በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ዮሐንስ 5:1-47

5  ከዚህ በኋላ የአይሁድ በዓል ስለነበረ ኢየሱስ ወደ ኢየሩሳሌም ወጣ።  በኢየሩሳሌም በበጎች በር አጠገብ አምስት ባለ መጠለያ መተላለፊያዎች ያሉት በዕብራይስጥ ቤተዛታ ተብሎ የሚጠራ አንድ የውኃ ገንዳ ነበር።  በእነዚህ መተላለፊያዎች ውስጥ ብዙ በሽተኞች፣ ዓይነ ስውሮች፣ አንካሶችና ሽባዎች ይተኙ ነበር። 4*  ——  በዚያም ለሠላሳ ስምንት ዓመት በሽተኛ ሆኖ የኖረ አንድ ሰው ነበር።  ኢየሱስ ይህን ሰው በዚያ ተኝቶ አየውና ለረጅም ጊዜ በሽተኛ ሆኖ እንደኖረ አውቆ “መዳን ትፈልጋለህ?” አለው።  በሽተኛውም ሰው “ጌታዬ፣ ውኃው በሚናወጥበት ጊዜ ገንዳው ውስጥ የሚከተኝ ሰው የለኝም፤ ለመግባት ስሞክር ደግሞ ሌላው ቀድሞኝ ይገባል” ሲል መለሰለት።  ኢየሱስም “ተነሳና አልጋህን ተሸክመህ ተራመድ” አለው።  በዚህ ጊዜ ሰውየው ወዲያውኑ ተፈወሰ፤ አልጋውንም አንስቶ መራመድ ጀመረ። ቀኑም ሰንበት ነበር። 10  በመሆኑም አይሁዳውያን የተፈወሰውን ሰው “ሰንበት እኮ ነው፤ አልጋህን እንድትሸከም ሕጉ አይፈቅድልህም” ይሉት ጀመር። 11  እሱ ግን “የፈወሰኝ ሰው ራሱ ‘አልጋህን ተሸክመህ ተራመድ’ ብሎኛል” ሲል መለሰላቸው። 12  እነሱም “‘አልጋህን ተሸክመህ ተራመድ’ ያለህ ማን ነው?” ሲሉ ጠየቁት። 13  ሆኖም በቦታው ብዙ ሰው ስለነበረና ኢየሱስ ከአካባቢው ዞር ስላለ ሰውየው የፈወሰው ማን እንደሆነ አላወቀም። 14  ከዚህ በኋላ ኢየሱስ ሰውየውን በቤተ መቅደሱ ውስጥ አገኘውና “አየህ፣ አሁን ደህና ሆነሃል። የባሰ ነገር እንዳይደርስብህ ከእንግዲህ ኃጢአት አትሥራ” አለው። 15  ሰውየውም ሄዶ የፈወሰው ኢየሱስ መሆኑን ለአይሁዳውያኑ ነገራቸው። 16  ከዚህም የተነሳ አይሁዳውያኑ በኢየሱስ ላይ ስደት ያደርሱበት ጀመር፤ ይህንም ያደረጉት በሰንበት ቀን እነዚህን ነገሮች ይፈጽም ስለነበረ ነው። 17  እሱ ግን “አባቴ እስካሁን እየሠራ ነው፤ እኔም መሥራቴን እቀጥላለሁ” ሲል መለሰላቸው። 18  ከዚህም የተነሳ አይሁዳውያኑ ሰንበትን ስለጣሰ ብቻ ሳይሆን አምላክን የገዛ አባቱ እንደሆነ አድርጎ በመጥራት ራሱን ከአምላክ ጋር እኩል ስላደረገ እሱን ለመግደል ይበልጥ ተነሳሱ። 19  ስለሆነም ኢየሱስ እንዲህ በማለት ለእነሱ መልስ መስጠቱን ቀጠለ:- “እውነት እውነት እላችኋለሁ፣ ወልድ አብ ሲያደርግ ያየውን ብቻ እንጂ በራሱ ተነሳስቶ አንድም ነገር ሊያደርግ አይችልም። አብ የሚያደርገውን ነገር ሁሉ ወልድም በተመሳሳይ መንገድ ያንኑ ነገር ያደርጋል። 20  ምክንያቱም አብ ወልድን ይወደዋል እንዲሁም እሱ ራሱ የሚያደርገውን ነገር ሁሉ ያሳየዋል፤ እናንተም ትደነቁ ዘንድ ከእነዚህም የሚበልጥ ሥራ ያሳየዋል። 21  አብ ሙታንን አስነስቶ ሕያው እንደሚያደርጋቸው ሁሉ ወልድም እንዲሁ የፈለገውን ሰው ሕያው ያደርጋል። 22  ምክንያቱም አብ በማንም ላይ አይፈርድም፤ ከዚህ ይልቅ የመፍረዱን ሥልጣን ሁሉ ለወልድ ሰጥቶታል፤ 23  ይህን ያደረገውም ሁሉም አብን እንደሚያከብሩ ሁሉ ወልድንም እንዲያከብሩ ነው። ወልድን የማያከብር እሱን የላከውን አብንም አያከብርም። 24  እውነት እውነት እላችኋለሁ፣ ቃሌን የሚሰማና የላከኝን የሚያምን የዘላለም ሕይወት አለው፤ ወደ ፍርድም አይመጣም፤ ከዚህ ይልቅ ከሞት ወደ ሕይወት ተሻግሯል። 25  “እውነት እውነት እላችኋለሁ፣ ሙታን የሰውን ልጅ ድምፅ የሚሰሙበት ሰዓት ይመጣል፤ ያም ሰዓት አሁን ነው፤ የሚሰሙትም በሕይወት ይኖራሉ። 26  አብ ሕይወት የመስጠት ሥልጣን እንዳለው ሁሉ፣ ወልድም ሕይወት የመስጠት ሥልጣን እንዲኖረው አድርጎታል። 27  የሰው ልጅ ስለሆነም የመፍረድ ሥልጣን ሰጥቶታል። 28  በዚህ አትደነቁ፣ ምክንያቱም በመታሰቢያ መቃብር ያሉ ሁሉ ድምፁን የሚሰሙበት ሰዓት ይመጣል፤ 29  መልካም የሠሩ ለሕይወት ትንሣኤ፣ ክፉ ነገር የሠሩ* ደግሞ ለፍርድ ትንሣኤ ይወጣሉ። 30  በራሴ ተነሳስቼ አንድም ነገር ማድረግ አልችልም፤ አባቴ በነገረኝ መሠረት እፈርዳለሁ፤ የራሴን ፈቃድ ሳይሆን የላከኝን ፈቃድ መፈጸም ስለምፈልግ የምፈርደው የጽድቅ ፍርድ ነው። 31  “እኔ ብቻ ስለ ራሴ ብመሠክር ምሥክርነቴ እውነት አይደለም። 32  ስለ እኔ የሚመሠክር ሌላ አለ፤ ደግሞም እሱ ስለ እኔ የሚሰጠው ምሥክርነት እውነት እንደሆነ አውቃለሁ። 33  ወደ ዮሐንስ ሰዎች ልካችሁ ነበር፤ እሱም ለእውነት መሥክሯል። 34  ይሁን እንጂ እኔ የሰው ምሥክርነት አያስፈልገኝም፤ ይህን የምናገረው ግን እናንተ እንድትድኑ ነው። 35  ያ ሰው የሚነድና የሚያበራ መብራት ነበር፤ እናንተም ለጥቂት ጊዜ በእሱ ብርሃን እጅግ ለመደሰት ፈቃደኞች ነበራችሁ። 36  እኔ ግን ከዮሐንስ የበለጠ ምሥክር አለኝ፤ ምክንያቱም አባቴ እንዳከናውነው የሰጠኝ ሥራ ማለትም እየሠራሁት ያለው ሥራ ራሱ አብ እንደላከኝ ስለ እኔ ይመሠክራል። 37  በተጨማሪም የላከኝ አብ ራሱ ስለ እኔ መሥክሯል። እናንተ መቼም ቢሆን ድምፁን አልሰማችሁም፣ መልኩንም አላያችሁም፤ 38  እሱ የላከውንም ስለማታምኑ ቃሉ በእናንተ ውስጥ አይኖርም። 39  “እናንተ በቅዱሳን መጻሕፍት የዘላለም ሕይወት የምታገኙ ስለሚመስላችሁ እነሱን ትመረምራላችሁ፤ እነዚሁ መጻሕፍት ስለ እኔ የሚመሠክሩ ናቸው። 40  ሆኖም ሕይወት እንድታገኙ ወደ እኔ መምጣት አትፈልጉም። 41  እኔ ከሰው ክብር አልቀበልም፤ 42  ይሁንና እናንተ የአምላክ ፍቅር በውስጣችሁ እንደሌለ በሚገባ አውቃለሁ። 43  እኔ በአባቴ ስም መጣሁ፤ እናንተ ግን አልተቀበላችሁኝም፤ ሌላው ግን በራሱ ስም ቢመጣ ትቀበሉታላችሁ። 44  እናንተ እርስ በርሳችሁ ክብር የምትሰጣጡና ከአንዱ አምላክ የሚገኘውን ክብር የማትፈልጉ ሆናችሁ ሳላችሁ እንዴት ልታምኑ ትችላላችሁ? 45  እኔ በአብ ፊት የምከሳችሁ አይምሰላችሁ፤ የሚከሳችሁ ሌላ አለ፤ እሱም ተስፋ የጣላችሁበት ሙሴ ነው። 46  እንዲያውም ሙሴን ብታምኑት ኖሮ እኔንም ታምኑኝ ነበር፤ ምክንያቱም እሱ ስለ እኔ ጽፏል። 47  ሆኖም እሱ የጻፈውን ካላመናችሁ የእኔን ቃል እንዴት ታምናላችሁ?”

የግርጌ ማስታወሻዎች

ዮሐ 5:4 ማቴዎስ 17:21 ላይ የሚገኘውን የግርጌ ማስታወሻ ተመልከት።
ዮሐ 5:29 * ማለትም፣ “መጥፎ ነገር መሥራትን ልማድ ያደረጉ።”