በጽዮን ድንጋይ ይኸውም የተመረጠና ክቡር የሆነ የማዕዘን የመሠረት ድንጋይ አኖራለሁ፤ ደግሞም በእሱ ላይ ያለውን እምነት በተግባር የሚያሳይ ሁሉ በምንም ዓይነት ለኀፍረት አይዳረግም” የሚል ተጽፎ ይገኛል።  ስለዚህ እናንተ አማኞች ስለሆናችሁ እሱ ክቡር የሆነው ለእናንተ ነው፤ የማያምኑትን በተመለከተ ግን እንዲህ ተብሎ ተጽፏል:- “ይህን ድንጋይ ግንበኞች ቢንቁትም ይኸው ድንጋይ የማዕዘኑ ራስ* ሆነ”፤  እንዲሁም “የሚያደናቅፍ ድንጋይና የሚያሰናክል ዐለት ሆነ።” እነዚህ የሚሰናከሉት ለቃሉ ስለማይታዘዙ ነው። በእነሱ ላይ የሚደርሰው ይኸው ነው።  እናንተ ግን ከጨለማ ወደ አስደናቂ ብርሃኑ የጠራችሁን የእሱን “ድንቅ ባሕርያት በስፋት እንድታስታውቁ የተመረጠ ዘር፣ ንጉሣዊ ካህናት፣ ቅዱስ ብሔር፣ ልዩ ንብረት እንዲሆን የተለየ ሕዝብ” ናችሁ። 10  ምክንያቱም እናንተ በአንድ ወቅት አንድ ሕዝብ አልነበራችሁም፣ አሁን ግን የአምላክ ሕዝብ ናችሁ፤ ቀደም ሲል ምሕረት ያልተደረገላችሁ ሰዎች ነበራችሁ፣ አሁን ግን ምሕረት የተደረገላችሁ ሰዎች ናችሁ። 11  የተወደዳችሁ ወንድሞች፣ መጻተኞችና ጊዜያዊ ነዋሪዎች እንደመሆናችሁ መጠን ከነፍስ ጋር ከሚዋጉት ሥጋዊ ምኞቶች ምንጊዜም እንድትርቁ አሳስባችኋለሁ። 12  ምንም እንኳ ክፉ አድራጊዎች እንደሆናችሁ አድርገው ቢናገሩም አምላክ ለመመርመር በሚመጣበት ቀን እነሱ ራሳቸው በዓይናቸው ባዩት መልካም ሥራችሁ የተነሳ አምላክን እንዲያከብሩ በአሕዛብ መካከል መልካም ምግባር ይዛችሁ ኑሩ። 13  ለጌታ ብላችሁ ለሰብዓዊ ባለሥልጣናት ሁሉ ተገዙ:- ለንጉሥ ተገዙ፣ ከሁሉ በላይ ነውና፤ 14  ለገዥዎችም ቢሆን ተገዙ፣ በክፉ አድራጊዎች ላይ ቅጣት ለማስፈጸም፣ መልካም የሚያደርጉትን ግን ለማመስገን በእሱ ተልከዋልና። 15  ምክንያቱም ከንቱ ንግግር የሚናገሩትን ምክንያታዊ ያልሆኑ ሰዎች አፍ መልካም ነገር በማድረግ እንድትለጉሙ የአምላክ ፈቃድ ነው። 16  እንደ ነፃ ሰዎች ኑሩ፤ ሆኖም ነፃነታችሁን እንደ አምላክ ባሪያዎች ሆናችሁ ተጠቀሙበት እንጂ ለክፋት መሸፈኛ አታድርጉት። 17  ሁሉንም ዓይነት ሰው አክብሩ፤ ለመላው የወንድማማች ማኅበር ፍቅር ይኑራችሁ፤ አምላክን ፍሩ፤ ንጉሥን አክብሩ። 18  የቤት አገልጋዮች ጥሩና ምክንያታዊ ለሆኑት ብቻ ሳይሆን በቀላሉ ለማይደሰቱ ጌቶቻቸውም እንኳ ተገቢውን ፍርሃት ሁሉ በማሳየት ይገዙ። 19  ምክንያቱም አንድ ሰው በአምላክ ፊት ንጹሕ ሕሊና እንዲኖረው ሲል አስከፊ ነገሮችን ችሎ ቢያሳልፍና ግፍ ቢደርስበት ይህ መልካም ነገር ነው። 20  ኃጢአት ሠርታችሁ በጥፊ ስትመቱ ብትታገሡ ምን የሚያስመሰግን ነገር አለው? መልካም አድርጋችሁ መከራ ሲደርስባችሁ ችላችሁ ብታሳልፉ ግን ይህ አምላክ ደስ የሚሰኝበት ነገር ነው። 21  ደግሞም የተጠራችሁት በዚህ ጎዳና እንድትሄዱ ነው፤ ምክንያቱም ክርስቶስም እንኳ የእሱን ፈለግ በጥብቅ እንድትከተሉ አርዓያ ትቶላችሁ ለእናንተ መከራ ተቀብሏል። 22  እሱ ምንም ኃጢአት አልሠራም፤ ከአንደበቱም የማታለያ ቃል አልወጣም። 23  ሲሰድቡት መልሶ አልተሳደበም። መከራ ሲደርስበት አልዛተም፤ ከዚህ ይልቅ በጽድቅ ለሚፈርደው ራሱን አሳልፎ ሰጠ። 24  ከኃጢአታችን ነፃ እንድንወጣና ለጽድቅ እንድንኖር እሱ ራሱ በገዛ አካሉ ኃጢአታችንን በእንጨት ላይ ተሸከመ። ደግሞም “በእሱ ቁስል እናንተ ተፈወሳችሁ።” 25  ምክንያቱም እናንተ እንደባዘኑ በጎች ነበራችሁ፤ አሁን ግን ወደ ነፍሳችሁ እረኛና የበላይ ተመልካች ተመልሳችኋል።

የግርጌ ማስታወሻዎች

1ጴጥ 2:7 ማቴዎስ 21:42 ላይ የሚገኘውን የግርጌ ማስታወሻ ተመልከት።