በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ዮሐንስ 7:1-53

7  ከዚህ በኋላ ኢየሱስ አይሁዳውያን ሊገድሉት ይፈልጉ ስለነበር በይሁዳ መዘዋወር አልፈለገም፤ ከዚህ ይልቅ በገሊላ መዘዋወሩን ቀጠለ።  ይሁን እንጂ የአይሁዶች በዓል የሆነው የዳስ በዓል ተቃርቦ ነበር።  ስለዚህ ወንድሞቹ እንዲህ አሉት:- “ደቀ መዛሙርትህም የምታከናውነውን ሥራ ማየት እንዲችሉ ከዚህ ተነስተህ ወደ ይሁዳ ሂድ።  ምክንያቱም በይፋ እንዲታወቅ እየፈለገ ማንኛውንም ነገር በስውር የሚሠራ ሰው የለም። እነዚህን ነገሮች የምትሠራ ከሆነ ራስህን ለዓለም ግለጥ።”  ወንድሞቹም ቢሆኑ አላመኑበትም ነበር።  ኢየሱስም እንዲህ አላቸው:- “የእኔ ጊዜ ገና አልደረሰም፤ ለእናንተ ግን ማንኛውም ጊዜ የተመቸ ነው።  ዓለም እናንተን የሚጠላበት ምንም ምክንያት የለውም፤ እኔ ግን ሥራው ክፉ እንደሆነ ስለምመሠክርበት ይጠላኛል።  እናንተ ወደ በዓሉ ሂዱ፤ እኔ ግን ገና ጊዜዬ ሙሉ በሙሉ ስላልደረሰ ወደ በዓሉ አልሄድም።”  ይህን ከነገራቸው በኋላ በገሊላ ቆየ። 10  ሆኖም ወንድሞቹ ወደ በዓሉ ከሄዱ በኋላ እሱም በግልጽ ሳይሆን በስውር ወደዚያው ሄደ። 11  በበዓሉም ላይ አይሁዳውያን “ያ ሰው የት አለ?” እያሉ ይፈልጉት ጀመር። 12  በሕዝቡም መካከል ስለ እሱ ብዙ ጉምጉምታ ነበር። አንዳንዶች “እሱ ጥሩ ሰው ነው” ሲሉ ሌሎች ደግሞ “አይደለም፤ እሱ ሕዝቡን የሚያሳስት ሰው ነው” ይሉ ነበር። 13  እርግጥ አይሁዳውያንን ይፈሩ ስለነበረ ስለ እሱ በግልጽ የሚናገር ሰው አልነበረም። 14  በበዓሉም አጋማሽ ላይ ኢየሱስ ወደ ቤተ መቅደሱ ሄዶ ያስተምር ጀመር። 15  በዚህ ጊዜ አይሁዳውያን “ይህ ሰው ትምህርት ቤት ገብቶ ሳይማር መጻሕፍትን እንዴት ሊያውቅ ቻለ?” እያሉ ይደነቁ ነበር። 16  ኢየሱስም መልሶ እንዲህ አላቸው:- “የማስተምረው ትምህርት የራሴ ሳይሆን ከላከኝ የመጣ ነው። 17  ማንም የእሱን ፈቃድ ማድረግ የሚፈልግ ከሆነ ይህ ትምህርት ከአምላክ የመጣ ይሁን ከራሴ ለይቶ ያውቃል። 18  ከራሱ አመንጭቶ የሚናገር ለራሱ ክብር የሚፈልግ ነው፤ የላከው እንዲከበር የሚፈልግ ግን እሱ እውነተኛ ነው፤ በእሱም ዘንድ ዓመፅ የለም። 19  ሕጉን የሰጣችሁ ሙሴ ነው፤ አይደለም እንዴ? ሆኖም አንዳችሁም ሕጉን አትታዘዙም። እኔን ለመግደል የምትፈልጉት ለምንድን ነው?” 20  ሕዝቡም “አንተ ጋኔን አለብህ። ሊገድልህ የፈለገው ደግሞ ማን ነው?” ብለው መለሱለት። 21  ኢየሱስም መልሶ እንዲህ አላቸው:- “አንድ ነገር ስለሠራሁ ሁላችሁም ተደነቃችሁ። 22  እስቲ የሚከተለውን ልብ በሉ:- ሙሴ የግርዘትን ሕግ ሰጣችሁ፤ (ይህ ሕግ የተሰጠው ከአባቶች ነው እንጂ ከሙሴ አይደለም፤) እናንተም በሰንበት ሰው ትገርዛላችሁ። 23  የሙሴ ሕግ እንዳይጣስ ሲባል በሰንበት ሰው የሚገረዝ ከሆነ እኔ በሰንበት አንድን ሰው መፈወሴ ይህን ያህል የሚያስቆጣ ነው? 24  የሰውን ውጫዊ ገጽታ በማየት መፍረድ ትታችሁ በጽድቅ ፍረዱ።” 25  በዚህ ጊዜ ከኢየሩሳሌም ነዋሪዎች መካከል አንዳንዶቹ እንዲህ ይሉ ጀመር:- “ሊገድሉት የሚፈልጉት ሰው ይህ አይደለም እንዴ? 26  እሱ ግን ይኸው በአደባባይ እየተናገረ ነው፤ እነሱም ምንም አላሉትም። ገዥዎቹም ይህ ሰው በእርግጥ ክርስቶስ እንደሆነ አስበው ይሆን እንዴ? 27  ሆኖም እኛ ይህ ሰው ከየት እንደመጣ እናውቃለን፤ ክርስቶስ ሲመጣ ግን ከየት እንደመጣ ማንም አያውቅም።” 28  ስለዚህ ኢየሱስ በቤተ መቅደሱ ውስጥ እያስተማረ ሳለ እንዲህ በማለት ጮክ ብሎ ተናገረ:- “አዎ፣ እኔ ማን እንደሆንኩም ሆነ ከየት እንደመጣሁ ታውቃላችሁ። የመጣሁትም በራሴ ተነሳስቼ አይደለም፤ ሆኖም የላከኝ በእውን ያለ ነው፤ እናንተም አታውቁትም። 29  እኔ ግን የእሱ ተወካይ ሆኜ የመጣሁ ስለሆንኩ አውቀዋለሁ፤ የላከኝም እሱ ነው።” 30  በመሆኑም ሊይዙት ፈለጉ፤ ሆኖም ሰዓቱ ገና ስላልደረሰ ማንም አልያዘውም። 31  ይሁንና ከሕዝቡ መካከል ብዙዎች በእሱ አምነው “ክርስቶስስ በሚመጣበት ጊዜ ከዚህ ሰው የበለጠ ብዙ ምልክቶች ያደርጋል እንዴ?” ይሉ ጀመር። 32  ፈሪሳውያን ሕዝቡ በጉምጉምታ ስለ እሱ የሚያወራውን ነገር ሰሙ፤ የካህናት አለቆቹና ፈሪሳውያኑም እንዲይዙት የቤተ መቅደስ ጠባቂዎችን ላኩ። 33  ስለዚህ ኢየሱስ እንዲህ አለ:- “ከእናንተ ጋር ጥቂት ጊዜ እቆያለሁ፤ ከዚያም ወደ ላከኝ እሄዳለሁ። 34  ትፈልጉኛላችሁ፣ ግን አታገኙኝም፤ ወዳለሁበትም ልትመጡ አትችሉም።” 35  በዚህ ጊዜ አይሁዳውያን እርስ በርሳቸው እንዲህ ተባባሉ:- “ይህ ሰው ልናገኘው የማንችለው ወዴት ሊሄድ ቢያስብ ነው? መቼም በግሪካውያን መካከል ተበታትነው ወደሚገኙት አይሁዶች ሄዶ ግሪካውያንን ሊያስተምር አስቦ አይሆንም፤ ይሆን እንዴ? 36  ‘ትፈልጉኛላችሁ፣ ግን አታገኙኝም፤ ወዳለሁበትም ልትመጡ አትችሉም’ ሲል ምን ማለቱ ይሆን?” 37  በመጨረሻው ቀን ይኸውም በበዓሉ ታላቅ ቀን ኢየሱስ ቆሞ ከፍ ባለ ድምፅ እንዲህ አለ:- “የተጠማ ካለ ወደ እኔ ይምጣና ይጠጣ። 38  በእኔ የሚያምን፣ ቅዱስ መጽሐፉ እንደሚለው ‘ሕይወት የሚሰጥ የውኃ ጅረት ከውስጡ ይፈሳል።’” 39  ይሁን እንጂ ይህን ሲል በእሱ የሚያምኑ ስለሚቀበሉት መንፈስ መናገሩ ነበር፤ ምክንያቱም ኢየሱስ ክብሩን ገና ስላልተጎናጸፈ መንፈስ ገና አልተሰጠም ነበር። 40  ስለዚህ ከሕዝቡ መካከል አንዳንዶች ይህን ቃል ሲሰሙ “ይህ ሰው በእርግጥ ነቢዩ ነው” ይሉ ጀመር። 41  ሌሎችም “ይህ ክርስቶስ ነው” ይሉ ነበር። አንዳንዶች ግን እንዲህ ይሉ ነበር:- “ክርስቶስ እንዴት ከገሊላ ሊመጣ ይችላል? 42  ቅዱስ መጽሐፉ ክርስቶስ ከዳዊት ዘርና ዳዊት ከኖረበት መንደር ከቤተልሔም እንደሚመጣ ይናገር የለም?” 43  ስለዚህ እሱን በተመለከተ በሕዝቡ መካከል ክፍፍል ተፈጠረ። 44  ይሁንና አንዳንዶቹ ሊይዙት ፈልገው ነበር፤ ሆኖም የያዘው አንድም ሰው አልነበረም። 45  ስለዚህ የቤተ መቅደስ ጠባቂዎቹ ወደ ካህናት አለቆቹና ወደ ፈሪሳውያኑ ተመልሰው ሄዱ፤ እነሱም ጠባቂዎቹን “ለምን ይዛችሁ አላመጣችሁትም?” አሏቸው። 46  ጠባቂዎቹም “ማንም እንደዚህ ሰው ተናግሮ አያውቅም” ብለው መለሱ። 47  ፈሪሳውያኑም እንዲህ ሲሉ መለሱ:- “እናንተም ደግሞ ተታለላችሁ እንዴ? 48  ከገዥዎች ወይም ከፈሪሳውያን መካከል በእሱ ያመነ አንድም የለም፤ አለ እንዴ? 49  ሕጉን የማያውቀው ይህ ሕዝብ ግን የተረገመ ነው።” 50  ቀደም ሲል ወደ ኢየሱስ መጥቶ የነበረውና ከእነሱ አንዱ የሆነው ኒቆዲሞስ እንዲህ አላቸው:- 51  “ሕጋችን በመጀመሪያ ግለሰቡ የሚለውን ሳይሰማና እያደረገ ያለውን ነገር ሳያውቅ ይፈርድበታል?” 52  እነሱም “አንተም ደግሞ ከገሊላ ነህ እንዴ? ከገሊላ አንድም ነቢይ እንደማይነሳ መርምረህ ተረዳ” አሉት።* * ኮዴክስ ሳይናይቲከስ፣ ኮዴክስ ቫቲካነስና ሳይናይቲክ ሲሪያክ ኮዴክስ የተባሉት በእጅ የተጻፉ ጥንታዊ ቅጂዎች ከቁጥር 53 እስከ ምዕራፍ 8 ቁጥር 11 ድረስ ያለውን ሐሳብ አይጨምሩም፤ ይህም (በተለያዩ የግሪክኛ ጽሑፎችና ትርጉሞች ላይ አንዳንድ ልዩነቶች ያለው ቢሆንም) እንደሚከተለው ይነበባል:- 53  ከዚህ በኋላ ሁሉም ወደየቤታቸው ሄዱ።

የግርጌ ማስታወሻዎች