በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

1 ቆሮንቶስ 9:1-27

9  እኔ ነፃ ሰው አይደለሁም? እኔ ሐዋርያ አይደለሁም? እኔ ጌታችንን ኢየሱስን አላየሁትም? እናንተ በጌታ የሥራዬ ውጤት አይደላችሁም?  ለሌሎች ሐዋርያ ባልሆን እንኳ ለእናንተ ሐዋርያ እንደሆንኩ የተረጋገጠ ነው፤ ምክንያቱም እናንተ በጌታ የሐዋርያነቴ ማረጋገጫ ማኅተም ናችሁ።  ለሚመረምሩኝ የማቀርበው የመከላከያ መልስ የሚከተለው ነው:-  የመብላትና የመጠጣት መብት አለን፤ የለንም እንዴ?  እንደ ሌሎቹ ሐዋርያትና እንደ ጌታ ወንድሞች እንዲሁም እንደ ኬፋ አንዲት እህት አግብተን ይዘን የመዞር መብት የለንም?  ወይስ ሰብዓዊ ሥራ ከመሥራት የመታቀብ መብት የሌለን እኔና በርናባስ ብቻ ነን?  ለመሆኑ በራሱ ገንዘብ ወታደር ሆኖ የሚያገለግል ማን ነው? ወይን ተክሎ ፍሬውን የማይበላ ማን ነው? ወይስ መንጋ እየጠበቀ ከመንጋው ወተት የተወሰነ ድርሻ የማያገኝ ማን ነው?  ይህን የምለው በሰብዓዊ ደንብ ተመርኩዤ ነው? ሕጉስ ይህን አይልም?  ምክንያቱም በሙሴ ሕግ “እህል የሚያበራየውን በሬ አፉን አትሰር” ተብሎ ተጽፏል። አምላክ ይህን የተናገረው እንዲሁ ስለ በሬዎች በማሰብ ነው? 10  ወይስ እንዲህ ያለው ሙሉ በሙሉ ስለ እኛ በማሰብ ነው? እንዲህ ተብሎ የተጻፈው በእርግጥ ስለ እኛ ነው፤ ምክንያቱም አራሹ ድርሻ እንደሚኖረው ተስፋ በማድረግ እንዲያርስ፣ የሚያበራየውም ድርሻ እንደሚኖረው ተስፋ በማድረግ እንዲያበራይ ነው። 11  እኛ መንፈሳዊ ነገሮች ከዘራንላችሁ ለሥጋ የሚሆኑ ነገሮች ከእናንተ ብናጭድ ትልቅ ነገር መሆኑ ነው? 12  ሌሎች በእናንተ ላይ ይህ ሥልጣን ካላቸው እኛስ የበለጠ ሥልጣን አይኖረንም? ይሁንና እኛ በዚህ ሥልጣን አልተጠቀምንም፤ ከዚህ ይልቅ ስለ ክርስቶስ የሚሰበከውን ምሥራች የሚያደናቅፍ ነገር ላለመፍጠር ሁሉን ችለን እንኖራለን። 13  ቅዱስ አገልግሎት የሚያከናውኑት ሰዎች ከቤተ መቅደስ የሚያገኙትን ምግብ እንደሚመገቡ እንዲሁም ዘወትር በመሠዊያው የሚያገለግሉ ከመሠዊያው ጋር እንደሚካፈሉ አታውቁም? 14  በተመሳሳይም ምሥራቹን የሚያውጁ ሰዎች በምሥራቹ አማካኝነት በሚያገኙት ነገር እንዲኖሩ ጌታ ደንግጓል። 15  ይሁን እንጂ እኔ ከእነዚህ ዝግጅቶች በአንዱም አልተጠቀምኩም። እርግጥ ይህን የጻፍኩት እንዲህ ሊደረግልኝ ይገባል ለማለት አይደለም፤ ብሞት ይሻለኛልና፤ ማንም የምመካበትን ነገር ከንቱ ሊያደርግብኝ አይችልም! 16  አሁን ምሥራቹን እየሰበክሁ ብሆንም ለመኩራራት ምክንያት አይሆነኝም፤ ምክንያቱም እንዲህ የማድረግ ግዴታ ተጥሎብኛል። እንዲያውም ምሥራቹን ባልሰብክ ወዮልኝ! 17  ይህን በፈቃደኝነት ካከናወንኩ ሽልማት አለኝ፤ ይሁንና ግዴታ ሆኖብኝ የማደርገውም ከሆነ ዞሮ ዞሮ የመጋቢነት አደራ ተጥሎብኛል። 18  ታዲያ ሽልማቴ ምንድን ነው? ከምሥራቹ ጋር በተያያዘ መብቴን አላግባብ እንዳልጠቀምበት ምሥራቹን በምሰብክበት ጊዜ ምሥራቹን ያለ ክፍያ ማቅረብ ነው። 19  ከሰው ሁሉ ነፃ ብሆንም በተቻለ መጠን ብዙዎችን እማርክ ዘንድ ራሴን ለሁሉ ባሪያ አደረግኩ። 20  አይሁዳውያንን እማርክ ዘንድ ለአይሁዳውያን እንደ አይሁዳዊ ሆንኩ፤ እኔ ራሴ በሕግ ሥር ባልሆንም እንኳ በሕግ ሥር ያሉትን እማርክ ዘንድ በሕግ ሥር ላሉት በሕግ ሥር እንዳለሁ ሆንኩ። 21  በአምላክ ፊት ከሕግ ነፃ ያልሆንኩና በክርስቶስ ፊት በሕግ ሥር ያለሁ ብሆንም እንኳ ሕግ የሌላቸውን እማርክ ዘንድ ሕግ ለሌላቸው ሕግ እንደሌለኝ ሆንኩ። 22  ደካሞችን እማርክ ዘንድ ለደካሞች ደካማ ሆንኩ። በተቻለ መጠን የተወሰኑ ሰዎችን አድን ዘንድ ለሁሉም ዓይነት ሰዎች ሁሉንም ነገር ሆንኩ። 23  ምሥራቹን ከሌሎች ጋር እካፈል ዘንድ ለምሥራቹ ስል ሁሉን ነገር አደርጋለሁ። 24  በሩጫ ውድድር ሁሉም እንደሚሮጡ፣ ሽልማቱን ግን የሚያገኘው አንዱ ብቻ እንደሆነ አታውቁም? እናንተም ሽልማቱን እንድታገኙ በዚሁ ሁኔታ ሩጡ። 25  በተጨማሪም በውድድር የሚሳተፍ ማንኛውም ሰው በሁሉም ነገር ራሱን ይገዛል። እነሱ ይህን የሚያደርጉት የሚበሰብሰውን አክሊል ለማግኘት ሲሆን እኛ ግን የማይበሰብሰውን አክሊል ለማግኘት ነው። 26  ስለዚህ እኔ መድረሻውን እንደማያውቅ ሰው አልሮጥም፤ ቡጢዬን የምሰነዝረውም አየር ለመምታት አይደለም፤ 27  ከዚህ ይልቅ ለሌሎች ከሰበክሁ በኋላ እኔ ራሴ በሆነ መንገድ ተቀባይነት እንዳላጣ ሰውነቴን እየጎሰምኩ እንደ ባሪያ እንዲገዛልኝ አደርገዋለሁ።

የግርጌ ማስታወሻዎች