በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ዮሐንስ 1:1-51

1  በመጀመሪያ ቃል ነበረ፤ ቃልም ከአምላክ ጋር ነበር፤ ቃልም አምላክ* ነበር።  እሱም በመጀመሪያ ከአምላክ ጋር ነበር።  ሁሉም ነገሮች ወደ ሕልውና የመጡት በእሱ በኩል ነው፤ ያለ እሱ ወደ ሕልውና የመጣ አንድም ነገር እንኳ የለም።  በእሱ አማካኝነት ወደ ሕልውና የመጣውም ሕይወት ነበር፤ ሕይወት ደግሞ የሰው ብርሃን ነበር።  ብርሃኑም በጨለማ እየበራ ነው፤ ጨለማውም አላሸነፈውም።  የአምላክ ተወካይ ሆኖ የተላከ አንድ ሰው ነበር፤ እሱም ዮሐንስ ይባላል።  ይህ ሰው የመጣው ለመመሥከር ይኸውም ስለ ብርሃን ለመመሥከር ነው፤ ይህንም ያደረገው ሁሉም ዓይነት ሰዎች በእሱ በኩል ያምኑ ዘንድ ነው።  ይህ ብርሃን እሱ አልነበረም፤ ከዚህ ይልቅ የመጣው ስለዚህ ብርሃን ሊመሠክር ነው።  ለሁሉም ዓይነት ሰው ብርሃን የሚሰጠው እውነተኛው ብርሃን ወደ ዓለም የሚመጣበት ጊዜ ደርሶ ነበር። 10  እሱም በዓለም ነበረ፤ ዓለምም ወደ ሕልውና የመጣው በእሱ በኩል ነው፤ ሆኖም ዓለም አላወቀውም። 11  ወደ ገዛ አገሩ መጣ፤ ነገር ግን የገዛ ወገኖቹ አልተቀበሉትም። 12  ለተቀበሉት ሁሉ ግን በስሙ እምነት እንዳላቸው ስላሳዩ የአምላክ ልጆች የመሆን መብት ሰጣቸው፤ 13  እነሱም የተወለዱት ከአምላክ እንጂ ከደም ወይም ከሥጋ ፈቃድ ወይም ከወንድ ፈቃድ አይደለም። 14  ቃልም ሥጋ ሆነ፣ በመካከላችንም ኖረ፤ አንድያ ልጅ ከአባቱ እንደሚያገኘው ክብር ያለ ክብሩን አየን፤ እሱም ጸጋንና እውነትን ተሞልቶ ነበር። 15  (ዮሐንስ ስለ እሱ መሥክሯል፤ እንዲያውም ድምፁን ከፍ አድርጎ ተናግሯል። “ከእኔ ኋላ የሚመጣው ከእኔ በፊት ስለነበረ ከእኔ ቀድሞ ሄዷል” ብሎ የተናገረው እሱ ነው።) 16  ከእሱ የጸጋ ሙላት የተነሳ ሁላችንም በጸጋ ላይ ጸጋን ተቀብለናል። 17  ምክንያቱም ሕጉ የተሰጠው በሙሴ በኩል ነበር፤ ጸጋና እውነት ግን የመጣው በኢየሱስ ክርስቶስ በኩል ነው። 18  በየትኛውም ጊዜ ቢሆን አምላክን ያየው አንድም ሰው የለም፤ ስለ እሱ የገለጸልን በአባቱ እቅፍ* ያለውና አምላክ የሆነው አንድያ ልጁ ነው። 19  አይሁዳውያን፣ “አንተ ማን ነህ?” ብለው እንዲጠይቁት ከኢየሩሳሌም ካህናትንና ሌዋውያንን በላኩ ጊዜ ዮሐንስ የሰጠው ምሥክርነት ይህ ነው፤ 20  “እኔ ክርስቶስ አይደለሁም” ብሎ በግልጽ ተናገረ እንጂ ጥያቄውን ከመመለስ ወደኋላ አላለም። 21  እነሱም “ታዲያ ማን ነህ? ኤልያስ ነህ?” ሲሉ ጠየቁት። እሱም “አይደለሁም” አለ። “ነቢዩ ነህ?” አሉት። እሱም “አይደለሁም!” ሲል መለሰ። 22  በዚህ ጊዜ “ለላኩን ሰዎች መልስ መስጠት እንድንችል ታዲያ አንተ ማን ነህ? ስለ ራስህስ ምን ትላለህ?” አሉት። 23  እሱም “ነቢዩ ኢሳይያስ እንደተናገረው ‘የይሖዋን መንገድ አቅኑ’ እያለ በምድረ በዳ የሚጮኽ ሰው ድምፅ ነኝ” አለ። 24  የላኳቸውም ፈሪሳውያን ነበሩ። 25  በመሆኑም “ታዲያ አንተ ራስህ ክርስቶስ ወይም ኤልያስ ወይም ነቢዩ ካልሆንክ ለምን ታጠምቃለህ?” ሲሉ ጠየቁት። 26  ዮሐንስም መልሶ እንዲህ አላቸው:- “እኔ በውኃ አጠምቃለሁ። እናንተ የማታውቁት ግን በመካከላችሁ ቆሟል፤ 27  እሱም ከኋላዬ ይመጣል፤ ይሁንና እኔ የጫማውን ማሰሪያ እንኳ ለመፍታት አልበቃም።” 28  ይህ የሆነው ዮሐንስ ሲያጠምቅ ከነበረበት ከዮርዳኖስ ማዶ በሚገኘው በቢታንያ ነበር። 29  በማግስቱ ኢየሱስ ወደ እሱ ሲመጣ አይቶ እንዲህ አለ:- “የዓለምን ኃጢአት የሚያስወግደው የአምላክ በግ ይኸውላችሁ! 30  ‘ከኋላዬ አንድ ሰው ይመጣል፤ ከእኔ በፊት ስለነበረ ከእኔ ቀድሞ ሄዷል’ ያልኳችሁ እሱ ነው። 31  እኔ ራሴም እንኳ አላውቀውም ነበር፤ እኔ በውኃ እያጠመቅኩ የመጣሁበት ምክንያት ግን እሱ ለእስራኤል እንዲገለጥ ነው።” 32  በተጨማሪም ዮሐንስ እንዲህ ሲል ምሥክርነት ሰጥቷል:- “መንፈስ ከሰማይ ወጥቶ እንደ ርግብ ሲወርድ አይቻለሁ፤ በእሱም ላይ አረፈ። 33  እኔ ራሴም እንኳ አላውቀውም ነበር፤ ሆኖም በውኃ እንዳጠምቅ የላከኝ ራሱ ‘በመንፈስ ቅዱስ የሚያጠምቀው፣ መንፈስ ሲወርድበትና ሲያርፍበት የምታየው ያ ሰው ነው’ አለኝ። 34  እኔም አይቻለሁ፤ እሱም የአምላክ ልጅ መሆኑን መሥክሬያለሁ።” 35  በማግስቱም ዮሐንስ ከሁለት ደቀ መዛሙርቱ ጋር እንደገና ቆሞ ነበር፤ 36  ኢየሱስ ሲሄድ አይቶም “የአምላክ በግ ይኸውላችሁ!” አለ። 37  ሁለቱ ደቀ መዛሙርትም ይህን ሲናገር ሰምተው ኢየሱስን ተከተሉት። 38  ከዚያም ኢየሱስ ዞር ብሎ ሲከተሉት አየና “ምን ፈልጋችሁ ነው?” አላቸው። እነሱም “ረቢ፣ (ትርጉሙም መምህር ማለት ነው) የት ነው የምትኖረው?” አሉት። 39  እሱም “ኑና እዩ” አላቸው። ስለዚህ ሄደው የት እንደሚኖር አዩ፤ በዚያም ዕለት አብረውት ዋሉ፤ ጊዜውም አሥር ሰዓት ገደማ ነበር። 40  ዮሐንስ የተናገረውን ከሰሙትና ኢየሱስን ከተከተሉት ሁለት ሰዎች አንዱ የስምዖን ጴጥሮስ ወንድም እንድርያስ ነበር። 41  እንድርያስ በመጀመሪያ የራሱን ወንድም ስምዖንን አገኘውና “መሲሑን (ትርጉሙ ክርስቶስ ማለት ነው) አገኘነው” አለው። 42  ወደ ኢየሱስም ወሰደው። ኢየሱስም ባየው ጊዜ “አንተ የዮሐንስ ልጅ ስምዖን ነህ፤ ኬፋ (ትርጉሙ ጴጥሮስ ማለት ነው) ተብለህ ትጠራለህ” አለው። 43  በማግስቱ ኢየሱስ ወደ ገሊላ ለመሄድ ፈለገ። ፊልጶስንም አግኝቶ “ተከታዬ ሁን” አለው። 44  ፊልጶስም እንደ እንድርያስና እንደ ጴጥሮስ ሁሉ የቤተሳይዳ ከተማ ሰው ነበረ። 45  ፊልጶስ ናትናኤልን አግኝቶ “ሙሴ በሕጉ እንዲሁም ነቢያት ስለ እሱ የጻፉለትን የዮሴፍን ልጅ የናዝሬቱን ኢየሱስ አገኘነው” አለው። 46  ናትናኤል ግን “ደግሞ ከናዝሬት ጥሩ ነገር ሊገኝ ይችላል?” አለው። ፊልጶስም “መጥተህ እይ” አለው። 47  ኢየሱስም ናትናኤል ወደ እሱ ሲመጣ አይቶ ስለ እሱ “ተንኮል የሌለበት እውነተኛ እስራኤላዊ ይኸውላችሁ!” አለ። 48  ናትናኤልም “እንዴት ልታውቀኝ ቻልክ?” አለው። ኢየሱስም መልሶ “ገና ፊልጶስ ሳይጠራህ ከበለስ ዛፍ ሥር ሳለህ አይቼሃለሁ” አለው። 49  ናትናኤልም “ረቢ፣ አንተ የአምላክ ልጅ ነህ፤ አንተ የእስራኤል ንጉሥ ነህ” ሲል መለሰለት። 50  ኢየሱስም መልሶ “ያመንከው ከበለስ ዛፍ ሥር አየሁህ ስላልኩህ ነው? ከዚህ የሚበልጡ ነገሮች ገና ታያለህ” አለው። 51  አክሎም “እውነት እውነት እላችኋለሁ እናንተ ሰዎች፣ ሰማይ ተከፍቶ የአምላክ መላእክት ወደ ሰው ልጅ ሲወጡና ሲወርዱ ታያላችሁ” አለው።

የግርጌ ማስታወሻዎች

ዮሐ 1:1 * እንደ አምላክ ያለ፣ የመለኮትነት ባሕርይ የተላበሰ፤ ከተጨማሪው መረጃ ላይ 3ኛውን ርዕስ ተመልከት።
ዮሐ 1:18 * ልዩ ሞገስ ማግኘትን ያመለክታል።