በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

1 ዮሐንስ 2:1-29

2  የተወደዳችሁ ልጆቼ፣ እነዚህን ነገሮች የምጽፍላችሁ ኃጢአት* እንዳትሠሩ ነው። ይሁንና ማንም ኃጢአት ቢሠራ በአብ ዘንድ ረዳት አለን፤ እሱም ጻድቅ የሆነው ኢየሱስ ክርስቶስ ነው።  እሱ ለእኛ ኃጢአት የቀረበ የማስተሰረያ መሥዋዕት ነው፤ ሆኖም ለእኛ ኃጢአት ብቻ ሳይሆን ለዓለም ሁሉ ኃጢአት ጭምር ነው።  ደግሞም ትእዛዛቱን መፈጸማችንን ከቀጠልን እሱን የምናውቅ መሆናችንን በዚህ እናረጋግጣለን።  “እሱን አውቀዋለሁ” እያለ ትእዛዛቱን የማይፈጽም ሰው ቢኖር ውሸታም ነው፤ እውነትም በዚህ ሰው ውስጥ የለም።  ሆኖም የእሱን ቃል የሚጠብቅ ማንም ቢኖር በእርግጥ የአምላክ ፍቅር በዚህ ሰው ላይ ፍጹም በሆነ መንገድ ይታያል። ከእሱ ጋር አንድነት እንዳለንም በዚህ እናውቃለን።  ከእሱ ጋር ያለኝን አንድነት ጠብቄ እኖራለሁ የሚል እሱ በተመላለሰበት መንገድ የመመላለስ ግዴታ አለበት።  የተወደዳችሁ ወንድሞች፣ የምጽፍላችሁ ከመጀመሪያ ጀምሮ የነበራችሁን የቆየውን ትእዛዝ እንጂ አዲስ ትእዛዝ አይደለም። ይህ የቆየው ትእዛዝ የሰማችሁት ቃል ነው።  ይሁንና በእሱም ሆነ በእናንተ ዘንድ እውነት ሆኖ የታየውን ሐቅ ይኸውም አዲስ ትእዛዝ እጽፍላችኋለሁ፤ ምክንያቱም ጨለማው እያለፈና እውነተኛው ብርሃን አሁንም እንኳ እያበራ ነው።  በብርሃን ውስጥ እንዳለ እየተናገረ ወንድሙን የሚጠላ ገና በጨለማ ውስጥ ነው። 10  ወንድሙን የሚወድ በብርሃን ውስጥ ይኖራል፤ በእሱም ዘንድ ምንም የሚያሰናክል ነገር የለም። 11  ወንድሙን የሚጠላ ግን በጨለማ ውስጥ ነው፤ በጨለማም ይመላለሳል፤ ጨለማው ዓይኑን ስላሳወረውም ወዴት እንደሚሄድ አያውቅም። 12  ልጆቼ ሆይ፣ የምጽፍላችሁ ለእሱ ስም ሲባል ኃጢአታችሁ ይቅር ስለተባለላችሁ ነው። 13  አባቶች ሆይ፣ የምጽፍላችሁ ከመጀመሪያ ያለውን እሱን ስላወቃችሁት ነው። ወጣት ወንዶች፣ የምጽፍላችሁ ክፉውን ስላሸነፋችሁት ነው። ልጆች ሆይ፣ የምጽፍላችሁ አብን ስላወቃችሁት ነው። 14  አባቶች ሆይ፣ የምጽፍላችሁ ከመጀመሪያ ያለውን እሱን ስላወቃችሁት ነው። ወጣት ወንዶች፣ የምጽፍላችሁ ጠንካሮች ስለሆናችሁ፣ የአምላክ ቃል በውስጣችሁ ስለሚኖርና ክፉውን ስላሸነፋችሁት ነው። 15  ዓለምንም ሆነ በዓለም ውስጥ ያሉትን ነገሮች አትውደዱ። ማንም ዓለምን የሚወድ ከሆነ የአብ ፍቅር በውስጡ የለም፤ 16  ምክንያቱም በዓለም ያለው ነገር ሁሉ ይኸውም የሥጋ ምኞት፣ የዓይን አምሮትና ኑሮዬ ይታይልኝ የሚል መንፈስ ከዓለም እንጂ ከአብ የሚመነጭ አይደለም። 17  ከዚህም በተጨማሪ ዓለምም ሆነ ምኞቱ በማለፍ ላይ ናቸው፤ የአምላክን ፈቃድ የሚያደርግ ግን ለዘላለም ይኖራል። 18  ልጆቼ ሆይ፣ ይህ የመጨረሻው ሰዓት ነው፤ እንደሰማችሁትም ፀረ ክርስቶስ እየመጣ ነው፤ አሁንም እንኳ ብዙ ፀረ ክርስቶሶች መጥተዋል፤ ከዚህም በመነሳት ይህ የመጨረሻው ሰዓት መሆኑን እንገነዘባለን። 19  ከእኛ መካከል ወጡ፤ ሆኖም ከእኛ ወገን አልነበሩም፤ ከእኛ ወገን ቢሆኑማ ኖሮ ከእኛ ጋር ጸንተው በኖሩ ነበር። ሆኖም ከእኛ ወገን የሆኑት ሁሉም አለመሆናቸው በግልጽ ይታይ ዘንድ ከእኛ ተለይተው ወጡ። 20  እናንተ ግን ቅዱስ ከሆነው ከእሱ የመንፈስ ቅብዓት አግኝታችኋል፤ ሁላችሁም እውቀት አላችሁ። 21  የምጽፍላችሁ እውነትን ስለማታውቁ ሳይሆን እውነትን ስለምታውቁና ከእውነት ምንም ዓይነት ውሸት ስለማይወጣ ነው። 22  ኢየሱስን፣ ክርስቶስ አይደለም ብሎ ከሚክድ በቀር ውሸታም ማን ነው? ይህ አብንና ወልድን የሚክደው ፀረ ክርስቶስ ነው። 23  ወልድን የሚክድ ሁሉ አብም የለውም። ወልድን አምኖ የሚቀበል አብም አለው። 24  በእናንተ በኩል ግን ከመጀመሪያ የሰማችሁት በውስጣችሁ ይኑር። ከመጀመሪያ የሰማችሁት በውስጣችሁ የሚኖር ከሆነ እናንተም ከወልድና ከአብ ጋር ያላችሁን አንድነት ጠብቃችሁ ትኖራላችሁ። 25  ከዚህም በተጨማሪ እሱ ራሱ ቃል የገባልን የተስፋ ቃል ይህ ነው፤ ይህም የዘላለም ሕይወት ነው። 26  እነዚህን ነገሮች የምጽፍላችሁ ሊያሳስቷችሁ የሚሞክሩትን ሰዎች በተመለከተ ነው። 27  እናንተ ግን ከእሱ የተቀበላችሁት የመንፈስ ቅብዓት በውስጣችሁ ይኖራል፤ በመሆኑም ማንም የሚያስተምራችሁ አያስፈልጋችሁም፤ ከዚህ ይልቅ ከእሱ ያገኛችሁት ይህ ቅብዓት ስለ ሁሉም ነገር እያስተማራችሁ ነው፤ ደግሞም እውነት እንጂ ውሸት አይደለም፤ ይህ ቅብዓት ባስተማራችሁ መሠረት ከእሱ ጋር ያላችሁን አንድነት ጠብቃችሁ ኑሩ። 28  እንግዲህ ልጆቼ፣ እሱ በሚገለጥበት ጊዜ የመናገር ነፃነት እንዲኖረንና እሱ በሚገኝበት* ወቅት ለኀፍረት ተዳርገን ከእሱ እንዳንርቅ ከእሱ ጋር ያላችሁን አንድነት ጠብቃችሁ ኑሩ። 29  እሱ ጻድቅ መሆኑን ካወቃችሁ ጽድቅን የሚያደርግ ሁሉ ከእሱ የተወለደ መሆኑን ታውቃላችሁ።

የግርጌ ማስታወሻዎች

1ዮሐ 2:1 * እዚህ ላይ የገባው የግሪክኛ ቃል በሆነ ጊዜ ላይ ለአፍታ የተፈጸመን ድርጊት የሚያመለክት ነው።
1ዮሐ 2:28 * ከተጨማሪው መረጃ ላይ 5ኛውን ርዕስ ተመልከት።