በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ዮሐንስ 14:1-31

14  “ልባችሁ አይረበሽ። በአምላክ እንደምታምኑ በተግባር አሳዩ፤ በእኔም እንደምታምኑ በተግባር አሳዩ።  በአባቴ ቤት ብዙ መኖሪያ አለ። እንዲህ ባይሆን ኖሮ እነግራችሁ ነበር፤ ምክንያቱም የምሄደው ለእናንተ ቦታ ለማዘጋጀት ነው።  ሄጄ ቦታ የማዘጋጅላችሁ ከሆነ ደግሞ እኔ ባለሁበት እናንተም እንድትሆኑ እንደገና መጥቼ እኔ ወዳለሁበት እወስዳችኋለሁ።  እኔ ወደምሄድበትም ቦታ የሚወስደውን መንገድ ታውቃላችሁ።”  ቶማስም “ጌታ ሆይ፣ ወዴት እንደምትሄድ አናውቅም። ታዲያ መንገዱን እንዴት ማወቅ እንችላለን?” አለው።  ኢየሱስም እንዲህ አለው:- “እኔ መንገድ፣ እውነትና ሕይወት ነኝ። በእኔ በኩል ካልሆነ በቀር ወደ አብ የሚመጣ የለም።  እኔን ብታውቁኝ ኖሮ አባቴንም ታውቁት ነበር፤ ከዚህ ጊዜ አንስቶ ታውቁታላችሁ፤ አይታችሁታልም።”  ፊልጶስም “ጌታ ሆይ፣ አብን አሳየንና ይበቃናል” አለው።  ኢየሱስም እንዲህ አለው:- “ፊልጶስ፣ ከእናንተ ጋር ይህን ያህል ረጅም ጊዜ ስኖር አላወቅከኝም? እኔን ያየ አብንም አይቷል። ታዲያ እንዴት ‘አብን አሳየን’ ትላለህ? 10  እኔ ከአብ ጋር አንድነት እንዳለኝና አብ ከእኔ ጋር አንድነት እንዳለው አታምንም? የምነግራችሁን ነገር የምናገረው ከራሴ አመንጭቼ አይደለም፤ ሆኖም ሥራውን እየሠራ ያለው ከእኔ ጋር አንድነት ያለው አብ ነው። 11  እኔ ከአብ ጋር አንድነት እንዳለኝ አብም ከእኔ ጋር አንድነት እንዳለው እመኑኝ፤ ካልሆነ ደግሞ ከተሠሩት ሥራዎች የተነሳ እመኑ። 12  እውነት እውነት እላችኋለሁ፣ በእኔ እንደሚያምን በተግባር የሚያሳይ እኔ የምሠራቸውን ሥራዎች ይሠራል፤ እንዲያውም እኔ ወደ አብ ስለምሄድ እሱ ከእነዚህ የበለጡ ሥራዎች ይሠራል። 13  በተጨማሪም አብ በወልድ አማካኝነት ይከብር ዘንድ በስሜ የምትለምኑትን ሁሉ አደርገዋለሁ። 14  ማንኛውንም ነገር በስሜ ከለመናችሁ እኔ አደርገዋለሁ። 15  “የምትወዱኝ ከሆነ ትእዛዛቴን ትጠብቃላችሁ፤ 16  እኔም አብን እጠይቃለሁ፤ እሱም ለዘላለም ከእናንተ ጋር የሚሆን ሌላ ረዳት ይሰጣችኋል፤ 17  እሱም የእውነት መንፈስ ነው፤ ዓለም ስለማያየውና ስለማያውቀው ሊቀበለው አይችልም። እናንተ ግን አብሯችሁ ስለሚኖርና በውስጣችሁ ስላለ ታውቁታላችሁ። 18  ሐዘን* ላይ ትቻችሁ አልሄድም። ወደ እናንተ እመጣለሁ። 19  ከጥቂት ጊዜ በኋላ ዓለም ከቶ አያየኝም፤ እናንተ ግን ታዩኛላችሁ፤ ምክንያቱም እኔ እየኖርኩ ነው፣ እናንተም ትኖራላችሁ። 20  በዚያን ቀን እኔ ከአባቴ ጋር አንድነት እንዳለኝ፣ እናንተ ከእኔ ጋር አንድነት እንዳላችሁና እኔ ከእናንተ ጋር አንድነት እንዳለኝ ታውቃላችሁ። 21  እኔን የሚወደኝ ትእዛዛቴን የሚቀበልና የሚጠብቅ ነው። እኔን የሚወደኝን ደግሞ አባቴ ይወደዋል፤ እኔም እወደዋለሁ፣ ራሴንም እገልጥለታለሁ።” 22  የአስቆሮቱ ሳይሆን ሌላው ይሁዳ “ጌታ ሆይ፣ ለዓለም ሳይሆን ለእኛ ራስህን ለመግለጥ ያሰብከው ለምንድን ነው?” አለው። 23  ኢየሱስም እንዲህ ሲል መለሰለት:- “ማንም ሰው እኔን የሚወደኝ ከሆነ ቃሌን ይጠብቃል፤ አባቴም ይወደዋል፣ እኛም ወደ እሱ መጥተን መኖሪያችንን ከእሱ ጋር እናደርጋለን። 24  እኔን የማይወደኝ ቃሌን አይጠብቅም፤ ይህ እየሰማችሁት ያለው ቃል ደግሞ የላከኝ የአብ ነው እንጂ የእኔ አይደለም። 25  “አሁን ከእናንተ ጋር እያለሁ እነዚህን ነገሮች ነግሬአችኋለሁ። 26  አብ በስሜ የሚልከው ረዳት ይኸውም መንፈስ ቅዱስ ሁሉንም ነገር ያስተምራችኋል እንዲሁም የነገርኳችሁን ነገር ሁሉ እንድታስታውሱ ያደርጋችኋል። 27  ሰላምን እተውላችኋለሁ፤ ሰላሜን እሰጣችኋለሁ። እኔ ሰላም የምሰጣችሁ ዓለም በሚሰጥበት መንገድ አይደለም። ልባችሁ አይረበሽ፤ በፍርሃትም አይዋጥ። 28  እሄዳለሁ ወደ እናንተም ተመልሼ እመጣለሁ እንዳልኳችሁ ሰምታችኋል። የምትወዱኝ ቢሆን ኖሮ ወደ አብ በመሄዴ ደስ ባላችሁ ነበር፤ ምክንያቱም አብ ከእኔ ይበልጣል። 29  በመሆኑም በሚፈጸምበት ጊዜ እንድታምኑ ከመፈጸሙ በፊት አሁን ነግሬአችኋለሁ። 30  የዚህ ዓለም ገዥ እየመጣ ስለሆነ ከዚህ በኋላ ከእናንተ ጋር ብዙ አልነጋገርም። እሱም በእኔ ላይ ምንም ኃይል የለውም፤ 31  ይሁን እንጂ እኔ አብን እንደምወድ ዓለም እንዲያውቅ አብ የሰጠኝን ትእዛዝ እየፈጸምኩ ነው። ተነሱ ከዚህ እንሂድ።

የግርጌ ማስታወሻዎች

ዮሐ 14:18 * ወይም፣ “ወላጆቻቸው እንደሞቱባቸው ልጆች።”