በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ዮሐንስ 2:1-25

2  በሦስተኛውም ቀን በገሊላ በምትገኘው በቃና የሠርግ ድግስ ነበር፤ የኢየሱስ እናትም በዚያ ነበረች።  ኢየሱስና ደቀ መዛሙርቱም ወደዚህ የሠርግ ድግስ ተጠርተው ነበር።  የወይን ጠጁ እያለቀ ሲሄድ የኢየሱስ እናት “የወይን ጠጅ እኮ አለቀባቸው” አለችው።  ኢየሱስ ግን “አንቺ ሴት፣ ከአንቺ ጋር ምን ጉዳይ አለኝ?* ሰዓቴ ገና አልደረሰም” አላት።  እናቱም በዚያ የሚያገለግሉትን ሰዎች “የሚላችሁን ነገር ሁሉ አድርጉ” አለቻቸው።  የአይሁድ የመንጻት ሥርዓት በሚያዘው መሠረት እያንዳንዳቸው አርባ አራት ወይም ስልሳ ስድስት ሊትር ገደማ የሚይዙ ከድንጋይ የተሠሩ ስድስት የውኃ ጋኖች በዚያ ተቀምጠው ነበር።  ኢየሱስም “የውኃ ጋኖቹን ውኃ ሙሏቸው” አላቸው። እነሱም እስከ አፋቸው ድረስ ሞሏቸው።  ከዚያም “አሁን ከላዩ ቀድታችሁ ለድግሱ አሳዳሪ ስጡት” አላቸው። እነሱም ወስደው ሰጡት።  የድግሱ አሳዳሪም ወደ ወይን ጠጅ የተለወጠውን ውኃ ቀመሰ፤ ሆኖም ከየት እንደመጣ አላወቀም፤ ውኃውን የቀዱት አገልጋዮች ግን ያውቁ ነበር፤ አሳዳሪውም ሙሽራውን ጠርቶ 10  እንዲህ አለው:- “ሰው ሁሉ በቅድሚያ ጥሩውን የወይን ጠጅ ያቀርብና ሰዎቹ ከሰከሩ በኋላ መናኛውን ያቀርባል። አንተ ግን ጥሩውን የወይን ጠጅ እስካሁን ድረስ አቆይተሃል።” 11  ኢየሱስም ከምልክቶቹ የመጀመሪያ የሆነውን ይህን ተአምር በገሊላ በምትገኘው በቃና አከናወነ፤ ክብሩንም ገለጠ፤ ደቀ መዛሙርቱም በእሱ አመኑ። 12  ከዚህ በኋላ እሱና እናቱ እንዲሁም ወንድሞቹና ደቀ መዛሙርቱ ወደ ቅፍርናሆም ወረዱ፤ ሆኖም በዚያ ብዙ ቀን አልቆዩም። 13  በዚህ ጊዜ የአይሁዳውያን ፋሲካ ቀርቦ ነበር፤ ኢየሱስም ወደ ኢየሩሳሌም ወጣ። 14  በቤተ መቅደሱ ውስጥም ከብቶችን፣ በጎችንና ርግቦችን የሚሸጡ ሰዎችን እንዲሁም በዚያ የተቀመጡ ገንዘብ መንዛሪዎችን አገኘ። 15  ከዚያም የገመድ ጅራፍ አበጅቶ ሁሉንም ከበጎቻቸውና ከከብቶቻቸው ጋር አስወጣ፤ የገንዘብ ለዋጮችንም ሳንቲሞች በተነ፤ ጠረጴዛዎቻቸውንም ገለባበጠ። 16  ርግብ ሻጮቹንም “እነዚህን ከዚህ አስወጡ! የአባቴን ቤት የንግድ ቤት ማድረጋችሁ ይብቃ!” አላቸው። 17  ደቀ መዛሙርቱም “የቤትህ ቅንዓት ያንገበግበኛል” ተብሎ የተጻፈው ትዝ አላቸው። 18  በዚህ ጊዜ አይሁዳውያን መልሰው “እነዚህን ነገሮች ለማድረግ ሥልጣን እንዳለህ የሚያረጋግጥ ምን ምልክት ታሳየናለህ?” አሉት። 19  ኢየሱስም መልሶ “ይህን ቤተ መቅደስ አፍርሱት፤ እኔም በሦስት ቀን ውስጥ አነሳዋለሁ” አላቸው። 20  ስለዚህ አይሁዳውያኑ “ይህን ቤተ መቅደስ ለመገንባት አርባ ስድስት ዓመት ፈጅቷል፤ ታዲያ አንተ በሦስት ቀን ታነሳዋለህ?” አሉት። 21  ቤተ መቅደስ ሲል ግን ስለ ራሱ ሰውነት መናገሩ ነበር። 22  በመሆኑም ከሙታን በተነሳ ጊዜ ደቀ መዛሙርቱ ይህን ደጋግሞ ይናገር እንደነበር አስታወሱ፤ ቅዱሳን መጻሕፍትንና ኢየሱስ የተናገረውንም ቃል አመኑ። 23  ይሁንና በፋሲካ በዓል ወቅት በኢየሩሳሌም በነበረበት ጊዜ ብዙ ሰዎች የሚያከናውናቸውን ምልክቶች በማየት በስሙ አመኑ። 24  ኢየሱስ ግን ሁሉንም ያውቃቸው ስለነበር አያምናቸውም ነበር፤ 25  እንዲሁም እሱ ራሱ በሰው ውስጥ ያለውን ያውቅ ስለነበር ማንም ስለ ሰው እንዲመሠክርለት አያስፈልገውም ነበር።

የግርጌ ማስታወሻዎች

ዮሐ 2:4 * ይህ ጥንት ይሠራበት የነበረ ፈሊጣዊ የሆነ ጥያቄ ሲሆን አንድን የቀረበ ሐሳብ ወይም ሊሆን ይችላል ተብሎ የተገመተን ነገር መቃወምን የሚያመለክት እንጂ ንቀትን ወይም ትዕቢትን የሚያሳይ አይደለም።