በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

ገላትያ 6:1-18

6  ወንድሞች፣ አንድ ሰው ሳያውቅ የተሳሳተ እርምጃ ቢወስድ እንኳ መንፈሳዊ ብቃት ያላችሁ እናንተ እንዲህ ዓይነቱን ሰው በገርነት መንፈስ ለማስተካከል ጥረት አድርጉ፤ ይህን ስታደርጉ እናንተም ፈተና ላይ እንዳትወድቁ እያንዳንዳችሁ ለራሳችሁ ተጠንቀቁ።  አንዳችሁ የሌላውን ከባድ ሸክም ተሸከሙ፤ በዚህ መንገድም የክርስቶስን ሕግ ፈጽሙ።  አንድ ሰው ራሱን ከፍ አድርጎ የሚመለከትበት ምንም ነገር ሳይኖረው ራሱን ከፍ አድርጎ የሚመለከት ከሆነ ራሱን እያታለለ ነው።  ከዚህ ይልቅ እያንዳንዱ ሰው የራሱን ሥራ ምንነት ፈትኖ ያሳይ፤ ከዚያም ራሱን ከሌላ ሰው ጋር ሳያነጻጽር ከራሱ ጋር ብቻ በተያያዘ የሚመካበት ነገር ያገኛል።  ምክንያቱም እያንዳንዱ የራሱን የኃላፊነት ሸክም ይሸከማል።  ከዚህም በተጨማሪ ቃሉን፣ በቃል በመማር ላይ ያለ ማንኛውም ሰው ይህን የቃል ትምህርት ከሚያስተምረው ሰው ጋር መልካም ነገሮችን ሁሉ ይካፈል።  አትታለሉ:- አምላክ አይዘበትበትም። አንድ ሰው ምንም ዘራ ምን ያንኑ መልሶ ያጭዳል፤  ምክንያቱም ለሥጋው ብሎ የሚዘራ ከሥጋው መበስበስን ያጭዳል፤ ለመንፈስ ብሎ የሚዘራ ግን ከመንፈስ የዘላለም ሕይወት ያጭዳል።  ካልታከትን ወቅቱ ሲደርስ ስለምናጭድ ተስፋ ቆርጠን መልካም ሥራ መሥራታችንን አንተው። 10  እንግዲያው ይህን ለማድረግ የሚያስችል አመቺ ጊዜ እስካገኘን ድረስ ለሁሉም፣ በተለይ ደግሞ በእምነት ለሚዛመዱን ሰዎች መልካም ነገር እናድርግ። 11  በራሴ እጅ እንዴት ባሉ ትልልቅ ፊደላት እንደጻፍኩላችሁ ተመልከቱ። 12  እንድትገረዙ ሊያስገድዷችሁ የሚሞክሩት በሥጋዊ ሁኔታ ተቀባይነት ለማግኘት የሚፈልጉ ሁሉ ናቸው፤ ይህንም የሚያደርጉት በክርስቶስ ኢየሱስ የመከራ እንጨት* ሳቢያ ስደት እንዳይደርስባቸው ነው። 13  እነሱ እንድትገረዙ የሚፈልጉት በሥጋችሁ ለመኩራራት ብለው ነው እንጂ የተገረዙት ራሳቸውም እንኳ ሕጉን አይጠብቁም። 14  በጌታችን በኢየሱስ ክርስቶስ የመከራ እንጨት ካልሆነ በስተቀር በሌላ ነገር ፈጽሞ አልኩራራም፤ በዚህ የመከራ እንጨት አማካኝነት በእኔ አመለካከት ዓለም ተሰቅሏል፤ በዓለም አመለካከት ደግሞ እኔ ተሰቅያለሁ። 15  መገረዝም ሆነ አለመገረዝ ምንም አይጠቅምም፤ ከዚህ ይልቅ የሚጠቅመው አዲስ ፍጥረት መሆን ነው። 16  ይህን የሥነ ምግባር መሥፈርት በመከተል በሥርዓት በሚመላለሱ ሁሉ ይኸውም በአምላክ እስራኤል ላይ ሰላምና ምሕረት ይሁን። 17  የኢየሱስ ባሪያ መሆኔን የሚያሳይ መለያ ምልክት በሰውነቴ ላይ ስላለ ከእንግዲህ ወዲህ ማንም አያስቸግረኝ። 18  ወንድሞች፣ የጌታችን የኢየሱስ ክርስቶስ ጸጋ ከምታሳዩት መንፈስ ጋር ይሁን። አሜን።

የግርጌ ማስታወሻዎች

ገላ 6:12 * ከተጨማሪው መረጃ ላይ 6ኛውን ርዕስ ተመልከት።