በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

1 ቆሮንቶስ 6:1-20

6  ከእናንተ መካከል አንዱ ሌላውን የሚከስበት ጉዳይ ቢኖረው፣ ጉዳዩን በቅዱሳን ፊት በማቅረብ ፋንታ በዓመፀኛ ሰዎች ፊት ለማቅረብ ፍርድ ቤት ለመሄድ ይደፍራል?  ወይስ ቅዱሳን በዓለም ላይ እንደሚፈርዱ አታውቁም? ታዲያ እናንተ በዓለም ላይ የምትፈርዱ ከሆነ በጣም ተራ የሆኑ ጉዳዮችን ለመዳኘት አትበቁም?  በመላእክት ላይ እንኳ እንደምንፈርድ አታውቁም? ታዲያ አሁን በሕይወት ውስጥ በሚያጋጥሙ ጉዳዮች ላይ ለምን አትፈርዱም?  አሁን በሕይወት ውስጥ የሚያጋጥሙ መዳኘት የሚያስፈልጋቸው ጉዳዮች ካሉ በጉባኤው የተናቁ ሰዎች እንዲዳኙት ታደርጋላችሁ?  ይህን የምለው እፍረት እንዲሰማችሁ ለማድረግ ብዬ ነው። ወንድሞቹን መዳኘት የሚችል አንድ እንኳ ጥበበኛ ሰው በመካከላችሁ የለም ማለት ነው?  አንድ ወንድም ሌላውን ወንድም ፍርድ ቤት ይወስዳል፤ ያውም የማያምኑ ሰዎች ፊት!  እንግዲህ እርስ በርስ ተካሳችሁ ፍርድ ቤት መሄዳችሁ ለእናንተ ትልቅ ሽንፈት ነው። ከዚህ ይልቅ እናንተ ራሳችሁ ብትበደሉ አይሻልም? ደግሞስ እናንተ ራሳችሁ ብትታለሉ አይሻልም?  እናንተ ግን ትበድላላችሁ እንዲሁም ታታልላላችሁ፤ ያውም የገዛ ወንድሞቻችሁን!  ለመሆኑ ዓመፀኞች የአምላክን መንግሥት እንደማይወርሱ አታውቁም? አትታለሉ። ሴሰኞችም ሆኑ ጣዖት አምላኪዎች ወይም አመንዝሮች ወይም ቀላጮች* ወይም ግብረ ሰዶም የሚፈጽሙ 10  ወይም ሌቦች ወይም ስግብግቦች ወይም ሰካራሞች ወይም ተሳዳቢዎች ወይም ቀማኞች የአምላክን መንግሥት አይወርሱም። 11  አንዳንዶቻችሁም እንደዚህ ነበራችሁ። ሆኖም በጌታችን በኢየሱስ ክርስቶስ ስምና በአምላካችን መንፈስ ታጥባችሁ ነጽታችኋል፣ ተቀድሳችኋል እንዲሁም ጻድቃን ተብላችሁ ተጠርታችኋል። 12  ሁሉም ነገር ተፈቅዶልኛል፤ ሆኖም ሁሉም ነገር ይጠቅማል ማለት አይደለም። ሁሉም ነገር ተፈቅዶልኛል፤ ሆኖም ለምንም ነገር ተገዢ መሆን አልሻም። 13  ምግብ ለሆድ፣ ሆድም ለምግብ ነው፤ አምላክ ግን ሁለቱንም ያጠፋቸዋል። ሰውነት ለጌታ ነው እንጂ ለዝሙት አይደለም፤ ጌታ ደግሞ ለሰውነት ነው። 14  ይሁን እንጂ አምላክ በኃይሉ አማካኝነት ጌታን እንዳስነሳው እኛንም ከሞት ያስነሳናል። 15  ሰውነታችሁ የክርስቶስ አካል ክፍል እንደሆነ አታውቁም? ታዲያ የክርስቶስን አካል ክፍል ወስጄ የጋለሞታ አካል ክፍል ላድርገው? ይህማ ፈጽሞ ሊሆን አይገባም! 16  ወይስ ከጋለሞታ ጋር የሚቆራኝ ከእሷ ጋር አንድ አካል እንደሚሆን አታውቁም? ምክንያቱም “ሁለቱም አንድ ሥጋ ይሆናሉ” ብሏል። 17  ሆኖም ከጌታ ጋር የሚቆራኝ ከእሱ ጋር አንድ መንፈስ ነው። 18  ከዝሙት ሽሹ። አንድ ሰው የሚፈጽመው ሌላ ኃጢአት ሁሉ ከአካሉ ውጪ ነው፤ ዝሙት የመፈጸም ልማድ ያለው ግን በራሱ አካል ላይ ኃጢአት እየሠራ ነው። 19  ለመሆኑ የእናንተ ሰውነት በውስጣችሁ ላለው መንፈስ ቅዱስ ቤተ መቅደስ እንደሆነ አታውቁም? ይህም መንፈስ ከአምላክ የተቀበላችሁት ነው። በተጨማሪም እናንተ የራሳችሁ አይደላችሁም፤ 20  ምክንያቱም በዋጋ ተገዝታችኋል። ስለዚህ በሰውነታችሁ አምላክን አክብሩ።

የግርጌ ማስታወሻዎች

1ቆሮ 6:9 * ግብረ ሰዶማውያን ሆነው የሴት ዓይነት ሚና ያላቸውን ወንዶች ያመለክታል።