በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ዮሐንስ 19:1-42

19  በዚያን ጊዜም ጲላጦስ ኢየሱስን ወስዶ ገረፈው።  ወታደሮቹም የእሾህ አክሊል ጎንጉነው በራሱ ላይ ደፉበት፤ እንዲሁም ሐምራዊ ልብስ አለበሱት፤  ወደ እሱ እየቀረቡም “የአይሁድ ንጉሥ ሆይ፣ ሰላም ለአንተ ይሁን!” ይሉት ጀመር። በተጨማሪም በጥፊ ይመቱት ነበር።  ጲላጦስም ዳግመኛ ወደ ውጭ ወጥቶ “ምንም ጥፋት እንዳላገኘሁበት ታውቁ ዘንድ እነሆ ወደ ውጭ አወጣላችኋለሁ” አላቸው።  በመሆኑም ኢየሱስ የእሾህ አክሊል እንደደፋና ሐምራዊ ልብስ እንደለበሰ ወደ ውጭ ወጣ። ጲላጦስም “እነሆ፣ ሰውየው!” አላቸው።  ይሁን እንጂ የካህናት አለቆቹና የቤተ መቅደስ ጠባቂዎቹ ባዩት ጊዜ “ስቀለው! ስቀለው!” እያሉ ጮኹ። ጲላጦስም “እኔ ምንም ጥፋት ስላላገኘሁበት ራሳችሁ ወስዳችሁ ስቀሉት” አላቸው።  አይሁዳውያኑም “እኛ ሕግ አለን፤ በሕጉ መሠረት ደግሞ ይህ ሰው ራሱን የአምላክ ልጅ ስላደረገ መሞት አለበት” ሲሉ መለሱለት።  በመሆኑም ጲላጦስ ይህን ሲሰማ ይበልጥ ፍርሃት አደረበት፤  ዳግመኛም ወደ ገዥው ቤተ መንግሥት ገብቶ ኢየሱስን “ለመሆኑ ከየት ነው የመጣኸው?” አለው። ኢየሱስ ግን ምንም መልስ አልሰጠውም። 10  ስለሆነም ጲላጦስ “መልስ አትሰጠኝም እንዴ? ልፈታህም ሆነ ልሰቅልህ ሥልጣን እንዳለኝ አታውቅም?” አለው። 11  ኢየሱስም “ከላይ ባይሰጥህ ኖሮ በእኔ ላይ ምንም ሥልጣን አይኖርህም ነበር። ለአንተ አሳልፎ የሰጠኝ ሰው የባሰ ኃጢአት ያለበት ለዚህ ነው” ሲል መለሰለት። 12  ከዚህ የተነሳ ጲላጦስ ኢየሱስን መፍታት የሚችልበትን መንገድ ያስብ ጀመር። አይሁዳውያኑ ግን “ይህን ሰው ከፈታኸው አንተ የቄሳር ወዳጅ አይደለህም። ራሱን ንጉሥ የሚያደርግ ሰው ሁሉ የቄሳር ተቃዋሚ ነው” እያሉ ጮኹ። 13  ስለዚህ ጲላጦስ ይህን ከሰማ በኋላ ኢየሱስን ወደ ውጭ አውጥቶ የድንጋይ ንጣፍ በተባለ ቦታ በፍርድ ወንበር ተቀመጠ፤ ይህ ቦታ በዕብራይስጥ ገበታ ይባላል። 14  ጊዜው የፋሲካ* የዝግጅት ቀን ነበር፤ ሰዓቱ ደግሞ ስድስት ሰዓት ገደማ ነበር። ጲላጦስም አይሁዳውያኑን “እነሆ፣ ንጉሣችሁ!” አላቸው። 15  እነሱ ግን “አስወግደው! አስወግደው! ስቀለው!” እያሉ ጮኹ። ጲላጦስም “ንጉሣችሁን ልስቀለው?” አላቸው። የካህናት አለቆቹም “ከቄሳር በቀር ሌላ ንጉሥ የለንም” ሲሉ መለሱ። 16  በዚህ ጊዜ እንዲሰቀል አሳልፎ ሰጣቸው። ኢየሱስንም ይዘው ወሰዱት። 17  ኢየሱስም የመከራውን እንጨት* ራሱ ተሸክሞ የራስ ቅል ቦታ ወደተባለ ስፍራ ወጣ፤ ይህ ቦታ በዕብራይስጥ ጎልጎታ ይባላል፤ 18  በዚያም ሰቀሉት፤ ከእሱም ጋር ሁለት ሰዎችን የሰቀሉ ሲሆን ኢየሱስን በመካከል አድርገው አንዱን በዚህ ጎን ሌላውን ደግሞ በዚያ ጎን ሰቀሉ። 19  በተጨማሪም ጲላጦስ ጽሑፍ ጽፎ በመከራው እንጨት ላይ ሰቀለ። ጽሑፉም “የአይሁድ ንጉሥ የሆነው የናዝሬቱ ኢየሱስ” የሚል ነበር። 20  ኢየሱስ የተሰቀለበት ቦታ በከተማዋ አቅራቢያ የሚገኝ በመሆኑ ብዙ አይሁዳውያን ይህን ጽሑፍ አነበቡት፤ ጽሑፉም የተጻፈው በዕብራይስጥ፣ በላቲንና በግሪክ ነበር። 21  ይሁን እንጂ የአይሁድ የካህናት አለቆች ጲላጦስን “እሱ ‘የአይሁድ ንጉሥ ነኝ’ እንዳለ ጻፍ እንጂ ‘የአይሁድ ንጉሥ’ ብለህ አትጻፍ” ይሉት ጀመር። 22  ጲላጦስም “እንግዲህ የጻፍኩትን ጽፌአለሁ” ሲል መለሰ። 23  ወታደሮቹ ኢየሱስን ከሰቀሉት በኋላ መደረቢያዎቹን ወስደው እያንዳንዱ ወታደር አንድ አንድ ቁራጭ እንዲደርሰው አራት ቦታ ቆራረጧቸው፤ እጀ ጠባቡንም ወሰዱ። ሆኖም እጀ ጠባቡ ከላይ እስከ ታች አንድ ወጥ ሆኖ ያለ ስፌት የተሠራ ነበር። 24  ስለዚህ እርስ በርሳቸው “ከምንቀደው ዕጣ ተጣጥለን ለማን እንደሚደርስ እንወስን” ተባባሉ። ይህም የሆነው “መደረቢያዎቼን እርስ በርሳቸው ተከፋፈሉ፤ በልብሴም ላይ ዕጣ ተጣጣሉ” የሚለው የቅዱስ መጽሐፉ ቃል ይፈጸም ዘንድ ነው። ወታደሮቹም ያደረጉት ይህንኑ ነበር። 25  ይሁንና ኢየሱስ በተሰቀለበት የመከራ እንጨት አጠገብ እናቱ፣ የእናቱ እህት፣ የቀልዮጳ ሚስት ማርያምና መግደላዊት ማርያም ቆመው ነበር። 26  ስለዚህ ኢየሱስ እናቱንና የሚወደውን ደቀ መዝሙር በዚያ ቆመው ሲያያቸው እናቱን “አንቺ ሴት፣ ልጅሽ ይኸውልሽ!” አላት። 27  ከዚያም ደቀ መዝሙሩን “እናትህ ይህችውልህ!” አለው። ደቀ መዝሙሩም ከዚያ ሰዓት አንስቶ ወደ ራሱ ቤት ወሰዳት። 28  ከዚህ በኋላ ኢየሱስ አሁን ሁሉም ነገር እንደተፈጸመ አውቆ የቅዱስ መጽሐፉ ቃል እንዲፈጸም “ተጠማሁ” አለ። 29  በዚያም የኮመጠጠ ወይን ጠጅ የሞላበት ዕቃ ተቀምጦ ነበር። በመሆኑም ወይን ጠጁ ውስጥ የተነከረ ሰፍነግ፣ በሂሶጵ አገዳ ላይ አድርገው ወደ አፉ አቀረቡለት። 30  ኢየሱስ የኮመጠጠውን ወይን ጠጅ ከተቀበለ በኋላ “ተፈጸመ!” አለ፤ ራሱንም ዘንበል አድርጎ መንፈሱን ሰጠ። 31  ከዚህ በኋላ ዕለቱ የዝግጅት ቀን ስለነበር አይሁዳውያን በሰንበት (ያ ሰንበት ታላቅ ሰንበት ስለነበር) አስከሬኖቹ በመከራ እንጨቶቹ ላይ ተሰቅለው እንዳይቆዩ ሲሉ እግራቸው ተሰብሮ በድናቸው እንዲወርድ ጲላጦስን ጠየቁት። 32  ስለዚህ ወታደሮቹ መጥተው ከእሱ ጋር የተሰቀሉትን የመጀመሪያውን ሰውና የሌላኛውን ሰው እግሮች ሰበሩ። 33  ወደ ኢየሱስ በመጡ ጊዜ ግን ቀደም ብሎ መሞቱን ስላዩ እግሮቹን አልሰበሩም። 34  ሆኖም ከወታደሮቹ አንዱ ጎኑን በጦር ወጋው፤ ወዲያውም ደምና ውኃ ፈሰሰ። 35  ይህን ያየው ሰውም ምሥክርነት ሰጥቷል፤ ምሥክርነቱም እውነት ነው፤ እናንተም ታምኑ ዘንድ ይህ ሰው እውነተኛ ነገር እንደሚናገር ያውቃል። 36  ይህም የሆነው “ከእሱ አንድ አጥንት እንኳ አይሰበርም” የሚለው የቅዱስ መጽሐፉ ቃል እንዲፈጸም ነው። 37  ደግሞም ሌላ የቅዱስ መጽሐፉ ቃል “የወጉትን ያዩታል” ይላል። 38  ይህ ከሆነ በኋላ፣ አይሁድን በመፍራቱ በድብቅ የኢየሱስ ደቀ መዝሙር የሆነው የአርማትያሱ ዮሴፍ የኢየሱስን አስከሬን ለመውሰድ ጲላጦስን ጠየቀ፤ ጲላጦስም ፈቀደለት። ስለዚህ መጥቶ አስከሬኑን ወሰደ። 39  ቀደም ሲል በማታ ወደ ኢየሱስ መጥቶ የነበረው ኒቆዲሞስም አንድ መቶ ነጥር* ገደማ የሚሆን የከርቤና የእሬት ጥቅልል ይዞ መጣ። 40  የኢየሱስንም አስከሬን ወስደው በአይሁዳውያን የአገናነዝ ልማድ መሠረት ጥሩ መዓዛ ባላቸው በእነዚህ ቅመሞች ተጠቅመው በጨርቅ ገነዙት። 41  እሱ በተሰቀለበት ቦታም አንድ የአትክልት ስፍራ ነበር፤ በአትክልት ስፍራው ውስጥ ደግሞ ገና ማንም ያልተቀበረበት አዲስ የመታሰቢያ መቃብር ነበር። 42  በመሆኑም ዕለቱ የአይሁዳውያን የዝግጅት ቀን ስለነበርና የመታሰቢያ መቃብሩም በአቅራቢያው ይገኝ ስለነበር ኢየሱስን በዚያ አኖሩት።

የግርጌ ማስታወሻዎች

ዮሐ 19:14 * እዚህ ላይ “ፋሲካ” የሚለው ቃል ያልቦካ ቂጣ በዓል የሚከበርበትን ጊዜ ጨምሮ የፋሲካን ሳምንት ያመለክታል።
ዮሐ 19:17 * ከተጨማሪው መረጃ ላይ 6ኛውን ርዕስ ተመልከት።
ዮሐ 19:39 * 32.7 ኪሎ ግራም ገደማ ይመዝናል።