በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

1 ቆሮንቶስ 15:1-58

15  አሁን ደግሞ ወንድሞች፣ የነገርኳችሁን የምሥራች ላስታውሳችሁ እወዳለሁ፤ ይህም የምሥራች እናንተም የተቀበላችሁትና ጸንታችሁ የቆማችሁበት ነው፤  በተጨማሪም ይህን የምሥራች አጥብቃችሁ የምትይዙ ከሆነ ከእኔ በሰማችሁት በዚህ ምሥራች አማካኝነት ትድናላችሁ፤ አለዚያ አማኝ የሆናችሁት በከንቱ ነው ማለት ነው።  እኔም የተቀበልኩትን ከሁሉ በላይ የሆነውን ነገር ለእናንተ አስተላልፌያለሁ፤ ይኸውም ቅዱሳን መጻሕፍት እንደሚሉት ክርስቶስ ስለ ኃጢአታችን ሞተ፤  ተቀበረም፤ ደግሞም ቅዱሳን መጻሕፍት እንደሚሉት በሦስተኛው ቀን ተነሳ፤  ለኬፋም ታየ፤ ከዚያም ለአሥራ ሁለቱ ታየ።  በኋላ ደግሞ በአንድ ጊዜ ከአምስት መቶ ለሚበልጡ ወንድሞች የታየ ሲሆን አብዛኞቹ እስካሁን በሕይወት አሉ፤ አንዳንዶቹ ግን በሞት አንቀላፍተዋል።  ከዚያም ለያዕቆብ ታየ፤ ቀጥሎም ለሐዋርያቱ በሙሉ ታየ፤  በመጨረሻ ደግሞ እንደ ጭንጋፍ ለምቆጠር ለእኔ ተገለጠልኝ።  እኔ የአምላክን ጉባኤ አሳድድ ስለነበር ከሐዋርያት ሁሉ የማንስና ሐዋርያ ተብዬ ልጠራ የማይገባኝ ነኝ። 10  ሆኖም አሁን የሆንኩትን ሆኜ የተገኘሁት በአምላክ ጸጋ ነው። አምላክ ለእኔ ያሳየው ጸጋም ከንቱ ሆኖ አልቀረም፤ ከዚህ ይልቅ ከሌሎቹ የበለጠ በትጋት ሠርቻለሁ፤ ይሁንና ይህን ያደረገው ከእኔ ጋር ያለው የአምላክ ጸጋ ነው እንጂ እኔ አይደለሁም። 11  ይሁን እንጂ እኔም ሆንኩ እነሱ የምንሰብከው በዚህ መንገድ ነው፤ እናንተም ያመናችሁት በዚህ መንገድ ነው። 12  ታዲያ ክርስቶስ ከሞት እንደተነሳ እየተሰበከ ከሆነ ከእናንተ መካከል አንዳንዶቹ እንዴት የሙታን ትንሣኤ የለም ይላሉ? 13  የሙታን ትንሣኤ ከሌለማ ክርስቶስም አልተነሳም ማለት ነዋ! 14  ክርስቶስ ካልተነሳ ደግሞ ስብከታችን ከንቱ ነው፤ እምነታችንም ከንቱ ነው። 15  ከዚህም በተጨማሪ ሙታን በእርግጥ የማይነሱ ከሆነ አምላክ ክርስቶስን ከሞት ስላላስነሳው ክርስቶስን አስነስቶታል ብለን ስንመሠክር ሐሰተኞች የአምላክ ምሥክሮች ሆነን ተገኝተናል ማለት ነው። 16  ምክንያቱም ሙታን የማይነሱ ከሆነ ክርስቶስም ከሞት አልተነሳም ማለት ነው። 17  ክርስቶስ ካልተነሳ ደግሞ እምነታችሁ ከንቱ ነው፤ አሁንም ገና ከነኃጢአታችሁ ናችሁ ማለት ነው። 18  እንዲያውም የክርስቶስ ደቀ መዛሙርት ሆነው በሞት ያንቀላፉትም ጠፍተዋል ማለት ነው። 19  በክርስቶስ ተስፋ ያደረግነው ለዚህ ሕይወት ብቻ ከሆነ ከሰው ሁሉ ይልቅ የምናሳዝን ነን። 20  እንደ እውነቱ ከሆነ ግን ክርስቶስ በሞት ካንቀላፉት በኩራት ሆኖ ከሞት ተነስቷል። 21  ሞት የመጣው በአንድ ሰው በኩል ስለሆነ የሙታን ትንሣኤም በአንድ ሰው በኩል ነው። 22  ምክንያቱም ሁሉም በአዳም እንደሚሞቱ ልክ እንደዚሁም ሁሉም በክርስቶስ ሕያው ይሆናሉ። 23  ሆኖም እያንዳንዱ በራሱ ተራ ይሆናል:- ክርስቶስ በኩራት ነው፤ በመቀጠል ደግሞ ክርስቶስ በሚገኝበት* ጊዜ የእሱ የሆኑት ሕያዋን ይሆናሉ። 24  ከዚያም መንግሥትን ሁሉ እንዲሁም ሥልጣንን ሁሉና ኃይልን አጥፍቶ መንግሥቱን ለአምላኩና ለአባቱ በሚያስረክብበት ጊዜ ፍጻሜ ይሆናል። 25  አምላክ ጠላቶችን ሁሉ ከእግሩ በታች እስኪያደርግለት ድረስ ንጉሥ ሆኖ ሊገዛ ይገባዋልና። 26  የመጨረሻው ጠላት የሆነው ሞት ይደመሰሳል። 27  ምክንያቱም አምላክ “ሁሉንም ነገር ከእግሩ በታች አስገዝቶለታል።” ሆኖም ‘ሁሉም ነገር ተገዝቷል’ ሲል ሁሉንም ነገር ካስገዛለት በስተቀር መሆኑ ግልጽ ነው። 28  ይሁንና ሁሉም ነገር ከተገዛለት በኋላ ወልድ ራሱ ሁሉን ነገር ላስገዛለት ራሱን ያስገዛል፤ ይህም አምላክ ለሁሉም ሁሉንም ነገር መሆን ይችል ዘንድ ነው። 29  አለዚያማ ሙታን ለመሆን በመጠመቅ ምን የሚያተርፉት ነገር ይኖራል? ሙታን ፈጽሞ የማይነሱ ከሆነ እነሱም ሙታን ለመሆን የሚጠመቁበት ምን ምክንያት አለ? 30  እኛስ ዘወትር ለአደጋ ተጋልጠን የምንኖረው ለምንድን ነው? 31  እኔ በየቀኑ ከሞት ጋር እጋፈጣለሁ። ይህም ወንድሞች፣ ከጌታችን ከክርስቶስ ኢየሱስ ጋር በተያያዘ በእናንተ የማገኘውን ደስታ ያህል የተረጋገጠ ነው። 32  እንደ ሰዎች በኤፌሶን ከአውሬዎች ጋር ከታገልኩ፣ እንዲህ ማድረጌ ለእኔ ምን ይጠቅመኛል? ሙታን የማይነሱ ከሆነማ “ነገ ስለምንሞት እንብላ፣ እንጠጣ።” 33  አትታለሉ። መጥፎ ጓደኝነት መልካሙን አመል ያበላሻል። 34  ጽድቅ የሆነውን በማድረግ ካላችሁበት ድንዛዜ ንቁ፤ ኃጢአትንም ልማድ አታድርጉ፤ ምክንያቱም አንዳንዶች ስለ አምላክ አያውቁም። ይህንም የምላችሁ ላሳፍራችሁ ብዬ ነው። 35  ይሁንና አንድ ሰው “ሙታን የሚነሱት እንዴት ነው? ከሞት የሚነሱትስ ምን ዓይነት አካል ይዘው ነው?” ይል ይሆናል። 36  አንተ ማስተዋል የጎደለህ! የምትዘራው መጀመሪያ ካልሞተ ሕያው ሊሆን አይችልም፤ 37  ስንዴም ሆነ ሌላ እህል፣ አንተ ስትዘራ የምትዘራው ዘሩን እንጂ የሚያድገውን አካል አይደለም፤ 38  ሆኖም አምላክ የፈለገውን አካል ይሰጠዋል፤ ለእያንዳንዱም ዘር የራሱን አካል ይሰጠዋል። 39  ሥጋ ሁሉ አንድ ዓይነት አይደለም፤ በመሆኑም የሰው ሥጋ አለ፣ የከብት ሥጋ አለ፤ የወፎች ሥጋ አለ እንዲሁም የዓሣ ሥጋ አለ። 40  በተጨማሪም ሰማያዊ አካላት አሉ፤ ምድራዊ አካላትም አሉ፤ ሆኖም የሰማያዊ አካላት ክብር አንድ ዓይነት ነው፤ የምድራዊ አካላት ክብር ደግሞ ሌላ ዓይነት ነው። 41  የፀሐይ ክብር አንድ ዓይነት ነው፤ የጨረቃ ክብር ደግሞ ሌላ ዓይነት ነው፤ የከዋክብት ክብርም ሌላ ዓይነት ነው፤ እንዲያውም የአንዱ ኮከብ ክብር ከሌላው ኮከብ ክብር ይለያል። 42  ስለዚህ የሙታን ትንሣኤም እንደዚሁ ነው። የሚዘራው የሚበሰብስ ነው፤ የሚነሳው የማይበሰብስ ነው። 43  የሚዘራው በውርደት ነው፤ የሚነሳው በክብር ነው። የሚዘራው በድካም ነው፤ የሚነሳው በኃይል ነው። 44  የሚዘራው ሥጋዊ አካል ነው፤ የሚነሳው መንፈሳዊ አካል ነው። ሥጋዊ አካል ካለ መንፈሳዊ አካልም አለ። 45  እንዲያውም “የመጀመሪያው ሰው አዳም ሕያው ነፍስ ሆነ” ተብሎ ተጽፏል። የኋለኛው አዳም ሕይወት የሚሰጥ መንፈስ ሆነ። 46  ይሁንና የመጀመሪያው መንፈሳዊው ሳይሆን ሥጋዊው ነው፤ በኋላ ደግሞ መንፈሳዊው ነው። 47  የመጀመሪያው ሰው ከምድር የተገኘና ከአፈር የተሠራ ነው፤ ሁለተኛው ሰው ደግሞ ከሰማይ ነው። 48  ከአፈር የተሠሩት ከአፈር እንደተሠራው ናቸው፤ ሰማያዊ የሆኑትም ከሰማይ እንደመጣው ናቸው። 49  ከአፈር የተሠራውን ሰው መልክ እንደለበስን ሁሉ የሰማያዊውንም መልክ እንለብሳለን። 50  ይሁን እንጂ ወንድሞች ይህን እነግራችኋለሁ፣ ሥጋና ደም የአምላክን መንግሥት አይወርስም፤ የሚበሰብሰውም የማይበሰብሰውን አይወርስም። 51  እነሆ፣ አንድ ቅዱስ ሚስጥር እነግራችኋለሁ:- በሞት የምናንቀላፋው ሁላችንም አይደለንም፤ ነገር ግን ሁላችንም እንለወጣለን፤ 52  የመጨረሻው መለከት በሚነፋበት ወቅት ድንገት፣ በቅጽበተ ዓይን እንለወጣለን። መለከት ይነፋል፤ ሙታንም የማይበሰብሱ ሆነው ይነሳሉ፤ እኛም እንለወጣለን። 53  ምክንያቱም ይህ የሚበሰብሰው የማይበሰብሰውን ሊለብስ ይገባዋል፤ ይህ ሟች የሆነው የማይሞተውን ሊለብስ ይገባዋል። 54  ሆኖም ይህ የሚበሰብሰው የማይበሰብሰውን ሲለብስና ይህ ሟች የሆነው የማይሞተውን ሲለብስ “ሞት ለዘላለም ተዋጠ” ተብሎ የተጻፈው ቃል ይፈጸማል። 55  “ሞት ሆይ፣ ድል የነሳኸው የት አለ? ሞት ሆይ፣ መንደፊያህ የት አለ?” 56  ሞት የሚያስከትለው መንደፊያ ኃጢአት ነው፤ የኃጢአት ኃይል ግን ሕጉ ነው። 57  ሆኖም አምላክ በጌታችን በኢየሱስ ክርስቶስ አማካኝነት ድል ስለሚያጎናጽፈን የተመሰገነ ይሁን! 58  ስለዚህ የተወደዳችሁ ወንድሞቼ፣ ጸንታችሁ ቁሙ፣ አትነቃነቁ፤ እንዲሁም ከጌታ ጋር በተያያዘ በትጋት የምታከናውኑት ሥራ ከንቱ አለመሆኑን አውቃችሁ ሁልጊዜ የጌታ ሥራ የበዛላችሁ ሁኑ።

የግርጌ ማስታወሻዎች

1ቆሮ 15:23 * ከተጨማሪው መረጃ ላይ 5ኛውን ርዕስ ተመልከት።