በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ዮሐንስ 12:1-50

12  ኢየሱስ የፋሲካ በዓል ከመድረሱ ከስድስት ቀን በፊት እሱ ከሞት ያስነሳው አልዓዛር ወደሚኖርባት ወደ ቢታንያ መጣ።  በዚያም የራት ግብዣ አዘጋጁለት፤ ማርታ ታገለግላቸው የነበረ ሲሆን አልዓዛር ግን ከእሱ ጋር በማዕድ ከቀረቡት አንዱ ነበር።  ማርያምም ግማሽ ሊትር ገደማ የሚሆን እጅግ ውድ የሆነ ንጹሕ የናርዶስ ሽቶ አምጥታ የኢየሱስን እግር ቀባች፤ እግሩንም በፀጉሯ አብሳ አደረቀች። ቤቱም በሽቶው መዓዛ ታወደ።  ሆኖም ከደቀ መዛሙርቱ አንዱ የሆነውና አሳልፎ ሊሰጠው እያሰበ ያለው የአስቆሮቱ ይሁዳ እንዲህ አለ:-  “ይህ ሽቶ በሦስት መቶ ዲናር ተሸጦ ለድሆች ያልተሰጠው ለምንድን ነው?”  ይሁንና ይህን ያለው ለድሆች አስቦ ሳይሆን ሌባ ስለነበረ ነው፤ የገንዘብ ሣጥኑን ይይዝ የነበረው እሱ በመሆኑ ወደ ሣጥኑ ከሚገባው ገንዘብ የመውሰድ ልማድ ነበረው።  በዚህ ጊዜ ኢየሱስ እንዲህ አለ:- “ለቀብሬ ቀን ለማዘጋጀት ብላ ያደረገችው ስለሆነ ይህን ልማድ እንዳትፈጽም አትከልክሏት።  ድሆች ሁልጊዜ ከእናንተ ጋር ናቸው፤ እኔ ግን ሁልጊዜ ከእናንተ ጋር አልኖርም።”  በዚህ ጊዜ ብዙ አይሁዳውያን ኢየሱስ እዚያ መኖሩን አውቀው መጡ፤ የመጡትም ኢየሱስን ብለው ብቻ ሳይሆን እሱ ከሞት ያስነሳውን አልዓዛርንም ለማየት ነበር። 10  በመሆኑም የካህናት አለቆች አልዓዛርንም ለመግደል ተማከሩ፤ 11  ምክንያቱም በእሱ የተነሳ ብዙ አይሁዳውያን ወደዚያ በመሄድ በኢየሱስ ያምኑ ነበር። 12  በማግስቱም ወደ በዓሉ የመጡ እጅግ ብዙ ሰዎች ኢየሱስ ወደ ኢየሩሳሌም እየመጣ መሆኑን ሲሰሙ 13  የዘንባባ ዝንጣፊ ይዘው ሊቀበሉት ወጡ። እንዲህ እያሉም ይጮኹ ጀመር:- “እባክህ አድነው! በይሖዋ ስም የሚመጣው፣ አዎ፣ የእስራኤል ንጉሥ የተባረከ ነው!” 14  ኢየሱስም የአህያ ውርንጭላ አግኝቶ ተቀመጠበት፤ ይህም የሆነው እንዲህ ተብሎ በተጻፈው መሠረት ነው:- 15  “የጽዮን ልጅ ሆይ፣ አትፍሪ። እነሆ ንጉሥሽ በአህያ ውርንጭላ ላይ ተቀምጦ ይመጣል።” 16  ደቀ መዛሙርቱ በመጀመሪያ እነዚህን ነገሮች አላስተዋሉም ነበር፤ ኢየሱስ ክብር በተጎናጸፈ ጊዜ ግን እነዚህ ነገሮች የተጻፉት ስለ እሱ እንደሆነና እነዚህን ነገሮች ለእሱ እንዳደረጉለት ትዝ አላቸው። 17  ኢየሱስ አልዓዛርን ከመታሰቢያ መቃብር ጠርቶ ከሞት ባስነሳበት ጊዜ አብረውት የነበሩት ሰዎች ስላዩት ነገር መመሥከራቸውን ቀጥለው ነበር። 18  ከዚህም የተነሳ ይህን ተአምራዊ ምልክት እንደፈጸመ የሰማውም ሕዝብ ሊቀበለው ወጣ። 19  ስለዚህ ፈሪሳውያን እርስ በርሳቸው “ምንም ማድረግ እንዳልቻላችሁ አያችሁ! ተመልከቱ፣ ዓለሙ ሁሉ ግልብጥ ብሎ ተከትሎታል” ተባባሉ። 20  ለአምልኮ ወደ በዓሉ ከመጡት ሰዎች መካከል አንዳንድ ግሪኮች ነበሩ። 21  እነሱም በገሊላ የምትገኘው የቤተሳይዳ ሰው ወደሆነው ወደ ፊልጶስ ቀርበው “ጌታ ሆይ፣ ኢየሱስን ማየት እንፈልጋለን” ብለው ጠየቁት። 22  ፊልጶስ መጥቶ ለእንድርያስ ነገረው። እንድርያስና ፊልጶስ ደግሞ መጥተው ለኢየሱስ ነገሩት። 23  ኢየሱስ ግን እንዲህ ሲል መለሰላቸው:- “የሰው ልጅ ክብር የሚያገኝበት ሰዓት ደርሷል። 24  እውነት እውነት እላችኋለሁ፣ አንዲት የስንዴ ዘር መሬት ላይ ወድቃ ካልሞተች አንድ ዘር ብቻ ሆና ትቀራለች፤ ከሞተች ግን ብዙ ፍሬ ታፈራለች። 25  ነፍሱን የሚወድ ያጠፋታል፤ በዚህ ዓለም ነፍሱን የሚጠላ ግን ለዘላለም ሕይወት ይጠብቃታል። 26  እኔን ሊያገለግል የሚፈልግ ቢኖር ይከተለኝ፤ እኔ ባለሁበት አገልጋዬም በዚያ ይሆናል። የሚያገለግለኝንም ሁሉ አብ ያከብረዋል። 27  አሁን ነፍሴ ተጨንቃለች፤ እንግዲህ ምን ማለት እችላለሁ? አባት ሆይ፣ ከዚህ ሰዓት አድነኝ። ይሁንና የመጣሁት ለዚህ ሰዓት ነው። 28  አባት ሆይ፣ ስምህን አክብረው።” በዚህ ጊዜ “ስሜን አክብሬዋለሁ፤ ደግሞም አከብረዋለሁ” የሚል ድምፅ ከሰማይ መጣ። 29  በመሆኑም በዚያ ቆመው የነበሩትና ድምፁን የሰሙት ብዙ ሰዎች ነጎድጓድ እንደሆነ ይናገሩ ጀመር። ሌሎች ደግሞ “መልአክ አናገረው” ይሉ ጀመር። 30  ኢየሱስም እንዲህ ሲል መለሰ:- “ይህ ድምፅ የተሰማው ለእኔ ሳይሆን ለእናንተ ሲባል ነው። 31  ይህ ዓለም የሚፈረድበት ጊዜ አሁን ነው፤ የዚህ ዓለም ገዥ አሁን ወደ ውጭ ይጣላል። 32  ይሁንና እኔ ከምድር ወደ ላይ ከፍ ከተደረግኩ ሁሉንም ዓይነት ሰዎች ወደ እኔ እስባለሁ።” 33  ይህን የተናገረው በቅርብ ጊዜ ውስጥ ምን ዓይነት አሟሟት እንደሚሞት ለማመልከት ነው። 34  በዚህ ጊዜ ሕዝቡ “ክርስቶስ ለዘላለም እንደሚኖር ከሕጉ ሰምተናል፤ ታዲያ አንተ የሰው ልጅ ከፍ ማለት አለበት እንዴት ትላለህ? ይህ የሰው ልጅ ማን ነው?” ብለው መለሱለት። 35  ኢየሱስም እንዲህ አላቸው:- “ብርሃኑ ለጥቂት ጊዜ ከእናንተ ጋር ይቆያል። ጨለማ እንዳይውጣችሁ ብርሃኑ እያለላችሁ በብርሃን ሂዱ፤ በጨለማ የሚሄድ ወዴት እንደሚሄድ አያውቅም። 36  የብርሃን ልጆች እንድትሆኑ ብርሃኑ እያለላችሁ በብርሃኑ ላይ እምነት እንዳላችሁ አሳዩ።” ኢየሱስ ይህን ተናግሮ እንደጨረሰ ሄደ፤ ከእነሱም ተሰወረ። 37  ይሁንና በፊታቸው ብዙ ተአምራዊ ምልክቶች ቢፈጽምም በእሱ አላመኑም፤ 38  ስለሆነም ነቢዩ ኢሳይያስ እንዲህ ሲል የተናገረው ቃል ተፈጸመ:- “ይሖዋ ሆይ፣ እኛ የሰማነውን ነገር ማን አመነ? የይሖዋስ ክንድ ለማን ተገለጠ?” 39  ሊያምኑ ያልቻሉት ኢሳይያስ እንዲህ ብሎም ስለተናገረ ነው:- 40  “በዓይናቸው አይተውና በልባቸው መልእክቱን አስተውለው እንዳይመለሱና እንዳልፈውሳቸው ዓይናቸውን አሳውሯል፣ ልባቸውንም አደንድኗል።” 41  ኢሳይያስ ይህን የተናገረው የክርስቶስን ክብር ስላየ ነው፤ ስለ እሱም ተናገረ። 42  ያም ሆኖ ከገዥዎችም እንኳ ሳይቀር ብዙዎች በእሱ አመኑ፤ ነገር ግን ፈሪሳውያን ከምኩራብ እንዳያስወጧቸው ስለፈሩ በእሱ ማመናቸውን በግልጽ አይናገሩም ነበር፤ 43  ይህም የሆነው ከሰው የሚገኘውን ክብር ከአምላክ ከሚገኘው ክብር እንኳ ሳይቀር አስበልጠው ስለወደዱ ነው። 44  ይሁን እንጂ ኢየሱስ ድምፁን ከፍ አድርጎ እንዲህ አለ:- “በእኔ የሚያምን በእኔ ብቻ ሳይሆን በላከኝም ጭምር ያምናል፤ 45  እኔን የሚያይ የላከኝንም ያያል። 46  በእኔ የሚያምን ሁሉ በጨለማ እንዳይኖር ብርሃን ሆኜ ወደ ዓለም መጥቻለሁ። 47  ይሁንና ማንም ሰው ቃሌን ሰምቶ የማይጠብቅ ከሆነ የምፈርድበት እኔ አይደለሁም፤ ምክንያቱም እኔ የመጣሁት ዓለምን ለማዳን እንጂ በዓለም ላይ ለመፍረድ አይደለም። 48  እኔን የሚንቀውንና ቃሌን የማይቀበለውን ሰው የሚፈርድበት አለ። በመጨረሻው ቀን የሚፈርድበት የተናገርኩት ቃል ነው፤ 49  ምክንያቱም እኔ የተናገርኩት በራሴ ተነሳስቼ አይደለም፤ ከዚህ ይልቅ ምን እንደምልና ምን እንደምናገር ያዘዘኝ የላከኝ አብ ራሱ ነው። 50  ደግሞም የእሱ ትእዛዝ የዘላለም ሕይወት ማለት እንደሆነ አውቃለሁ። ስለዚህ የምናገረው ልክ አባቴ በነገረኝ መሠረት እነዚያኑ ነገሮች ነው።”

የግርጌ ማስታወሻዎች