በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

1 ዮሐንስ 3:1-24

3  የአምላክ ልጆች ተብለን እንድንጠራ አብ ምን ዓይነት ፍቅር እንዳሳየን ተመልከቱ፤ ደግሞም ልጆቹ ነን። ዓለም ስለ እኛ የማያውቀው ለዚህ ነው፤ ምክንያቱም ዓለም እሱን አላወቀውም።  የተወደዳችሁ ወንድሞች፣ እኛ አሁን የአምላክ ልጆች ነን፤ ወደፊት ምን እንደምንሆን ግን ገና አልተገለጠም። እሱ በሚገለጥበት ጊዜ እንደ እሱ እንደምንሆን እናውቃለን፤ ምክንያቱም እሱን ልክ ባለበት ሁኔታ እናየዋለን።  በእሱ ላይ የተመሠረተው ይህ ተስፋ ያላቸው ሁሉ እሱ ንጹሕ እንደሆነ እነሱም ራሳቸውን ያነጻሉ።  ኃጢአት መሥራትን ልማድ ያደረገ ሁሉ ሕግንም እየተላለፈ ነው፤ ስለዚህ ኃጢአት፣ ሕግ መተላለፍ ነው።  በተጨማሪም እሱ እንዲገለጥ የተደረገው ኃጢአታችንን እንዲያስወግድ መሆኑን ታውቃላችሁ፤ እሱ ደግሞ ኃጢአት የለበትም።  ከእሱ ጋር ያለውን አንድነት ጠብቆ የሚኖር ሁሉ ኃጢአት መሥራትን ልማድ አያደርግም፤ ኃጢአት መሥራትን ልማድ ያደረገ ሰው እሱን አላየውም ደግሞም አላወቀውም።  ልጆቼ ሆይ፣ ማንም አያሳስታችሁ፤ እሱ ጻድቅ እንደሆነ ሁሉ በጽድቅ ጎዳና የሚመላለስ ሰውም ጻድቅ ነው።  በኃጢአት ጎዳና የሚመላለስ የዲያብሎስ ወገን ነው፤ ምክንያቱም ዲያብሎስ ከመጀመሪያው አንስቶ ኃጢአት ሲሠራ ቆይቷል። የአምላክ ልጅ እንዲገለጥ የተደረገው ለዚህ ዓላማ ይኸውም የዲያብሎስን ሥራ ለማፍረስ ነው።  ከአምላክ የተወለደ ሁሉ በኃጢአት ጎዳና አይመላለስም፤ ምክንያቱም የአምላክ ፍሬያማ ዘር እንዲህ ባለው ሰው ውስጥ ይኖራል፤ ኃጢአትንም ልማድ ሊያደርግ አይችልም፤ ምክንያቱም ይህ ሰው ከአምላክ የተወለደ ነው። 10  የአምላክ ልጆችና የዲያብሎስ ልጆች በዚህ በግልጽ ይታወቃሉ:- በጽድቅ ጎዳና የማይመላለስ ሁሉ የአምላክ ወገን አይደለም፤ ወንድሙን የማይወድም የአምላክ ወገን አይደለም። 11  ከመጀመሪያ የሰማችሁት መልእክት እርስ በርሳችን መዋደድ አለብን የሚል ነው፤ 12  ከክፉው ወገን እንደሆነውና ወንድሙን በጭካኔ እንደገደለው እንደ ቃየን መሆን የለብንም። ወንድሙን በጭካኔ የገደለው በምን ምክንያት ነበር? የእሱ ሥራ ክፉ የወንድሙ ሥራ ግን ጽድቅ ስለነበረ ነው። 13  ወንድሞች፣ ዓለም ቢጠላችሁ ምንም አትደነቁ። 14  እኛ ወንድሞችን ስለምንወድ ከሞት ወደ ሕይወት እንደተሻገርን እናውቃለን። ወንድሙን የማይወድ በሞት ውስጥ ይኖራል። 15  ወንድሙን የሚጠላ ሁሉ ነፍሰ ገዳይ ነው፤ ነፍሰ ገዳይ የሆነ ሁሉ ደግሞ የዘላለም ሕይወት በውስጡ እንደማይኖር ታውቃላችሁ። 16  እሱ ነፍሱን ለእኛ አሳልፎ ስለሰጠ በዚህ ፍቅርን አውቀናል፤ እኛም ነፍሳችንን ለወንድሞቻችን አሳልፈን የመስጠት ግዴታ አለብን። 17  ይሁን እንጂ ለኑሮ የሚያስፈልጉ ቁሳዊ ነገሮች ያሉት ሰው ወንድሙ ሲቸገር ተመልክቶ ሳይራራለት ቢቀር የአምላክ ፍቅር በእሱ ውስጥ እንዴት ሊኖር ይችላል? 18  ልጆቼ ሆይ፣ በተግባርና በእውነት እንጂ በቃልና በአንደበት ብቻ አንዋደድ። 19  ከእውነት ወገን መሆናችንን በዚህ እናውቃለን፤ ልባችንም በፊቱ የመተማመን ስሜት እንዲያድርበት እናደርጋለን፤ 20  ይህንም የምናደርገው ልባችን እኛን በሚኮንንበት ነገር ሁሉ ነው፤ ምክንያቱም አምላክ ከልባችን ይበልጥ ታላቅ ነው፤ ደግሞም ሁሉንም ነገር ያውቃል። 21  የተወደዳችሁ ወንድሞች፣ ልባችን የማይኮንነን ከሆነ በአምላክ ፊት በነፃነት መናገር እንችላለን፤ 22  እንዲሁም ትእዛዛቱን ስለምንጠብቅና በፊቱ ደስ የሚያሰኙትን ነገሮች ስለምናደርግ የምንጠይቀውን ሁሉ ከእሱ እንቀበላለን። 23  በእርግጥም ትእዛዙ ይህ ነው፤ ይኸውም በልጁ በኢየሱስ ክርስቶስ ስም እንድናምንና እሱ ባዘዘን መሠረትም እርስ በርሳችን እንድንዋደድ ነው። 24  በተጨማሪም ትእዛዛቱን የሚጠብቅ ሰው ከእሱ ጋር ያለውን አንድነት ጠብቆ ይኖራል፤ እሱም እንዲህ ካለው ሰው ጋር አንድነት ይኖረዋል፤ እንዲሁም እሱ ከእኛ ጋር ያለውን አንድነት ጠብቆ እንደሚኖር በዚህ ይኸውም በሰጠን መንፈስ አማካኝነት እናውቃለን።

የግርጌ ማስታወሻዎች