በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ዮሐንስ 18:1-40

18  ኢየሱስ እነዚህን ነገሮች ከተናገረ በኋላ ከደቀ መዛሙርቱ ጋር የቄድሮንን ሸለቆ ተሻግሮ ወደ አንድ የአትክልት ስፍራ ሄደ፤ እሱና ደቀ መዛሙርቱም ወደ አትክልት ስፍራው ገቡ።  ብዙውን ጊዜ ኢየሱስ ከደቀ መዛሙርቱ ጋር በዚያ ይገናኝ ስለነበር አሳልፎ የሚሰጠው ይሁዳም ይህን ቦታ ያውቅ ነበር።  ስለዚህ ይሁዳ አንድ የወታደሮች ቡድን እንዲሁም ከካህናት አለቆችና ከፈሪሳውያን የተላኩ የቤተ መቅደስ ጠባቂዎች አስከትሎ መጣ፤ እነሱም ችቦና መብራት እንዲሁም መሣሪያ ይዘው ነበር።  በዚህ ጊዜ ኢየሱስ የሚደርስበትን ነገር ሁሉ ስላወቀ ወደፊት ወጣ ብሎ “ማንን ነው የምትፈልጉት?” አላቸው።  እነሱም “የናዝሬቱን ኢየሱስ” ሲሉ መለሱለት። እሱም “እኔ ነኝ” አላቸው። አሳልፎ የሚሰጠው ይሁዳም ከእነሱ ጋር ቆሞ ነበር።  ይሁን እንጂ ኢየሱስ “እኔ ነኝ” ሲላቸው ወደኋላ አፈግፍገው መሬት ላይ ወደቁ።  ዳግመኛም “ማንን ነው የምትፈልጉት?” ሲል ጠየቃቸው። እነሱም “የናዝሬቱን ኢየሱስ” አሉት።  ኢየሱስም መልሶ “እኔ ነኝ አልኳችሁ እኮ። የምትፈልጉት እኔን ከሆነ እነዚህን ተዉአቸው ይሂዱ” አለ፤  ይህም የሆነው “ከሰጠኸኝ ከእነዚህ መካከል አንዱም እንኳ አልጠፋብኝም” ብሎ የተናገረው ቃል ይፈጸም ዘንድ ነው። 10  በዚህ ጊዜ ስምዖን ጴጥሮስ ሰይፍ ይዞ ስለነበረ ሰይፉን መዞ የሊቀ ካህናቱን ባሪያ በመምታት ቀኝ ጆሮውን ቆረጠው። የባሪያውም ስም ማልኮስ ነበር። 11  ይሁን እንጂ ኢየሱስ ጴጥሮስን “ሰይፉን ወደ ሰገባው መልስ። ምንም ይምጣ ምን አብ የሰጠኝን ጽዋ መጠጣት አይኖርብኝም?” አለው። 12  ከዚያም ወታደሮቹና የጦር አዛዡ እንዲሁም ከአይሁድ የተላኩት የቤተ መቅደስ ጠባቂዎች ኢየሱስን ይዘው አሰሩት፤ 13  በመጀመሪያም ወደ ሐና ወሰዱት፤ ምክንያቱም ሐና በዚያ ዓመት ሊቀ ካህናት የነበረው የቀያፋ አማት ነበር። 14  ቀያፋ ደግሞ አንድ ሰው ስለ ሕዝቡ ቢሞት ለእነሱ የተሻለ እንደሚሆን ለአይሁዳውያን ምክር የሰጠው ሰው ነው። 15  ስምዖን ጴጥሮስና አንድ ሌላ ደቀ መዝሙር ኢየሱስን እየተከተሉ ነበር። ይህን ደቀ መዝሙር ሊቀ ካህናቱ ያውቀው ስለነበር ከኢየሱስ ጋር ወደ ሊቀ ካህናቱ ግቢ ገባ፤ 16  ጴጥሮስ ግን ውጭ በር ላይ ቆሞ ነበር። ስለሆነም ሊቀ ካህናቱ የሚያውቀው ይህ ደቀ መዝሙር ወጥቶ በር ጠባቂዋን አነጋገራትና ጴጥሮስን አስገባው። 17  በር ጠባቂ የነበረችውም አገልጋይ ጴጥሮስን “አንተም ከዚህ ሰው ደቀ መዛሙርት አንዱ ነህ አይደል?” አለችው። እሱም “አይደለሁም” አለ። 18  ብርድ ስለነበር ባሪያዎቹና የቤተ መቅደሱ ጠባቂዎች ከሰል በማቀጣጠል ቆመው እየሞቁ ነበር። ጴጥሮስም ከእነሱ ጋር ቆሞ እሳት ይሞቅ ነበር። 19  በዚህ ጊዜ የካህናት አለቃው ኢየሱስን ስለ ደቀ መዛሙርቱና ስለ ትምህርቱ ጠየቀው። 20  ኢየሱስም እንዲህ ሲል መለሰለት:- “እኔ ለዓለም በግልጽ ተናግሬአለሁ። አይሁዳውያን ሁሉ በሚሰበሰቡበት በምኩራብና በቤተ መቅደሱ ሁልጊዜ አስተምር ነበር፤ በስውር የተናገርኩት ምንም ነገር የለም። 21  እኔን ለምን ትጠይቀኛለህ? እኔ የነገርኳቸውን የሰሙትን ሰዎች ጠይቃቸው። እነዚህ የተናገርኩትን ያውቃሉ።” 22  ኢየሱስ ይህን በተናገረ ጊዜ አጠገቡ ቆመው ከነበሩት የቤተ መቅደስ ጠባቂዎች አንዱ በጥፊ መታውና “ለካህናት አለቃው እንዲህ ብለህ ትመልሳለህ?” አለው። 23  ኢየሱስም “የተሳሳተ ነገር ተናግሬ ከሆነ ስህተት መናገሬን መሥክር፤ ትክክል ከተናገርኩ ግን ለምን ትመታኛለህ?” ሲል መለሰለት። 24  ከዚያም ሐና ኢየሱስን እንደታሰረ ወደ ሊቀ ካህናቱ ወደ ቀያፋ ላከው። 25  ስምዖን ጴጥሮስም ቆሞ እሳት እየሞቀ ነበር። በዚህ ጊዜ ሰዎቹ “አንተም ከእሱ ደቀ መዛሙርት አንዱ ነህ አይደል?” አሉት። እሱም “አይደለሁም” ሲል ካደ። 26  ከሊቀ ካህናቱ ባሪያዎች አንዱ ይኸውም ጴጥሮስ ጆሮውን የቆረጠው ሰው ዘመድ “በአትክልቱ ስፍራ ከእሱ ጋር አይቼህ የለም እንዴ?” አለው። 27  ይሁን እንጂ ጴጥሮስ እንደገና ካደ፤ ወዲያውም ዶሮ ጮኸ። 28  ከዚያም ኢየሱስን ከቀያፋ ወደ ገዥው ቤተ መንግሥት ወሰዱት። ጊዜውም ማለዳ ነበር። ሆኖም እነሱ ፋሲካን መብላት ይችሉ ዘንድ እንዳይረክሱ ወደ ገዥው ቤተ መንግሥት አልገቡም። 29  ስለዚህ ጲላጦስ እነሱ ወዳሉበት ወጥቶ “በዚህ ሰው ላይ የምታቀርቡት ክስ ምንድን ነው?” አላቸው። 30  እነሱም መልሰው “ይህ ሰው ጥፋተኛ ባይሆን ኖሮ ለአንተ አሳልፈን አንሰጠውም ነበር” አሉት። 31  ጲላጦስም “እናንተ ራሳችሁ ወስዳችሁ በሕጋችሁ መሠረት ፍረዱበት” አላቸው። አይሁዳውያኑም “እኛ ማንንም ሰው ለመግደል ሕጉ አይፈቅድልንም” አሉት። 32  ይህ የሆነው ኢየሱስ ምን ዓይነት ሞት እንደሚጠብቀው ለማመልከት የተናገረው ቃል ይፈጸም ዘንድ ነው። 33  ስለሆነም ጲላጦስ ወደ ገዥው ቤተ መንግሥት ተመልሶ ገባና ኢየሱስን ጠርቶ “አንተ የአይሁድ ንጉሥ ነህ?” አለው። 34  ኢየሱስም “ይህን ያልከው ከራስህ ተነስተህ ነው ወይስ ሌሎች ስለ እኔ ነግረውህ ነው?” ሲል መለሰ። 35  ጲላጦስም “እኔ አይሁዳዊ አይደለሁም፤ ነኝ እንዴ? ለእኔ አሳልፈው የሰጡህ የራስህ ሕዝብና የካህናት አለቆች ናቸው። ያደረግከው ምንድን ነው?” ሲል መለሰ። 36  ኢየሱስ እንዲህ ሲል መለሰ:- “መንግሥቴ የዚህ ዓለም ክፍል አይደለም። መንግሥቴ የዚህ ዓለም ክፍል ቢሆን ኖሮ በአይሁዳውያን እጅ እንዳልወድቅ አገልጋዮቼ ይዋጉልኝ ነበር። አሁን ግን መንግሥቴ ከዚህ አይደለም።” 37  በዚህ ጊዜ ጲላጦስ “እንግዲያው አንተ ንጉሥ ነህ?” አለው። ኢየሱስም “እኔ ንጉሥ እንደሆንኩ አንተ ራስህ እየተናገርክ ነው። እኔ የተወለድኩትና ወደ ዓለም የመጣሁት ስለ እውነት እንድመሠክር ነው። ከእውነት ጎን የቆመ ሁሉ ቃሌን ይሰማል” ሲል መለሰ። 38  ጲላጦስም “እውነት ምንድን ነው?” አለው። ይህን ከተናገረ በኋላም እንደገና አይሁዳውያኑ ወዳሉበት ወጥቶ እንዲህ አላቸው:- “እኔ ምንም ጥፋት አላገኘሁበትም። 39  ከዚህም በላይ በልማዳችሁ መሠረት በፋሲካ አንድ ሰው ለእናንተ መፍታቴ አይቀርም። ስለዚህ የአይሁድን ንጉሥ እንድፈታላችሁ ትፈልጋላችሁ?” 40  በዚህ ጊዜ ዳግመኛ በመጮኽ “ይህን ሰው አንፈልግም፤ በርባንን ፍታልን!” አሉ። በርባን ወንበዴ ነበር።

የግርጌ ማስታወሻዎች