በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ፊልጵስዩስ 3:1-21

3  በመጨረሻም ወንድሞቼ፣ በጌታ መደሰታችሁን ቀጥሉ። እነዚያኑ ነገሮች ደግሜ ብጽፍላችሁ እኔን አይታክተኝም፤ ለእናንተ ደኅንነት ግን ጠቃሚ ነው።  ከውሾች ተጠንቀቁ፤ ጎጂ ነገር ከሚያደርጉ ሰዎች ተጠንቀቁ፤ ሥጋን ከሚቆርጡ* ሰዎች ተጠንቀቁ።  ምክንያቱም በአምላክ መንፈስ፣ ቅዱስ አገልግሎት የምናቀርብና በክርስቶስ ኢየሱስ የምንኮራ እንዲሁም በሥጋ የማንመካ እኛ፣ እውነተኛውን ግርዘት ተገርዘናል፤  ይሁንና በሥጋም የምመካበት ነገር አለኝ የሚል ማንም ቢኖር ያ ሰው እኔ ነኝ። በሥጋ የሚመካበት ነገር እንዳለው አድርጎ የሚያስብ ሌላ ማንም ሰው ቢኖር እኔ እበልጣለሁ:-  በስምንተኛው ቀን የተገረዝኩ፣ ከእስራኤል ዘር፣ ከቢንያም ነገድ የተገኘሁ ስሆን ከዕብራውያን የተወለድኩ ዕብራዊ ነኝ፤ ስለ ሕግ ከተነሳ ፈሪሳዊ ነበርኩ፤  ስለ ቅንዓት ከተነሳ በጉባኤው ላይ ስደት አደርስ ነበር፤ ሕጉን በመታዘዝ ስለሚገኘው ጽድቅ ከተነሳ ደግሞ እንከን የማይገኝብኝ መሆኔን አስመሥክሬያለሁ።  ሆኖም ለእኔ ትርፍ የነበረውን ነገር ሁሉ ለክርስቶስ ስል እንደ ኪሳራ ቆጥሬዋለሁ።  አዎ፣ ደግሞም ስለ ጌታዬ ስለ ክርስቶስ ኢየሱስ ከሚገልጸው የላቀ ዋጋ ያለው እውቀት የተነሳ ሁሉንም ነገር እንደ ኪሳራ እቆጥረዋለሁ። ለእሱ ስል ሁሉንም ነገር አጥቻለሁ፤ ያጣሁትንም ነገር ሁሉ እንደ ጉድፍ እቆጥረዋለሁ፤ ይህም ክርስቶስን አገኝ ዘንድ  እንዲሁም ሕግ በመጠበቅ የሚገኝ የራሴ ጽድቅ ኖሮኝ ሳይሆን በክርስቶስ ላይ በማመን የሚገኘውን ጽድቅ ይኸውም በእምነት ላይ የተመሠረተውን ከአምላክ የሚመነጭ ጽድቅ በማግኘት ከክርስቶስ ጋር አንድነት ያለኝ ሆኜ እገኝ ዘንድ ነው፤ 10  ይህም እሱንና የትንሣኤውን ኃይል እንዳውቅ እንዲሁም እሱ ለሞተው ዓይነት ሞት ራሴን አሳልፌ በመስጠት የሥቃዩ ተካፋይ እሆን ዘንድ ነው፤ 11  በተጨማሪም ቀዳሚ የሆነውን የሙታን ትንሣኤ በሆነ መንገድ ማግኘት እችል እንደሆነ አይ ዘንድ ነው። 12  አሁን ይህን አግኝቻለሁ ወይም አሁን ወደ ፍጽምና ደረጃ እንድደርስ ተደርጌያለሁ ማለት አይደለም፤ ነገር ግን ክርስቶስ ኢየሱስ እኔን የራሱ ያደረገበትን ያን ነገር የራሴ ማድረግ እችል እንደሆነ ለማየት ጥረት እያደረግኩ ነው። 13  ወንድሞች፣ እኔ ገና እንደያዝኩት አድርጌ ራሴን አልቆጥርም፤ ነገር ግን አንድ የማደርገው ነገር አለ:- ከኋላዬ ያሉትን ነገሮች እየረሳሁ ከፊቴ ወዳሉት ነገሮች እንጠራራለሁ፤ 14  አምላክ በክርስቶስ ኢየሱስ በኩል የሚሰጠውን የላይኛውን ጥሪ ሽልማት አገኝ ዘንድ ግቡ ላይ ለመድረስ እየተጣጣርኩ ነው። 15  እንግዲህ የጎለመስን እኛ ሁላችን ይህ አስተሳሰብ ይኑረን፤ በማንኛውም ረገድ ከዚህ የተለየ ሐሳብ ቢኖራችሁ አምላክ ትክክለኛውን አስተሳሰብ ይገልጥላችኋል። 16  ያም ሆነ ይህ ምንም ያህል እድገት ያደረግን ብንሆን በዚሁ ልማድ በአግባቡ ወደፊት መጓዛችንን እንቀጥል። 17  ወንድሞች፣ ሁላችሁም በአንድነት የእኔን ምሳሌ የምትከተሉ ሁኑ፤ እንዲሁም እኛ ከተውንላችሁ ምሳሌ ጋር በሚስማማ መንገድ የሚመላለሱትን ሁሉ ልብ ብላችሁ ተመልከቱ። 18  ምክንያቱም የክርስቶስ የመከራ እንጨት* ጠላቶች ሆነው የሚመላለሱ ብዙዎች አሉ፤ ከዚህ በፊት ደጋግሜ እጠቅሳቸው ነበር፤ ሆኖም አሁን በእንባ ጭምር እጠቅሳቸዋለሁ፤ 19  መጨረሻቸው ጥፋት ነው፤ የእነሱ አምላክ ሆዳቸው ነው፤ ሊያፍሩበት በሚገባው ነገር ይኩራራሉ፤ አእምሯቸው ደግሞ ያተኮረው በምድራዊ ነገሮች ላይ ነው። 20  እኛ ግን የሰማይ ዜጎች ነን፤ ከዚያ የሚመጣውንም አዳኝ ይኸውም ጌታ ኢየሱስ ክርስቶስን በጉጉት እንጠባበቃለን፤ 21  እሱም ሁሉንም ነገር ለራሱ ሊያስገዛበት በሚችልበት ኃይሉ አማካኝነት ክቡር አካሉን እንዲመስል የተዋረደውን አካላችንን በአዲስ መልክ ይሠራዋል።

የግርጌ ማስታወሻዎች

ፊልጵ 3:2 * “የግርዘት ልማድን ከሚደግፉ” ማለት ነው።
ፊልጵ 3:18 * ከተጨማሪው መረጃ ላይ 6ኛውን ርዕስ ተመልከት።