በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

1 ቆሮንቶስ 14:1-40

14  ፍቅርን ተከታተሉ፤ ሆኖም መንፈሳዊ ስጦታዎችን ይልቁንም ትንቢት የመናገር ስጦታን አጥብቃችሁ መፈለጋችሁን ቀጥሉ።  ምክንያቱም በልሳን የሚናገር ለአምላክ እንጂ ለሰው አይናገርም፤ በመንፈስ አማካኝነት ቅዱስ ሚስጥሮችን ቢናገርም እንኳ ማንም አይሰማውም።  ይሁን እንጂ ትንቢት የሚናገር በንግግሩ ሰዎችን ያንጻል፣ ያበረታታል እንዲሁም ያጽናናል።  በልሳን የሚናገር ራሱን ያንጻል፤ ትንቢት የሚናገር ግን ጉባኤን ያንጻል።  ሁላችሁም በልሳን ብትናገሩ እወድ ነበር፤ ሆኖም ትንቢት ብትናገሩ እመርጣለሁ። ደግሞም ትንቢት የሚናገር በልሳን ከሚናገር ይበልጣል። ምክንያቱም በልሳን የሚናገር የተናገረውን ካልተረጎመው ጉባኤው ሊታነጽ አይችልም።  አሁን ግን ወንድሞች፣ ወደ እናንተ መጥቼ ሚስጥርን በመግለጥ ወይም በእውቀት ወይም በትንቢት ወይም በትምህርት ካልነገርኳችሁ በስተቀር በልሳን ብነግራችሁ ምን እጠቅማችኋለሁ?  በተመሳሳይም እንደ ዋሽንትና በገና ያሉ ግዑዝ ነገሮች ድምፅ ያወጣሉ፤ ሆኖም የሚያወጡት የድምፅ ቃና ግልጽ የሆነ ልዩነት ከሌለው ከዋሽንቱም ሆነ ከበገናው የሚወጣው ዜማ እንዴት ይለያል?  ደግሞም መለከት ለመለየት የሚያስቸግር ድምፅ ቢያሰማ ለጦርነት ማን ይዘጋጃል?  ልክ እንደዚሁም በአንደበታችሁ ለመረዳት የማያስቸግር ቃል ካልተናገራችሁ ስለ ምን እየተናገራችሁ እንዳለ እንዴት ይታወቃል? እንዲህ ከሆነ ለነፋስ የምትናገሩ ትሆናላችሁ። 10  በዓለም ላይ ብዙ ዓይነት ቋንቋዎች አሉ፤ ሆኖም ትርጉም የሌለው ቋንቋ የለም። 11  እንግዲህ አንድ ሰው የሚናገረውን ቋንቋ ትርጉም ካላወቅኩ እኔ ለሚናገረው ሰው እንግዳ እሆንበታለሁ፤ እሱም ለእኔ እንግዳ ይሆንብኛል። 12  ስለዚህ እናንተም የመንፈስን ስጦታዎች እጅግ ስለምትፈልጉ ጉባኤው እንዲታነጽ እነዚህን ስጦታዎች በብዛት ለማግኘት ጥረት አድርጉ። 13  ስለሆነም በልሳን የሚናገር ሰው የሚናገረውን መተርጎም እንዲችል ይጸልይ። 14  ምክንያቱም በልሳን የምጸልይ ከሆነ የሚጸልየው የተቀበልኩት የመንፈስ ስጦታ ነው፤ አእምሮዬ ግን ፍሬ ቢስ ነው። 15  ታዲያ ምን ማድረግ ይሻላል? በመንፈስ ስጦታ እጸልያለሁ፤ ሆኖም በአእምሮዬም እጸልያለሁ። በመንፈስ ስጦታ በመዝሙር አወድሳለሁ፤ ሆኖም በአእምሮዬም በመዝሙር አወድሳለሁ። 16  እንዲህ ካልሆነ በመንፈስ ስጦታ ውዳሴ ብታቀርብ በተራው ሰው ቦታ ያለው ግለሰብ ምን እየተናገርክ እንዳለህ ስለማያውቅ ላቀረብከው ምስጋና እንዴት “አሜን” ሊል ይችላል? 17  እርግጥ አንተ ግሩም በሆነ መንገድ ምስጋና አቅርበህ ሊሆን ይችላል፤ ሌላው ሰው ግን እየታነጸበት አይደለም። 18  ከሁላችሁ የበለጠ በብዙ ልሳኖች ስለምናገር አምላክን አመሰግናለሁ። 19  ይሁንና በጉባኤ ውስጥ አሥር ሺህ ቃላት በልሳን ከምናገር ሌሎችን በቃል ማስተማር እችል ዘንድ አምስት ቃላት በአእምሮዬ ብናገር እመርጣለሁ። 20  ወንድሞች፣ በማስተዋል ችሎታችሁ እንደ ልጆች አትሁኑ፤ ለክፋት ግን ሕፃናት ሁኑ፤ ሆኖም በማስተዋል ችሎታችሁ የጎለመሳችሁ ሁኑ። 21  በሕጉ ላይ “‘በባዕዳን አንደበትና እንግዳ በሆኑ ሰዎች ቋንቋዎች ለዚህ ሕዝብ እናገራለሁ፤ እነሱ ግን በዚያን ጊዜም እንኳ አይሰሙኝም’ ይላል ይሖዋ” ተብሎ ተጽፏል። 22  በመሆኑም በልሳኖች መናገር ለአማኞች ሳይሆን አማኝ ላልሆኑት ምልክት ነው፤ ትንቢት መናገር ግን አማኝ ላልሆኑት ሳይሆን ለአማኞች ነው። 23  ስለዚህ ጉባኤው በሙሉ አንድ ላይ ተሰብስቦ ባለበት ወቅት ሁሉም በልሳኖች ቢናገሩና በዚህ መሃል ተራ ሰዎች ወይም አማኞች ያልሆኑ ቢገቡ እነዚህ ሰዎች አብደዋል አይሏችሁም? 24  ሆኖም ሁላችሁም ትንቢት እየተናገራችሁ ሳለ አማኝ ያልሆነ ወይም ተራ ሰው ቢገባ ሁላችሁም የምትናገሩት ቃል እንደ ወቀሳ ሆኖ የሚያገለግለው ከመሆኑም በላይ ራሱን በሚገባ እንዲመረምር ያነሳሳዋል፤ 25  በልቡም የተሰወረው ነገር ይገለጣል፤ በመሆኑም “አምላክ በእርግጥ በመካከላችሁ ነው” እያለ በፊቱ ተደፍቶ አምላክን ያመልካል። 26  እንግዲህ ወንድሞች፣ ምን ማድረግ ይሻላል? አንድ ላይ በምትሰበሰቡበት ጊዜ አንዱ የመዝሙር ስጦታ አለው፤ ሌላው የትምህርት ስጦታ አለው፤ ሌላው ሚስጥር የመግለጥ ስጦታ አለው፤ ሌላው የልሳን ስጦታ አለው፤ ሌላው ደግሞ የመተርጎም ስጦታ አለው። ሁሉም ነገር ለማነጽ ይሁን። 27  በልሳን የሚናገሩ ካሉ ከሁለት ወይም ቢበዛ ከሦስት አይብለጡ፤ በየተራም ይናገሩ፤ የሚናገሩትንም ሌላ ሰው ይተርጉም። 28  የሚተረጉም ሰው ከሌለ ግን በጉባኤ መካከል ዝም ይበሉና ለራሳቸውና ለአምላክ ይናገሩ። 29  በተጨማሪም ሁለት ወይም ሦስት ነቢያት ይናገሩ፤ ሌሎቹ ደግሞ ትርጉሙን ለመረዳት ይጣሩ። 30  ሆኖም አንድ ሰው እዚያ ተቀምጦ ሳለ ራእይ ቢገለጥለት የመጀመሪያው ተናጋሪ ዝም ይበል። 31  ምክንያቱም ሁሉም እንዲማሩና ሁሉም እንዲበረታቱ ሁላችሁም አንድ በአንድ ትንቢት መናገር ትችላላችሁ። 32  ለነቢያት የተሰጡት የመንፈስ ስጦታዎች ለነቢያት ይገዛሉ። 33  ምክንያቱም አምላክ የሰላም እንጂ የሁከት አምላክ አይደለም። በቅዱሳን ጉባኤዎች ሁሉ እንደሚደረገው 34  ሴቶች እንዲናገሩ ስላልተፈቀደላቸው በጉባኤ ውስጥ ዝም ይበሉ፤ ከዚህ ይልቅ ሕጉም እንደሚለው ይገዙ። 35  ማወቅ የሚፈልጉት ነገር ካለ የገዛ ባሎቻቸውን እቤት ይጠይቁ፤ ምክንያቱም ሴት በጉባኤ መካከል ብትናገር የሚያሳፍር ነው። 36  ለመሆኑ የአምላክ ቃል የመጣው ከእናንተ ነው? ወይስ የአምላክ ቃል የደረሰው ወደ እናንተ ብቻ ነው? 37  ነቢይ እንደሆነ ወይም የመንፈስ ስጦታ እንዳለው የሚያስብ ሰው ካለ እነዚህን እየጻፍኩላችሁ ያሉትን ነገሮች አምኖ ይቀበል፤ ምክንያቱም የጌታ ትእዛዛት ናቸው። 38  ይህን መረዳት የማይፈልግ ቢኖር ግን ሳይረዳው ይኖራል። 39  ስለዚህ ወንድሞቼ፣ ትንቢት የመናገርን ስጦታ አጥብቃችሁ ፈልጉ፤ ይሁንና በልሳኖች መናገርንም አትከልክሉ። 40  ሆኖም ሁሉም ነገር በአግባብና በሥርዓት ይሁን።

የግርጌ ማስታወሻዎች