በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ዮሐንስ 13:1-38

13  የፋሲካ በዓል ተቃርቦ በነበረበት ወቅት ኢየሱስ ይህን ዓለም ለቆ ወደ አብ የሚሄድበት ሰዓት እንደደረሰ ስላወቀ በዓለም ያሉትን ቀድሞውኑ ይወዳቸው የነበሩትን ተከታዮቹን እስከ መጨረሻው ወደዳቸው።  ቀደም ሲል ዲያብሎስ በስምዖን ልጅ በአስቆሮቱ ይሁዳ ልብ ውስጥ ኢየሱስን አሳልፎ የመስጠት ሐሳብ አሳድሮ ነበር። ራት እየበሉ ሳለም  ኢየሱስ፣ አብ ሁሉን ነገር በእጁ እንደሰጠው እንዲሁም ከአምላክ እንደመጣና ወደ አምላክ እንደሚሄድ ያውቅ ስለነበር  ከራት ተነስቶ መደረቢያዎቹን አስቀመጠ። ፎጣ ወስዶም አሸረጠ።  ከዚያም በመታጠቢያ ዕቃ ውስጥ ውኃ ጨምሮ የደቀ መዛሙርቱን እግር ማጠብና ባሸረጠው ፎጣ ማድረቅ ጀመረ።  ወደ ስምዖን ጴጥሮስም መጣ። እሱም “ጌታ ሆይ፣ እግሬን ልታጥብ ነው?” አለው።  ኢየሱስም መልሶ “እያደረግኩት ያለውን ነገር አሁን አትረዳውም፤ በኋላ ግን ትረዳዋለህ” አለው።  ጴጥሮስም “በፍጹም እግሬን አታጥብም” አለው። ኢየሱስም “ካላጠብኩህ ከእኔ ጋር ምንም ድርሻ አይኖርህም” ሲል መለሰለት።  ስምዖን ጴጥሮስም “ጌታ ሆይ፣ እግሬን ብቻ ሳይሆን እጄንና ራሴንም እጠበኝ” አለው። 10  ኢየሱስም “ገላውን የታጠበ ሁለመናው ንጹሕ በመሆኑ ከእግሩ በስተቀር መታጠብ አያስፈልገውም። እናንተ ንጹሖች ናችሁ፤ ሁላችሁም ግን አይደላችሁም” አለው። 11  አሳልፎ የሚሰጠው ሰው ማን እንደሆነ ያውቅ ነበር። “ሁላችሁም ንጹሖች አይደላችሁም” ያለው ለዚህ ነው። 12  እግራቸውን አጥቦ ካበቃና መደረቢያዎቹን ለብሶ ዳግመኛ በማዕድ ከተቀመጠ በኋላ እንዲህ አላቸው:- “ምን እንዳደረግኩላችሁ አስተዋላችሁ? 13  እናንተ ‘መምህር’ እና ‘ጌታ’ ብላችሁ ትጠሩኛላችሁ፤ እንደዚያ ስለሆንኩም እንዲህ ብላችሁ መጥራታችሁ ትክክል ነው። 14  ስለዚህ እኔ ጌታና መምህር ሆኜ ሳለሁ እግራችሁን ካጠብኩ እናንተም እርስ በርሳችሁ እግራችሁን ልትተጣጠቡ ይገባችኋል። 15  እኔ እንዳደረግኩላችሁ እናንተም እንደዚሁ እንድታደርጉ አርዓያ ሆኜላችኋለሁ። 16  እውነት እውነት እላችኋለሁ፣ ባሪያ ከጌታው አይበልጥም፤ የተላከም ከላከው አይበልጥም። 17  እነዚህን ነገሮች ስለምታውቁ ብትፈጽሟቸው ደስተኞች ናችሁ። 18  ይህን ስል ስለ ሁላችሁም መናገሬ አይደለም፤ የመረጥኳቸውን አውቃለሁ። ይሁንና ‘ከማዕዴ ይበላ የነበረ ተረከዙን በእኔ ላይ አነሳ’ የሚለው የቅዱሳን መጻሕፍት ቃል ይፈጸም ዘንድ ነው። 19  ገና ሳይፈጸም በፊት አሁን የምነግራችሁ፣ በሚፈጸምበት ጊዜ እኔ እሱ መሆኔን እንድታምኑ ነው። 20  እውነት እውነት እላችኋለሁ፣ እኔ የምልከውን ሁሉ የሚቀበል እኔንም ይቀበላል። እኔን የሚቀበል ደግሞ የላከኝንም ይቀበላል።” 21  ኢየሱስ እነዚህን ነገሮች ከተናገረ በኋላ መንፈሱ ተረብሾ “እውነት እውነት እላችኋለሁ፣ ከእናንተ አንዱ አሳልፎ ይሰጠኛል” ሲል በግልጽ ተናገረ። 22  ደቀ መዛሙርቱም ስለ ማን እየተናገረ እንዳለ ግራ ገብቷቸው እርስ በርሳቸው ይተያዩ ጀመር። 23  ከደቀ መዛሙርቱም አንዱ ወደ ኢየሱስ ደረት ተጠግቶ ተቀምጦ ነበር፤ ኢየሱስም ይወደው ነበር። 24  ስለዚህ ስምዖን ጴጥሮስ ለዚህ ደቀ መዝሙር በጭንቅላቱ ምልክት በመስጠት “ስለ ማን እየተናገረ እንዳለ ንገረን” አለው። 25  እሱም ወደ ኢየሱስ ደረት ጠጋ ብሎ “ጌታ ሆይ፣ ማን ነው?” አለው። 26  በዚህ ጊዜ ኢየሱስ “ይህን የማጠቅሰውን ቁራሽ የምሰጠው ሰው ነው” ሲል መለሰ። ስለሆነም ቁራሹን አጥቅሶ ለአስቆሮቱ ስምዖን ልጅ ለይሁዳ ሰጠው። 27  ይሁዳም ቁራሹን ከተቀበለ በኋላ ሰይጣን ገባበት። ስለዚህ ኢየሱስ “እያደረግከው ያለኸውን ነገር ቶሎ አድርገው” አለው። 28  ይሁን እንጂ በማዕድ ከተቀመጡት መካከል አንዳቸውም ለምን እንዲህ እንዳለው አላወቁም። 29  እንዲያውም አንዳንዶቹ ይሁዳ የገንዘብ ሣጥኑን ይይዝ ስለነበር ኢየሱስ “ለበዓሉ የሚያስፈልጉንን ነገሮች ግዛ” ያለው ወይም ለድሆች እንዲሰጥ ያዘዘው መስሏቸው ነበር። 30  ስለዚህ ይሁዳ ቁራሹን ከተቀበለ በኋላ ወዲያውኑ ወጣ። ጊዜውም ሌሊት ነበር። 31  ይሁዳ ከሄደ በኋላ ኢየሱስ እንዲህ አለ:- “አሁን የሰው ልጅ ከበረ፤ አምላክም በእሱ አማካኝነት ከበረ። 32  አምላክ ራሱም ያከብረዋል፤ ደግሞም ወዲያው ያከብረዋል። 33  ልጆቼ ሆይ፣ ጥቂት ጊዜ ከእናንተ ጋር እቆያለሁ። እናንተም ትፈልጉኛላችሁ፤ ለአይሁዳውያን ‘ወደምሄድበት ልትመጡ አትችሉም’ እንዳልኳቸው ሁሉ አሁን ደግሞ ለእናንተ ይህንኑ እላችኋለሁ። 34  እርስ በርሳችሁ እንድትዋደዱ አዲስ ትእዛዝ እየሰጠኋችሁ ነው፤ ልክ እኔ እንደ ወደድኳችሁ እናንተም እርስ በርሳችሁ ተዋደዱ። 35  በመካከላችሁ ፍቅር ካለ ሰዎች ሁሉ ደቀ መዛሙርቴ እንደሆናችሁ በዚህ ያውቃሉ።” 36  ስምዖን ጴጥሮስም “ጌታ ሆይ፣ ወዴት ልትሄድ ነው?” አለው። ኢየሱስም “እኔ ወደምሄድበት አሁን ልትከተለኝ አትችልም፤ በኋላ ግን ትከተለኛለህ” ሲል መለሰ። 37  ጴጥሮስም “ጌታ ሆይ፣ አሁን ልከተልህ የማልችለው ለምንድን ነው? ነፍሴን ስለ አንተ አሳልፌ እሰጣለሁ” አለው። 38  ኢየሱስም “ነፍስህን ስለ እኔ አሳልፈህ ትሰጣለህ? እውነት እውነት እልሃለሁ፣ ዶሮ ከመጮኹ በፊት ሦስት ጊዜ ትክደኛለህ” ሲል መለሰ።

የግርጌ ማስታወሻዎች