በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

1 ቆሮንቶስ 7:1-40

7  የጻፋችሁልኝን ጉዳይ በተመለከተ፣ አንድ ወንድ አንዲትን ሴት ባይነካ መልካም ነው፤  ይሁንና ዝሙት ስለተስፋፋ እያንዳንዱ ወንድ የራሱ ሚስት ትኑረው፤ እያንዳንዷም ሴት የራሷ ባል ይኑራት።  ባል ለሚስቱ የሚገባትን ያድርግላት፤ ሚስትም ብትሆን ለባሏ እንደዚሁ ታድርግለት።  ሚስት በራሷ አካል ላይ ሥልጣን የላትም፤ ሥልጣን ያለው ባሏ ነው፤ በተመሳሳይም ባል በራሱ አካል ላይ ሥልጣን የለውም፤ ሥልጣን ያላት ሚስቱ ናት።  ጊዜያችሁን ለጸሎት ለማዋል በማሰብ በጋራ ስምምነት ለተወሰነ ጊዜ ካልሆነ በስተቀር አንዳችሁ ለሌላው የሚገባውን አትከልክሉ፤ ራሳችሁን መግዛት አቅቷችሁ ሰይጣን እንዳይፈታተናችሁ እንደገና አብራችሁ ሁኑ።  ይሁን እንጂ ይህን ያልኩት እንዲህ ማድረግ እንደሚቻል ለመግለጽ ነው እንጂ ትእዛዝ ለመስጠት አይደለም።  ሆኖም ሰው ሁሉ እንደ እኔ ቢሆን ደስ ባለኝ ነበር። ነገር ግን እያንዳንዱ ሰው ከአምላክ ያገኘው የራሱ ስጦታ አለው፤ አንዱ አንድ ዓይነት ስጦታ ሲኖረው ሌላው ደግሞ ሌላ ዓይነት ስጦታ አለው።  ይሁንና ላላገቡና መበለት ለሆኑ እንደ እኔ ሆነው ቢኖሩ መልካም ነው እላለሁ።  ራሳቸውን መግዛት ካቃታቸው ግን ያግቡ፤ ምክንያቱም በስሜት ከመቃጠል ማግባት ይሻላል። 10  ላገቡት ሰዎች ይህን መመሪያ እሰጣለሁ፤ ይሁንና ይህ መመሪያ የጌታ እንጂ የእኔ አይደለም፤ ሚስት ከባሏ አትለይ፤ 11  ብትለይ ግን ሳታገባ ትኑር ወይም ከባሏ ትታረቅ፤ ባልም ሚስቱን መተው የለበትም። 12  ለሌሎች ደግሞ እንዲህ እላለሁ፤ ይህን የምለው እኔ እንጂ ጌታ አይደለም:- አንድ ወንድም አማኝ ያልሆነች ሚስት ካለችውና አብራው ለመኖር ከተስማማች አይተዋት፤ 13  እንዲሁም አማኝ ያልሆነ ባል ያላት ሴት ባሏ አብሯት ለመኖር ከተስማማ አትተወው። 14  ምክንያቱም አማኝ ያልሆነ ባል ከሚስቱ ጋር ባለው ዝምድና የተነሳ ተቀድሷል፤ አማኝ ያልሆነች ሚስትም ከወንድም ጋር ባላት ዝምድና የተነሳ ተቀድሳለች፤ እንዲህ ባይሆን ኖሮ ልጆቻችሁ ርኩሳን በሆኑ ነበር፤ አሁን ግን ቅዱሳን ናቸው። 15  ይሁንና አማኝ ያልሆነው ወገን መለየት ከፈለገ ይለይ፤ እንዲህ ያለ ሁኔታ በሚፈጠርበት ጊዜ አንድ ወንድም ወይም አንዲት እህት ምንም ዓይነት ግዴታ የለባቸውም፤ ይሁን እንጂ አምላክ የጠራችሁ ለሰላም ነው። 16  አንቺ ሚስት፣ ባልሽን ታድኚው እንደሆነ ምን ታውቂያለሽ? ወይስ አንተ ባል፣ ሚስትህን ታድን እንደሆነ ምን ታውቃለህ? 17  ብቻ እያንዳንዱ ሰው ይሖዋ በሰጠው ድርሻና አምላክ በጠራው መሠረት ይመላለስ። ለጉባኤዎችም ሁሉ ይህን መመሪያ እሰጣለሁ። 18  አንድ ሰው የተጠራው ተገርዞ እያለ ነው? ያልተገረዘ ለመምሰል አይሞክር። አንድ ሰው የተጠራው ሳይገረዝ ነው? ከሆነ አይገረዝ። 19  መገረዝ ምንም ማለት አይደለም፤ አለመገረዝም ቢሆን ምንም ማለት አይደለም፤ ዋናው ነገር የአምላክን ትእዛዛት መጠበቅ ነው። 20  እያንዳንዱ ሰው በተጠራበት ጊዜ የነበረበት ሁኔታ ምንም ይሁን ምን በዚያው ሁኔታ ይቀጥል። 21  የተጠራኸው ባሪያ እያለህ ነው? ይሄ አያስጨንቅህ፤ ሆኖም ነፃ መውጣት የምትችል ከሆነ አጋጣሚውን ተጠቀምበት። 22  ምክንያቱም ባሪያ እያለ የተጠራ በጌታ ያለ ሰው፣ ነፃ የሆነ የጌታ ሰው ነው፤ በተመሳሳይም ነፃ እያለ የተጠራ ሰው የክርስቶስ ባሪያ ነው። 23  በዋጋ ተገዝታችኋል፤ የሰው ባሪያ መሆናችሁ ይብቃ። 24  ወንድሞች፣ እያንዳንዱ ሰው በተጠራበት ጊዜ የነበረበት ሁኔታ ምንም ይሁን ምን ከአምላክ ጋር ያለው ዝምድና እንደተጠበቀ ሆኖ በተጠራበት ጊዜ በነበረው ሁኔታ ይቀጥል። 25  ድንግል የሆኑትን በተመለከተ ከጌታ የተቀበልኩት ትእዛዝ የለኝም፤ ይሁን እንጂ ጌታ ካሳየኝ ምሕረት የተነሳ እንደ ታማኝ ሰው የራሴን ሐሳብ እሰጣለሁ። 26  ስለዚህ አሁን ካለው አስገዳጅ ሁኔታ የተነሳ አንድ ሰው ባለበት ሁኔታ ቢቀጥል መልካም ይመስለኛል። 27  በሚስት ታስረሃል? ከሆነ መፈታትን አትሻ። ሚስት የሌለህ ነህ? ከሆነ ሚስት ለማግባት አትፈልግ። 28  ይሁንና ብታገባም ኃጢአት ይሆንብሃል ማለት አይደለም። እንዲሁም ድንግል የሆነ ሰው ቢያገባ ኃጢአት ይሆንበታል ማለት አይደለም። ይሁን እንጂ እንዲህ የሚያደርጉ በሥጋቸው ላይ መከራ ይደርስባቸዋል። ነገር ግን የእኔ ምኞት ከዚህ እንድትድኑ ነው። 29  ከዚህም በላይ ወንድሞች፣ የቀረው ጊዜ አጭር መሆኑን ልነግራችሁ እወዳለሁ። ስለዚህ ሚስት ያላቸው እንደሌላቸው ይሁኑ፤ 30  የሚያለቅሱም እንደማያለቅሱ፣ የሚደሰቱም እንደማይደሰቱ፣ የሚገዙም ምንም እንደሌላቸው 31  እንዲሁም በዓለም የሚጠቀሙ ሙሉ በሙሉ እንደማይጠቀሙበት ይሁኑ፤ ምክንያቱም የዚህ ዓለም ትእይንት እየተለዋወጠ ነው። 32  በመሆኑም ከጭንቀት ነፃ እንድትሆኑ እፈልጋለሁ። ያላገባ ሰው ጌታን እንዴት ደስ ማሰኘት እንደሚችል በማሰብ ስለ ጌታ ነገር ይጨነቃል። 33  ያገባ ሰው ግን ሚስቱን እንዴት ደስ ማሰኘት እንደሚችል በማሰብ ስለ ዓለም ነገር ይጨነቃል፤ 34  በመሆኑም ለሁለት ተከፍሏል። በተጨማሪም ያላገባች ሴት ወይም ድንግል በአካሏም ሆነ በመንፈሷ ቅዱስ መሆን ትችል ዘንድ ስለ ጌታ ነገር ትጨነቃለች። ይሁን እንጂ ያገባች ሴት ባሏን እንዴት ደስ ማሰኘት እንደምትችል በማሰብ ስለ ዓለም ነገር ትጨነቃለች። 35  ይህን እያልኩ ያለሁት ግን ለእናንተው ጥቅም ብዬ ነው እንጂ ማነቆ ውስጥ ላስገባችሁ አይደለም፤ ከዚህ ይልቅ ተስማሚ የሆነውን ነገር እንድታደርጉና ልባችሁ ሳይከፈል ዘወትር ጌታን እንድታገለግሉ ላነሳሳችሁ ብዬ ነው። 36  ይሁንና አንድ ሰው ከድንግልናው ጋር በሚስማማ ሁኔታ በአግባቡ መኖር ካልቻለ፣ በተለይ ደግሞ አፍላ የጉርምስና ዕድሜን ያለፈ ከሆነና ማግባቱ የሚመረጥ ከሆነ የፈለገውን ያድርግ፤ ኃጢአት አይሆንበትም። እንዲህ ያሉ ሰዎች ያግቡ። 37  ሆኖም አንድ ሰው ማግባት እንደማያስፈልገውና ራሱን መግዛት እንደሚችል ተሰምቶት ድንግልናውን ጠብቆ ለመኖር በልቡ ከወሰነና በዚህ ውሳኔው ለመጽናት በልቡ ከቆረጠ መልካም ያደርጋል። 38  በዚህ መሠረት ድንግልናውን በጋብቻ የሚሰጥም መልካም ያደርጋል፤ ሆኖም ሳያገባ ድንግልናውን ጠብቆ የሚኖር የተሻለ ያደርጋል። 39  አንዲት ሚስት ባሏ በሕይወት ባለበት ዘመን ሁሉ የታሰረች ናት። ባሏ በሞት ካንቀላፋ ግን በጌታ ብቻ ይሁን እንጂ የፈለገችውን ለማግባት ነፃ ናት። 40  እንደ እኔ ከሆነ ግን እንዳለች ብትቀጥል ይበልጥ ደስተኛ ትሆናለች። እኔ ደግሞ የአምላክ መንፈስ እንዳለኝ እርግጠኛ ነኝ።

የግርጌ ማስታወሻዎች