በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ገላትያ 2:1-21

2  ከዚያም ከአሥራ አራት ዓመት በኋላ ከበርናባስ ጋር ዳግመኛ ወደ ኢየሩሳሌም ወጣሁ፤ ቲቶንም ከእኔ ጋር ይዤው ሄጄ ነበር።  ሆኖም የሄድኩት በተገለጠልኝ ራእይ መሠረት ነው። በአሕዛብ መካከል እየሰበክሁ ያለሁትን ምሥራች በዋነኞቹ ወንድሞች ፊት አቀረብኩ፤ ይሁን እንጂ እየሮጥኩ ያለሁት ወይም የሮጥኩት ምናልባት በከንቱ እንዳይሆን ስለሰጋሁ ይህን ያስታወቅኳቸው ለብቻቸው ነበር።  ይሁንና ከእኔ ጋር የነበረው ቲቶ እንኳ ግሪካዊ ቢሆንም እንዲገረዝ አልተገደደም።  ሆኖም ይህ ጉዳይ የተነሳው ሙሉ በሙሉ ባሪያዎች ሊያደርጉን በማሰብ ከክርስቶስ ኢየሱስ ጋር ባለን ኅብረት ያገኘነውን ነፃነት ሊሰልሉ ሾልከው በስውር በገቡት ሐሰተኛ ወንድሞች ምክንያት ነው፤  እኛ ግን የምሥራቹ እውነት በእናንተ ዘንድ ጸንቶ እንዲኖር በማለት ለአንድ አፍታ እንኳ እሺ ብለን አልተገዛንላቸውም።  ከፍተኛ ቦታ እንዳላቸው ተደርገው የሚታዩትን በተመለከተ ግን እንደ እውነቱ ከሆነ እነዚህ ዋነኛ የሆኑ ወንድሞች ለእኔ የጨመሩልኝ አዲስ ነገር የለም። አዎ፣ አምላክ በሰው ውጫዊ ማንነት ስለማይመራ እነዚህ ሰዎች ቀደም ሲል ምንም ሆኑ ምን ለእኔ የሚያመጣው ለውጥ የለም።  በአንጻሩ ግን ጴጥሮስ ለተገረዙት እንዲሰብክ ምሥራቹ በአደራ እንደተሰጠው ሁሉ እኔም ላልተገረዙት እንድሰብክ ምሥራቹ በአደራ እንደተሰጠኝ በተረዱ ጊዜ  (ምክንያቱም ጴጥሮስ ለተገረዙት ሐዋርያ ሆኖ እንዲያገለግል የሚያስፈልገውን ኃይል የሰጠው እሱ ከአሕዛብ ወገን የሆኑትን እንዳገለግል ለእኔም ኃይል ሰጥቶኛል፤)  አዎ፣ የተሰጠኝን ጸጋ በተረዱ ጊዜ እንደ ዓምድ የሚታዩት ያዕቆብ፣ ኬፋና ዮሐንስ ለእኔና ለበርናባስ ቀኝ እጃቸውን በመስጠት እኛ ወደ አሕዛብ እንድንሄድ እነሱ ደግሞ ወደተገረዙት እንዲሄዱ መስማማታቸውን ገለጹልን። 10  ብቻ ድሆችን ማሰባችንን እንዳናቋርጥ አደራ አሉን። እኔም ራሴ ይህን ለማድረግ በትጋት ስጥር ነበር። 11  ይሁን እንጂ ኬፋ ወደ አንጾኪያ በመጣ ጊዜ ፊት ለፊት ተቃወምኩት፤ ምክንያቱም ሊወገዝ ይገባው ነበር። 12  የተወሰኑ ሰዎች ከያዕቆብ ዘንድ ከመምጣታቸው በፊት ከአሕዛብ ወገን ከሆኑ ሰዎች ጋር የመብላት ልማድ ነበረው፤ እነሱ በመጡ ጊዜ ግን ከተገረዙት ወገን የሆኑትን በመፍራት ከአሕዛብ ወገን ከሆኑት መራቅና ራሱን ማግለል ጀመረ። 13  የቀሩት አይሁዳውያንም በዚህ የማስመሰል ድርጊት ከእሱ ጋር ተባበሩ፤ ሌላው ቀርቶ በርናባስም እንኳ በእነሱ የማስመሰል ድርጊት ተወስዶ ነበር። 14  ሆኖም ከምሥራቹ እውነት ጋር በሚስማማ መንገድ ቀጥ ብለው እየተጓዙ እንዳልሆኑ ባየሁ ጊዜ ኬፋን በሁሉም ፊት እንዲህ አልኩት:- “አንተ አይሁዳዊ ሆነህ ሳለህ እንደ አይሁዳውያን ሳይሆን እንደ አሕዛብ የምትኖር ከሆነ ከአሕዛብ ወገን የሆኑ ሰዎች እንደ አይሁዳውያን ልማድ እንዲኖሩ እንዴት ታስገድዳቸዋለህ?” 15  በተፈጥሯችን አይሁዳውያን እንጂ ከአሕዛብ የመጣን ኃጢአተኞች ያልሆንነው እኛ 16  አንድ ሰው ጻድቅ ተብሎ የሚጠራው ሕግን በመጠበቅ ሳይሆን በክርስቶስ ኢየሱስ በማመን ብቻ እንደሆነ ስለምናውቅ ሕግን በመጠበቅ ሳይሆን በክርስቶስ በማመን ጻድቃን ተብለን እንድንጠራ እኛም እንኳ በክርስቶስ ኢየሱስ አምነናል፤ ምክንያቱም ሕግን በመጠበቅ ጻድቅ ተብሎ ሊጠራ የሚችል ሥጋ ለባሽ የለም። 17  እንግዲህ እኛ በክርስቶስ አማካኝነት ጻድቃን ተብለን ለመጠራት በመፈለጋችን እንደ ኃጢአተኞች ተደርገን ከታየን ክርስቶስ የኃጢአት አገልጋይ ነው ማለት ነው? በጭራሽ! 18  በአንድ ወቅት እኔው ራሴ ያፈረስኳቸውን እነዚያኑ ነገሮች መልሼ የምገነባ ከሆነ እኔው ራሴ ሕግ ተላላፊ መሆኔን አሳያለሁ ማለት ነው። 19  እኔ በበኩሌ ለአምላክ ሕያው መሆን እችል ዘንድ በሕጉ በኩል ለሕጉ ሞቻለሁ። 20  እኔ ከክርስቶስ ጋር ተሰቅያለሁ። ከዚህ በኋላ የምኖረው እኔ ሳልሆን ከእኔ ጋር አንድ ሆኖ የሚኖረው ክርስቶስ ነው። አሁን በሥጋ የምኖረውን ሕይወት የምኖረው በወደደኝና ለእኔ ሲል ራሱን አሳልፎ በሰጠው በአምላክ ልጅ ላይ ባለኝ እምነት ነው። 21  የአምላክን ጸጋ ወደ ጎን ገሸሽ አላደርግም፤ ጽድቅ የሚገኘው በሕግ አማካኝነት ከሆነማ ክርስቶስ የሞተው እንዲያው በከንቱ ነው።

የግርጌ ማስታወሻዎች