በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ዮሐንስ 20:1-31

20  በሳምንቱ የመጀመሪያ ቀን መግደላዊት ማርያም በማለዳ፣ ገና ጨለማ ሳለ ወደ መታሰቢያ መቃብሩ መጣች፤ ድንጋዩም ከመቃብሩ ተነስቶ አየች።  ስለዚህ ወደ ስምዖን ጴጥሮስና ኢየሱስ ይወደው ወደነበረው ወደ ሌላው ደቀ መዝሙር እየሮጠች መጥታ “ጌታን ከመታሰቢያ መቃብሩ ውስጥ ወስደውታል፤ የት እንዳደረጉትም አናውቅም” አለቻቸው።  በዚህ ጊዜ ጴጥሮስና ሌላው ደቀ መዝሙር ወጥተው ወደ መታሰቢያ መቃብሩ ሄዱ።  ሁለቱም አብረው ይሮጡ ጀመር፤ ሆኖም ሌላው ደቀ መዝሙር በከፍተኛ ፍጥነት ጴጥሮስን ቀድሞ በመሮጥ መታሰቢያ መቃብሩ ጋር መጀመሪያ ደረሰ።  ጎንበስ ብሎ ወደ ውስጥ ሲመለከት የመግነዝ ጨርቆቹ እዚያ ተቀምጠው አየ፤ ወደ ውስጥ ግን አልገባም።  ከዚያም ስምዖን ጴጥሮስ ተከትሎት መጥቶ መታሰቢያ መቃብሩ ውስጥ ገባ። የመግነዝ ጨርቆቹም በዚያ ተቀምጠው አየ፤  ደግሞም በራሱ ላይ የነበረው ጨርቅ ከመግነዝ ጨርቆቹ ጋር ሳይሆን ለብቻው ተጠቅልሎ አንድ ቦታ ላይ ተቀምጦ አየ።  በዚህ ጊዜ ቀድሞ ወደ መታሰቢያ መቃብሩ ደርሶ የነበረው ሌላው ደቀ መዝሙርም ወደ ውስጥ ገባ፤ እሱም አይቶ አመነ።  ይሁንና ከሞት መነሳት እንዳለበት የሚናገረውን የቅዱስ መጽሐፉን ቃል ገና አልተረዱም ነበር። 10  ከዚያም ደቀ መዛሙርቱ ወደ ቤታቸው ተመልሰው ሄዱ። 11  ይሁን እንጂ ማርያም እዚያው መታሰቢያ መቃብሩ አጠገብ ቆማ ታለቅስ ነበር። እያለቀሰችም ወደ መታሰቢያ መቃብሩ ውስጥ ለማየት ጎንበስ አለች፤ 12  ነጭ ልብስ የለበሱ ሁለት መላእክትም የኢየሱስ አስከሬን አርፎበት በነበረው ቦታ አንዱ በራስጌው ሌላው በግርጌው ተቀምጠው አየች። 13  እነሱም “አንቺ ሴት፣ ለምን ታለቅሻለሽ?” አሏት። እሷም “ጌታዬን ወስደውታል፤ የት እንዳደረጉትም አላውቅም” አለቻቸው። 14  ይህን ካለች በኋላ ወደኋላ ዞር ስትል ኢየሱስን ቆሞ አየችው፤ ነገር ግን ኢየሱስ መሆኑን አላወቀችም። 15  ኢየሱስም “አንቺ ሴት፣ ለምን ታለቅሻለሽ? የምትፈልጊው ማንን ነው?” አላት። እሷም አትክልተኛው ስለመሰላት “ጌታዬ፣ አንተ ከዚህ አውጥተኸው ከሆነ የት እንዳደረግከው ንገረኝ፤ እኔም እወስደዋለሁ” አለችው። 16  ኢየሱስም “ማርያም!” አላት። እሷም ዞር ብላ በዕብራይስጥ “ራቦኒ!” አለችው፤ (ትርጉሙም “መምህር!” ማለት ነው።) 17  ኢየሱስም እንዲህ አላት:- “ሙጭጭ አድርገሽ አትያዥኝ። ምክንያቱም ገና ወደ አባቴ አላረግኩም። ይልቁንስ ወደ ወንድሞቼ ሄደሽ ‘ወደ አባቴና ወደ አባታችሁ፣ ወደ አምላኬና ወደ አምላካችሁ ላርግ ነው’ ብለሽ ንገሪያቸው።” 18  መግደላዊት ማርያም መጥታ “ጌታን አየሁት!” ብላ ለደቀ መዛሙርቱ አበሰረቻቸው፤ እሱ ያላትንም ነገረቻቸው። 19  የሳምንቱ የመጀመሪያ ቀን በነበረው በዚያው ቀን ምሽት ላይ ደቀ መዛሙርቱ አይሁዳውያኑን በመፍራት በሮቹን ቆልፈው ተቀምጠው ሳለ ኢየሱስ መጥቶ በመካከላቸው ቆመና “ሰላም ለእናንተ ይሁን” አላቸው። 20  ይህን ካለ በኋላ እጆቹንና ጎኑን አሳያቸው። ደቀ መዛሙርቱም ጌታን በማየታቸው እጅግ ተደሰቱ። 21  በመሆኑም ኢየሱስ ዳግመኛ “ሰላም ለእናንተ ይሁን። አብ እኔን እንደላከኝ፤ እኔም እናንተን እልካችኋለሁ” አላቸው። 22  ይህን ካለ በኋላ እፍ አለባቸውና እንዲህ አላቸው:- “መንፈስ ቅዱስን ተቀበሉ። 23  የማንንም ሰው ኃጢአት ይቅር ብትሉ ኃጢአቱ ይቅር እንደተባለ ይጸናል፤ ይቅር የማትሉት ሰው ሁሉ ደግሞ ኃጢአቱ እንዳለ ይጸናል።” 24  ይሁን እንጂ ከአሥራ ሁለቱ አንዱ የሆነው ዲዲሞስ የሚባለው ቶማስ ኢየሱስ በመጣበት ጊዜ አብሯቸው አልነበረም። 25  ስለዚህ ሌሎቹ ደቀ መዛሙርት “ጌታን አየነው!” አሉት። እሱ ግን “በእጆቹ ላይ ምስማሮቹ የተቸነከሩበትን ምልክት ካላየሁ እንዲሁም ጣቴን ምስማሮቹ በነበሩበት ቦታ ካላስገባሁና እጄን በጎኑ ካላስገባሁ በምንም ዓይነት አላምንም” አላቸው። 26  እንደገናም ከስምንት ቀን በኋላ ደቀ መዛሙርቱ ቤት ውስጥ ነበሩ፤ ቶማስም ከእነሱ ጋር ነበር። በሮቹ ተቆልፈው የነበሩ ቢሆንም ኢየሱስ መጣና በመካከላቸው ቆሞ “ሰላም ለእናንተ ይሁን” አለ። 27  ከዚያም ቶማስን “ጣትህን እዚህ ክተት፤ እጆቼንም ተመልከት፤ እጅህንም አምጣና በጎኔ አስገባ። መጠራጠርህን ተውና እመን” አለው። 28  ቶማስም መልሶ “ጌታዬ፣ አምላኬ!” አለው። 29  ኢየሱስ “ስላየኸኝ አመንክ? ሳያዩ የሚያምኑ ደስተኞች ናቸው” አለው። 30  እርግጥ ኢየሱስ በዚህ ጥቅልል ውስጥ ያልተጻፉ ሌሎች ብዙ ተአምራዊ ምልክቶችም በደቀ መዛሙርቱ ፊት አድርጓል። 31  ሆኖም እነዚህ የተጻፉት ኢየሱስ፣ እሱ በእርግጥ ክርስቶስ የአምላክ ልጅ እንደሆነ እንድታምኑና በማመናችሁም በስሙ አማካኝነት ሕይወት እንዲኖራችሁ ነው።

የግርጌ ማስታወሻዎች