በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

ፊልጵስዩስ 1:1-30

1  የክርስቶስ ኢየሱስ ባሪያዎች ከሆኑት ከጳውሎስና ከጢሞቴዎስ በፊልጵስዩስ ለሚገኙ፣ ሽማግሌዎችንና የጉባኤ አገልጋዮችን ጨምሮ ከክርስቶስ ኢየሱስ ጋር አንድነት ላላቸው ቅዱሳን ሁሉ:-  አባታችን ከሆነው አምላክና ከጌታ ኢየሱስ ክርስቶስ ጸጋና ሰላም ለእናንተ ይሁን።  እናንተን ባስታወስኩ ቁጥር ምንጊዜም አምላኬን አመሰግናለሁ፤  ይህንም የማደርገው ስለ ሁላችሁ ምልጃ ባቀረብኩ ጊዜ ሁሉ ነው፤ ደግሞም ምልጃ የማቀርበው በደስታ ነው፤  ምክንያቱም ከመጀመሪያው ቀን አንስቶ እስከዚህ ጊዜ ድረስ ለምሥራቹ አስተዋጽኦ ስታደርጉ ቆይታችኋል።  በእናንተ መካከል መልካም ሥራ የጀመረው እሱ ሥራውን እስከ ኢየሱስ ክርስቶስ ቀን ድረስ ወደ ፍጻሜ እንደሚያደርሰው ስለዚህ ነገር እርግጠኛ ነኝ።  በእስራቴም ሆነ ለምሥራቹ ስሟገትና በሕግ የጸና እንዲሆን ለማድረግ ስጥር ሁላችሁም ከእኔ ጋር የጸጋው ተካፋዮች በመሆናችሁ የተነሳ በልቤ ውስጥ ስላላችሁ፣ ስለ እናንተ ስለ ሁላችሁ እንዲህ ብዬ ማሰቤ ሙሉ በሙሉ ትክክል ነው።  ክርስቶስ ኢየሱስ ባለው ዓይነት ጥልቅ ፍቅር እናንተን ሁላችሁንም ምን ያህል እንደምናፍቃችሁ አምላክ ምሥክሬ ነው።  ፍቅራችሁ ከትክክለኛ እውቀትና ከጥልቅ ማስተዋል ጋር ከጊዜ ወደ ጊዜ እየበዛ እንዲሄድ መጸለዬን እቀጥላለሁ፤ 10  ይኸውም ይበልጥ አስፈላጊ የሆኑትን ነገሮች ለይታችሁ በማወቅ እስከ ክርስቶስ ቀን ድረስ እንከን የማይገኝባችሁ እንድትሆኑና ሌሎችን እንዳታሰናክሉ 11  እንዲሁም ለአምላክ ክብርና ምስጋና በኢየሱስ ክርስቶስ በኩል በሚገኘው የጽድቅ ፍሬ እንድትሞሉ ነው። 12  እንግዲህ ወንድሞች፣ በእኔ ላይ የደረሱት ነገሮች ለምሥራቹ እንቅፋት ከመሆን ይልቅ ይበልጥ እንዲስፋፋ አስተዋጽኦ እንዳደረጉ እንድታውቁ እወዳለሁ፤ 13  በመሆኑም ከክርስቶስ ጋር በተያያዘ መታሰሬ በንጉሠ ነገሥቱ የክብር ዘብ ሁሉና በቀሩትም ሁሉ ዘንድ በይፋ ታውቋል፤ 14  እንዲሁም ጌታን የሚያገለግሉ አብዛኞቹ ወንድሞች በእኔ መታሰር ምክንያት የልበ ሙሉነት ስሜት አድሮባቸው የአምላክን ቃል ያለ ፍርሃት ለመናገር ከቀድሞው የበለጠ ድፍረት እያሳዩ ነው። 15  እርግጥ፣ አንዳንዶች ክርስቶስን እየሰበኩ ያሉት በቅናትና በፉክክር መንፈስ ነው፤ ይሁንና ሌሎች ይህን እያደረጉ ያሉት በበጎ ፈቃድ ነው። 16  እነዚህ እኔ እዚህ ያለሁት ለምሥራቹ ለመሟገት እንደሆነ ስለሚያውቁ ስለ ክርስቶስ የሚያውጁት በፍቅር ተነሳስተው ነው፤ 17  እነዚያ ግን በእስራቴ ላይ መከራ ሊያመጡብኝ ስላሰቡ ይህን የሚያደርጉት በቅን ልቦና ሳይሆን በምቀኝነት ተነሳስተው ነው። 18  ታዲያ ይህ ምን አስከተለ? በማስመሰልም ሆነ በእውነት፣ በሁሉም መንገድ ክርስቶስ እየታወጀ ከመሆኑ በቀር ምንም ያስከተለው ነገር የለም፤ በዚህ ደግሞ ደስተኛ ነኝ። ወደፊትም ቢሆን መደሰቴን እቀጥላለሁ፤ 19  ምክንያቱም ይህ በእናንተ ምልጃና በማገኘው የኢየሱስ ክርስቶስ መንፈስ አማካኝነት መዳን እንደሚያስገኝልኝ አውቃለሁ፤ 20  ይህም በጉጉት ከምጠባበቀው ነገርና ከተስፋዬ ጋር በሚስማማ ሁኔታ በማንኛውም መንገድ እንዳላፍር ነው፤ ከዚህ ይልቅ እንደ ወትሮው ሁሉ አሁንም አፌን ሞልቼ በነፃነት በመናገር በሕይወትም ሆነ በሞት ክርስቶስን በሰውነቴ አማካኝነት ከፍ ከፍ አደርገው ዘንድ ነው። 21  ምክንያቱም ለእኔ መኖር ማለት ለክርስቶስ መኖር ማለት ነው፤ መሞት ደግሞ ማትረፍ ነው። 22  በሥጋ መኖሬን የምቀጥል ከሆነ ይህ የሥራዬ ፍሬ ነው፤ ይሁንና የትኛውን ነገር እንደምመርጥ አላሳውቅም። 23  በእነዚህ ሁለት ነገሮች አጣብቂኝ ውስጥ ገብቻለሁ፤ የምመኘው ግን ነፃ መለቀቅንና ከክርስቶስ ጋር መሆንን ነው፤ እርግጡን ለመናገር ይህ እጅግ የተሻለ ነውና። 24  ይሁን እንጂ ለእናንተ ሲባል በሥጋ መኖሬ ይበልጥ አስፈላጊ ነው። 25  በመሆኑም በዚህ ስለምተማመን እድገት እንድታደርጉና የእምነታችሁ ክፍል የሆነውን ደስታ እንድታገኙ ስል በሥጋ እንደምቆይና ከሁላችሁም ጋር እንደምኖር አውቃለሁ፤ 26  ይህም ዳግመኛ ከእናንተ ጋር በመገኘቴ በእኔ ምክንያት ከክርስቶስ ኢየሱስ ጋር በተያያዘ ደስታችሁ ይትረፈረፍ ዘንድ ነው። 27  ብቻ አኗኗራችሁ ስለ ክርስቶስ ከሚገልጸው ምሥራች ጋር የሚስማማ ይሁን፤ ይህም መጥቼ ባያችሁም ሆነ ከእናንተ ብርቅ እናንተን ስለሚመለከቱ ጉዳዮች ይኸውም አንድ ላይ ሆናችሁ ለምሥራቹ እምነት በአንድ ነፍስ በመጋደል በአንድ መንፈስ ጸንታችሁ መቆማችሁን 28  እንዲሁም በምንም መንገድ በጠላቶቻችሁ አለመሸበራችሁን እሰማ ዘንድ ነው። ይህ ነገር እነሱ እንደሚጠፉ እናንተ ግን እንደምትድኑ የሚያሳይ ማስረጃ ነው፤ ይህም አምላክ የሰጠው ምልክት ነው፤ 29  ምክንያቱም እናንተ በክርስቶስ እንድታምኑ ብቻ ሳይሆን ለእሱ ስትሉ መከራ እንድትቀበሉም መብት ተሰጥቷችኋል። 30  በመሆኑም በእኔ ሁኔታ ያያችሁትንና አሁንም እያደረግኩት እንዳለ የሰማችሁትን ያንኑ ትግል እናንተም እያደረጋችሁ ነው።

የግርጌ ማስታወሻዎች