በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

1 ቆሮንቶስ 1:1-31

1  በአምላክ ፈቃድ የኢየሱስ ክርስቶስ ሐዋርያ እንዲሆን ከተጠራው ከጳውሎስና ከወንድማችን ከሶስቴንስ፣  በቆሮንቶስ ለሚገኘው የአምላክ ጉባኤ ይኸውም ከክርስቶስ ኢየሱስ ጋር ባላችሁ አንድነት ለተቀደሳችሁ፣ እንዲሁም የእነሱም ሆነ የእኛ ጌታ የሆነውን የጌታችን የኢየሱስ ክርስቶስን ስም በየስፍራው ሆነው ከሚጠሩ ሁሉ ጋር ቅዱሳን ለመሆን ለተጠራችሁ:-  ከአባታችን ከአምላክና ከጌታችን ከኢየሱስ ክርስቶስ ጸጋና ሰላም ለእናንተ ይሁን።  በክርስቶስ ኢየሱስ ለእናንተ በሰጠው ጸጋ የተነሳ አምላክን ሁልጊዜ ስለ እናንተ አመሰግናለሁ፤  በሁሉም ነገር ይኸውም በመናገር ችሎታ ሁሉና በእውቀት ሁሉ በክርስቶስ በልጽጋችኋል፤  ምክንያቱም ስለ ክርስቶስ የተሰጠው ምሥክርነት በእናንተ መካከል በሚገባ ሥር ሰዷል፤  ስለዚህ የጌታችንን የኢየሱስ ክርስቶስን መገለጥ በጉጉት ስትጠባበቁ ማንኛውም ስጦታ ፈጽሞ አይጎድልባችሁም።  በተጨማሪም በጌታችን በኢየሱስ ክርስቶስ ቀን ከማንኛውም ክስ ነፃ መሆን ትችሉ ዘንድ እስከ መጨረሻው ያጸናችኋል።  ከልጁ ከጌታችን ከኢየሱስ ክርስቶስ ጋር ኅብረት እንዲኖራችሁ የጠራችሁ አምላክ ታማኝ ነው። 10  እንግዲህ ወንድሞች፣ ሁላችሁም ንግግራችሁ አንድ እንዲሆንና በመካከላችሁ መከፋፈል እንዳይኖር፣ ከዚህ ይልቅ በአስተሳሰብም ሆነ በዓላማ ፍጹም አንድነት እንዲኖራችሁ በጌታችን በኢየሱስ ክርስቶስ ስም አጥብቄ አሳስባችኋለሁ። 11  ወንድሞቼ ሆይ፣ በመካከላችሁ አለመግባባት እንዳለ ከቀሎኤ ቤተሰብ ሰምቻለሁ። 12  ይኸውም እያንዳንዳችሁ “እኔ የጳውሎስ ነኝ፣” “እኔ ግን የአጵሎስ ነኝ፣” “እኔ ደግሞ የኬፋ ነኝ፣” “እኔስ የክርስቶስ ነኝ” ትላላችሁ። 13  እንዲህ ከሆነ ክርስቶስ ተከፋፍሏል። ጳውሎስ ለእናንተ ተሰቅሏል እንዴ? ወይስ የተጠመቃችሁት በጳውሎስ ስም ነው? 14  ከቀርስጶስና ከጋይዮስ በስተቀር ከእናንተ አንዳችሁንም ባለማጥመቄ አምላክን አመሰግናለሁ፤ 15  በመሆኑም በእኔ ስም እንደተጠመቃችሁ አድርጎ ሊናገር የሚችል ማንም የለም። 16  እርግጥ የእስጢፋናስን ቤተሰብም አጥምቄያለሁ። ከእነዚህ ሌላ ግን ያጠመቅኩት ሰው መኖሩን አላስታውስም። 17  ክርስቶስ የላከኝ እንዳጠምቅ ሳይሆን ምሥራቹን እንዳውጅ ነው፤ የክርስቶስ የመከራ እንጨት* ከንቱ እንዳይሆን ምሥራቹን የማውጀው በንግግር ጥበብ አይደለም። 18  ስለ መከራው እንጨት የሚነገረው መልእክት ወደ ጥፋት እያመሩ ላሉት ሞኝነት፣ ወደ መዳን በሚወስደው ጎዳና ላይ ላለነው ለእኛ ግን የአምላክ ኃይል መገለጫ ነው። 19  “የጠቢባንን ጥበብ አጠፋለሁ፤ የሊቃውንትንም ማስተዋል ወዲያ እጥላለሁ” ተብሎ ተጽፏልና። 20  የዚህ ሥርዓት ጥበበኞች የት አሉ? ጸሐፍትስ የት አሉ? ተሟጋቾችስ የት አሉ? አምላክ የዓለምን ጥበብ ሞኝነት አላደረገም? 21  ዓለም በራሱ ጥበብ አምላክን ሊያውቀው ስላልቻለ አምላክ በጥበቡ፣ እንደ ሞኝነት በሚቆጠረው እየተሰበከ ባለው መልእክት አማካኝነት የሚያምኑትን ሰዎች ማዳን መልካም ሆኖ አግኝቶታል። 22  አይሁዳውያን ተአምራዊ ምልክቶች ማየት ይፈልጋሉ፤ ግሪካውያን ደግሞ ጥበብን ይሻሉ፤ 23  እኛ ግን የተሰቀለውን ክርስቶስን እንሰብካለን፤ ይህም ለአይሁዳውያን መሰናክል ለአሕዛብ ደግሞ ሞኝነት ነው፤ 24  ይሁን እንጂ ለተጠሩት፣ ለአይሁዳውያንም ሆነ ለግሪካውያን ክርስቶስ የአምላክ ኃይልና የአምላክ ጥበብ ነው። 25  ምክንያቱም የአምላክ ሞኝነት ነው ተብሎ የሚታሰበው ነገር ከሰዎች ጥበብ ይበልጣል፤ የአምላክ ደካማነት ነው ተብሎ የሚታሰበው ነገር ደግሞ ከሰዎች ብርታት ይበልጣል። 26  ወንድሞች፣ ከራሳችሁ ሁኔታ መረዳት እንደምትችሉት በሰብዓዊ አመለካከት ጥበበኞች የሆኑ ብዙዎች፣ ኃያላን የሆኑ ብዙዎች እንዲሁም ከትልቅ ቤተሰብ የተወለዱ ብዙዎች አልተጠሩም፤ 27  ከዚህ ይልቅ አምላክ ጥበበኛ ሰዎችን ያሳፍር ዘንድ የዓለምን ሞኝ ነገር መረጠ፤ ብርቱውንም ነገር ያሳፍር ዘንድ የዓለምን ደካማ ነገር መረጠ፤ 28  አምላክ በሰዎች ዘንድ ትልቅ ግምት የሚሰጠውን ነገር ከንቱ ያደርግ ዘንድ የዓለምን የተዋረደና የተናቀ ነገር እንዲሁም ከንቱ መስሎ የሚታየውን ነገር መረጠ፤ 29  ይህንም ያደረገው ሥጋ ለባሽ ሁሉ በአምላክ ፊት እንዳይመካ ነው። 30  ከክርስቶስ ኢየሱስ ጋር ኅብረት ሊኖራችሁ የቻለው በእሱ ምክንያት ነው፤ ክርስቶስ ደግሞ ለእኛ ከአምላክ የመጣ ጥበብ፣ ጽድቅና ቅድስና ሆኖልናል፤ እንዲሁም በቤዛው ነፃ አውጥቶናል፤ 31  ይህም “የሚመካ በይሖዋ ይመካ” ተብሎ እንደተጻፈው ይሆን ዘንድ ነው።

የግርጌ ማስታወሻዎች

1ቆሮ 1:17 * ከተጨማሪው መረጃ ላይ 6ኛውን ርዕስ ተመልከት።