በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

1 ተሰሎንቄ 4:1-18

4  በመጨረሻም ወንድሞች፣ እንዴት መመላለስና አምላክን ማስደሰት እንዳለባችሁ ከእኛ ተምራችኋል፤ ደግሞም በዚሁ መንገድ እየተመላለሳችሁ ነው፤ በመሆኑም ይህንኑ ይበልጥ በተሟላ ሁኔታ ማድረጋችሁን እንድትቀጥሉ በጌታ ኢየሱስ እንጠይቃችኋለን እንዲሁም እናሳስባችኋለን።  ምክንያቱም በጌታ ኢየሱስ ሥልጣን የሰጠናችሁን መመሪያዎች ታውቃላችሁ።  የአምላክ ፈቃድ እንድትቀደሱ ይኸውም ከዝሙት እንድትርቁ  እንዲሁም ከእናንተ እያንዳንዱ የገዛ ራሱን ዕቃ እንዴት በቅድስናና በክብር መያዝ እንዳለበት እንዲያውቅ ነው፤  ይህም አምላክን እንደማያውቁት አሕዛብ ለፍትወተ ሥጋ በመጎምጀት አይሁን፤  በተጨማሪም ማንም ሰው በዚህ ጉዳይ ወንድሙን እስከመጉዳትና መብቶቹን እስከማሳጣት እንዳይደርስ ነው፤ ምክንያቱም አስቀድመን እንደነገርናችሁና በሚገባ እንደመሠከርንላችሁ በእነዚህ ነገሮች ሁሉ ላይ የቅጣት እርምጃ የሚወስደው ይሖዋ ነው።  አምላክ የጠራን ለቅድስና ነው እንጂ ለርኩሰት አይደለም።  እንግዲህ ንቀት የሚያሳይ ሰው የሚንቀው ሰውን ሳይሆን ቅዱስ መንፈሱን በእናንተ ውስጥ የሚያኖረውን አምላክን ነው።  ይሁን እንጂ እርስ በርሳችሁ እንድትዋደዱ እናንተ ራሳችሁ ከአምላክ የተማራችሁ ስለሆናችሁ የወንድማማች ፍቅርን በተመለከተ እንድንጽፍላችሁ አያስፈልግም፤ 10  ደግሞም በመላው መቄዶንያ ለሚገኙ ወንድሞች ሁሉ ይህን እያደረጋችሁ ነው። ሆኖም ወንድሞች፣ ይህን ይበልጥ በተሟላ ሁኔታ ማድረጋችሁን እንድትቀጥሉ እናሳስባችኋለን፤ 11  እንዲሁም ከዚህ በፊት እንዳዘዝናችሁ በጸጥታ ለመኖር፣ በሌሎች ሰዎች ጉዳይ ጣልቃ ላለመግባትና በገዛ እጃችሁ ለመሥራት እንድትጣጣሩ እናሳስባችኋለን፤ 12  ይህም በውጭ ባሉት ሰዎች ፊት ሥርዓት ባለው መንገድ እንድትመላለሱና ምንም ነገር የሚጎድላችሁ እንዳትሆኑ ነው። 13  በተጨማሪም ወንድሞች፣ ተስፋ እንደሌላቸው እንደ ሌሎቹ ሰዎች እንዳታዝኑ በሞት አንቀላፍተው ስላሉት ሳታውቁ እንድትቀሩ አንፈልግም። 14  ኢየሱስ እንደሞተና ከሞት እንደተነሳ የምናምን ከሆነ ከኢየሱስ ጋር አንድነት ኖሯቸው በሞት ያንቀላፉትንም አምላክ ከእሱ ጋር ያመጣቸዋል። 15  የይሖዋን ቃል መሠረት አድርገን የምንነግራችሁ ይህ ነው፤ ጌታ እስከሚገኝበት ጊዜ ድረስ በሕይወት የምንቆይ በሞት አንቀላፍተው ያሉትን በምንም መንገድ አንቀድምም፤ 16  ምክንያቱም ጌታ ራሱ በትእዛዝ ድምፅ፣ በመላእክት አለቃ ድምፅና በአምላክ መለከት ከሰማይ ይወርዳል፤ ከክርስቶስ ጋር አንድነት ኖሯቸው የሞቱትም ቀድመው ይነሳሉ። 17  ከዚያም በሕይወት የምንቆየው እኛ በአየር ላይ ከጌታ ጋር ለመገናኘት ከእነሱ ጋር በደመና እንነጠቃለን፤ በዚህም መንገድ ሁልጊዜ ከጌታ ጋር እንሆናለን። 18  ስለሆነም በእነዚህ ቃላት ሁልጊዜ እርስ በርሳችሁ ተጽናኑ።

የግርጌ ማስታወሻዎች