በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

ያዕቆብ 5:1-20

5  እናንተ ሀብታሞች እንግዲህ ስሙ፤ እየመጣባችሁ ባለው መከራ አልቅሱ እንዲሁም አላዝኑ።  ሀብታችሁ በስብሷል፣ መደረቢያችሁንም ብል በልቶታል።  ወርቃችሁና ብራችሁ ሙሉ በሙሉ ዝጓል፤ ዝገቱም በእናንተ ላይ ይመሠክራል፤ ሥጋችሁንም ይበላል። በመጨረሻዎቹ ቀናት ያከማቻችሁት እንደ እሳት ያለ ነገር ነው።  እነሆ፣ በእርሻችሁ ላይ ያለውን ሰብል ላጨዱት ሠራተኞች መክፈል ሲገባችሁ ሳትከፍሏቸው የቀራችሁት ደሞዝ በመጮኽ ላይ ይገኛል፤ አጫጆቹም ለእርዳታ የሚያሰሙት ጥሪ ወደ ሠራዊት ጌታ ወደ ይሖዋ ጆሮ ደርሷል።  በምድር ላይ በቅንጦት ኖራችኋል፤ ደግሞም ለሥጋዊ ደስታ ራሳችሁን አሳልፋችሁ ሰጥታችኋል። እስከ ዕርድ ቀን ድረስ እንደሚደልቡ እንስሳት ልባችሁን አወፍራችኋል።  ጻድቁን ኮነናችሁት እንዲሁም ገደላችሁት። እሱ እየተቃወማችሁ አይደለም?  ስለዚህ ወንድሞች፣ ጌታ እስከሚገኝበት* ጊዜ ድረስ በትዕግሥት ጠብቁ። እነሆ፣ ገበሬ የመጀመሪያውንና የኋለኛውን ዝናብ እስከሚያገኝ ድረስ በመታገሥ የምድርን የከበረ ፍሬ ይጠባበቃል።  እናንተም በትዕግሥት ጠብቁ፤ ጌታ የሚገኝበት ጊዜ ስለተቃረበ ልባችሁን አጽኑ።  ወንድሞች፣ እንዳይፈረድባችሁ አንዳችሁ በሌላው ላይ አታጉረምርሙ። እነሆ፣ ፈራጁ ደጃፍ ላይ ቆሟል። 10  ወንድሞች፣ በይሖዋ ስም የተናገሩትን ነቢያት መከራ በመቀበልና ትዕግሥት በማሳየት ረገድ አርዓያ አድርጋችሁ ተመልከቷቸው። 11  እነሆ፣ የጸኑትን ደስተኞች ብለን እንጠራቸዋለን። ስለ ኢዮብ ጽናት ሰምታችኋል፤ በውጤቱም ይሖዋ ያደረገለትን አይታችኋል፤ በዚህም ይሖዋ ከአንጀት የሚራራና መሐሪ እንደሆነ ተመልክታችኋል። 12  ይሁንና ወንድሞቼ፣ ከሁሉም በላይ በሰማይም ሆነ በምድር ወይም በሌላ በማናቸውም መሐላ መማላችሁን ተዉ። ከዚህ ይልቅ አዎ ካላችሁ አዎ ይሁን፣ አይደለም ካላችሁ አይደለም ይሁን፤ አለዚያ ለፍርድ ትዳረጋላችሁ። 13  ከእናንተ መካከል መከራ እየደረሰበት ያለ ሰው አለ? መጸለዩን ይቀጥል። ደስ የተሰኘ አለ? የምስጋና መዝሙር ይዘምር። 14  ከእናንተ መካከል የታመመ ሰው አለ? የጉባኤ ሽማግሌዎችን ወደ እሱ ይጥራ፤ እነሱም በይሖዋ ስም ዘይት ቀብተው ይጸልዩለት። 15  በእምነት የቀረበ ጸሎት የታመመውን ሰው ይፈውሰዋል፤ ይሖዋም ያስነሳዋል። በተጨማሪም ኃጢአት ሠርቶ ከሆነ ይቅር ይባልለታል። 16  ስለዚህ ፈውስ ማግኘት እንድትችሉ አንዳችሁ ለሌላው ኃጢአታችሁን በግልጽ ተናዘዙ፤ እንዲሁም አንዳችሁ ለሌላው ጸልዩ። የጻድቅ ሰው ጸሎት ታላቅ ኃይል አለው፤ ብዙ ነገርም ያከናውናል። 17  ኤልያስ እንደ እኛው ዓይነት ስሜት ያለው ሰው ነበር፤ ያም ሆኖ ዝናብ እንዳይዘንብ አጥብቆ ጸለየ፤ በምድሩም ላይ ለሦስት ዓመት ከስድስት ወር ዝናብ አልዘነበም። 18  እንደገናም ጸለየ፤ ሰማዩም ዝናብ ሰጠ፣ ምድሩም ፍሬ አፈራ። 19  ወንድሞቼ፣ ከእናንተ መካከል አንድ ሰው ከእውነት ስቶ ቢወጣና ሌላ ሰው ቢመልሰው፣ 20  ኃጢአተኛን ከስህተት ጎዳናው የሚመልሰው ሰው የኃጢአተኛውን ነፍስ ከሞት እንደሚያድንና ብዙ ኃጢአትንም እንደሚሸፍን እወቁ።

የግርጌ ማስታወሻዎች

ያዕ 5:7 * ከተጨማሪው መረጃ ላይ 5ኛውን ርዕስ ተመልከት።