በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

1 ቆሮንቶስ 10:1-33

10  እንግዲህ ወንድሞች፣ አባቶቻችን ሁሉ ከደመና በታች እንደነበሩና ሁሉም በባሕር መካከል እንዳለፉ ታውቁ ዘንድ እወዳለሁ፤  ሁሉም ከሙሴ ጋር በመተባበር በደመናውና በባሕሩ ተጠመቁ፤  ሁሉም አንድ ዓይነት መንፈሳዊ ምግብ ተመገቡ፤  በተጨማሪም ሁሉም አንድ ዓይነት መንፈሳዊ መጠጥ ጠጡ። ምክንያቱም ይከተላቸው ከነበረው መንፈሳዊ ዐለት ይጠጡ ነበር፤ ይህም ዐለት ክርስቶስን የሚያመለክት ነበር።  ይሁንና አምላክ በአብዛኞቹ ስላልተደሰተ በምድረ በዳ ወድቀው ቀርተዋል።  እነሱ እንደተመኟቸው እኛም ጎጂ የሆኑ ነገሮችን እንዳንመኝ እነዚህ ነገሮች ለእኛ ምሳሌ ሆነውልናል።  “ሕዝቡ ሊበሉና ሊጠጡ ተቀመጡ፤ ሊጨፍሩም ተነሱ” ተብሎ እንደተጻፈው ከእነሱ መካከል አንዳንዶቹ እንዳደረጉት ጣዖት አምላኪዎች አትሁኑ።  ከእነሱ አንዳንዶቹ ዝሙት ፈጽመው ከመካከላቸው ሃያ ሦስት ሺህ የሚሆኑት በአንድ ቀን እንደረገፉ እኛም ዝሙት የመፈጸም ልማድ አይጠናወተን።  ከእነሱ መካከል አንዳንዶቹ ይሖዋን ተፈታትነው በእባቦች እንደጠፉ እኛም አንፈታተነው። 10  በተጨማሪም ከእነሱ መካከል አንዳንዶቹ በማጉረምረማቸው በአጥፊው እንደጠፉ አጉረምራሚዎች አትሁኑ። 11  እነዚህ ነገሮች ምሳሌ ይሆኑ ዘንድ በእነሱ ላይ ደረሱ፤ የተጻፉትም የሥርዓቶቹ ፍጻሜ የደረሰብንን እኛን ለማስጠንቀቅ ነው። 12  በመሆኑም የቆመ የሚመስለው እንዳይወድቅ ይጠንቀቅ። 13  በሰው ሁሉ ላይ ከሚደርሰው ፈተና የተለየ ፈተና አልደረሰባችሁም። ይሁንና አምላክ ታማኝ ነው፤ ልትሸከሙት ከምትችሉት በላይ ፈተና እንዲደርስባችሁ አይፈቅድም፤ ከዚህ ይልቅ ፈተናውን በጽናት መቋቋም እንድትችሉ ከፈተናው ጋር መውጫ መንገዱን ያዘጋጅላችኋል። 14  ስለዚህ የተወደዳችሁ ወንድሞቼ፣ ከጣዖት አምልኮ ሽሹ። 15  የምናገረው ማስተዋል ላላቸው ሰዎች እንደምናገር አድርጌ ነው፤ የምናገረውን እናንተ ራሳችሁ ፍረዱ። 16  የምንባርከው የበረከት ጽዋ ከክርስቶስ ደም መካፈል አይደለም? የምንቆርሰውስ ቂጣ ከክርስቶስ አካል መካፈል አይደለም? 17  እኛ ብዙ ብንሆንም ቂጣው አንድ ስለሆነ አንድ አካል ነን፤ ምክንያቱም ሁላችንም የምንካፈለው ከዚሁ አንድ ቂጣ ነው። 18  በሥጋ እስራኤላውያን የሆኑትን እስቲ ተመልከቱ:- መሥዋዕቱን የሚበሉት ከመሠዊያው ጋር ተካፋዮች አይደሉም? 19  እንግዲህ ምን እያልኩ ነው? ለጣዖት የተሠዋ ነገር እርባና አለው ማለቴ ነው? ወይስ ጣዖት እርባና አለው ማለቴ ነው? 20  እንዲህ ማለቴ አይደለም፤ ከዚህ ይልቅ አሕዛብ መሥዋዕት አድርገው የሚያቀርቧቸውን ነገሮች የሚሠዉት ለአምላክ ሳይሆን ለአጋንንት ነው ማለቴ ነው፤ ከአጋንንት ጋር እንድትካፈሉ ደግሞ አልፈልግም። 21  የይሖዋን ጽዋና የአጋንንትን ጽዋ መጠጣት አትችሉም፤ “ከይሖዋ ማዕድ” እና ከአጋንንት ማዕድ መካፈል አትችሉም። 22  ወይስ “ይሖዋን እያስቀናነው ነው”? እኛ ከእሱ ይበልጥ ብርቱዎች አይደለንም፤ ነን እንዴ? 23  ሁሉም ነገር ተፈቅዷል፤ ሁሉም ነገር ይጠቅማል ማለት ግን አይደለም። ሁሉም ነገር ተፈቅዷል፤ ሁሉም ነገር ያንጻል ማለት ግን አይደለም። 24  እያንዳንዱ ሰው ዘወትር የራሱን ጥቅም ሳይሆን የሌላውን ሰው ጥቅም ይፈልግ። 25  ከሕሊናችሁ የተነሳ ምንም ጥያቄ ሳታነሱ በሥጋ ገበያ የሚሸጠውን ሁሉ ብሉ፤ 26  ምክንያቱም “ምድርና ምድርን የሞላት ነገር ሁሉ የይሖዋ ነው።” 27  አማኝ ካልሆኑት መካከል አንድ ሰው ቢጋብዛችሁና ግብዣውን ብትቀበሉ ከሕሊናችሁ የተነሳ ምንም ጥያቄ ሳታነሱ የቀረበላችሁን ሁሉ ብሉ። 28  ይሁንና አንድ ሰው “ይህ መሥዋዕት ሆኖ የቀረበ ነው” ቢላችሁ ይህን ለነገራችሁ ሰውና ለሕሊና ስትሉ አትብሉ። 29  “ሕሊና” ስል የእናንተን ሳይሆን የሌላውን ሰው ሕሊና ማለቴ ነው። ነፃነቴ በሌላው ሰው ሕሊና ለምን ይፈረድበት? 30  አመስግኜ የምበላ ከሆነ ባመሰገንኩበት ነገር ለምን እሰደባለሁ? 31  ስለዚህ ስትበሉም ሆነ ስትጠጡ ወይም ማንኛውንም ነገር ስታደርጉ ሁሉንም ነገር ለአምላክ ክብር አድርጉ። 32  ለአይሁዳውያንም ሆነ ለግሪካውያን እንዲሁም ለአምላክ ጉባኤ እንቅፋት ከመሆን ተቆጠቡ፤ 33  እኔ ብዙዎች እንዲድኑ የእነሱን እንጂ የራሴን ጥቅም ሳልፈልግ በማደርገው ነገር ሁሉ፣ ሁሉንም ሰው እንደማስደስት እናንተም እንዲሁ አድርጉ።

የግርጌ ማስታወሻዎች