በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ያዕቆብ 4:1-17

4  በእናንተ መካከል ያለው ጦርነትና ጠብ ከየት የመጣ ነው? በአካል ክፍሎቻችሁ ውስጥ ከሚዋጉት ኃይለኛ ሥጋዊ ፍላጎቶቻችሁ የመነጨ አይደለም?  ትመኛላችሁ ሆኖም አታገኙም። ትገድላላችሁ እንዲሁም ትጎመጃላችሁ ይሁንና ማግኘት አትችሉም። ትጣላላችሁ እንዲሁም ትዋጋላችሁ። ስለማትጠይቁም አታገኙም።  ትጠይቃላችሁ ግን አታገኙም፤ ምክንያቱም የምትጠይቁት ለተሳሳተ ዓላማ ይኸውም ኃይለኛ ሥጋዊ ፍላጎታችሁን ለማርካት ነው።  አመንዝሮች ሆይ፣ ከዓለም ጋር መወዳጀት ከአምላክ ጋር ጠላትነት መፍጠር እንደሆነ አታውቁም? ስለዚህ የዓለም ወዳጅ መሆን የሚፈልግ ሁሉ ራሱን የአምላክ ጠላት ያደርጋል።  ወይስ ቅዱስ መጽሐፉ “በውስጣችን ያደረው መንፈስ በቅናት ዝንባሌ ሁልጊዜ ይመኛል” ያለው እንዲያው በከንቱ ይመስላችኋል?  ይሁን እንጂ አምላክ የሚሰጠው ጸጋ የላቀ ነው። በመሆኑም ቅዱስ መጽሐፉ “አምላክ ትዕቢተኞችን ይቃወማል፤ ለትሑታን ግን ጸጋን ይሰጣል” ይላል።  ስለዚህ ራሳችሁን ለአምላክ አስገዙ፤ ዲያብሎስን ግን ተቃወሙት፤ እሱም ከእናንተ ይሸሻል።  ወደ አምላክ ቅረቡ፤ እሱም ወደ እናንተ ይቀርባል። እናንተ ኃጢአተኞች እጆቻችሁን አንጹ፤ እናንተ ወላዋዮች ልባችሁን አጥሩ።  ተጨነቁ፣ እዘኑ፣ አልቅሱ። ሳቃችሁ ወደ ሐዘን፣ ደስታችሁም ወደ ትካዜ ይለወጥ። 10  በይሖዋ ፊት ራሳችሁን ዝቅ አድርጉ፤ እሱም ከፍ ከፍ ያደርጋችኋል። 11  ወንድሞች፣ አንዳችሁ ሌላውን አትንቀፉ። ወንድሙን የሚነቅፍ ወይም በወንድሙ ላይ የሚፈርድ ሕግን ይነቅፋል እንዲሁም በሕግ ላይ ይፈርዳል። በሕግ ላይ የምትፈርድ ከሆነ ደግሞ ፈራጅ ነህ እንጂ ሕግን አድራጊ አይደለህም። 12  ሕግ የሚሰጥና የሚፈርድ አንድ አለ፤ እሱ ማዳንም ሆነ ማጥፋት ይችላል። ታዲያ በባልንጀራህ* ላይ የምትፈርድ አንተ ማን ነህ? 13  እንግዲህ እናንተ “ዛሬ ወይም ነገ ወደዚች ከተማ እንሄዳለን፤ እዚያም ዓመት እንቆያለን፤ እንነግዳለን እንዲሁም እናተርፋለን” የምትሉ ስሙ፤ 14  ሕይወታችሁ ነገ ምን እንደሚሆን እንኳ አታውቁም። ምክንያቱም ለጥቂት ጊዜ ታይቶ ኋላ እንደሚጠፋ እንፋሎት ናችሁ። 15  ከዚህ ይልቅ “ይሖዋ ከፈቀደ በሕይወት እንኖራለን፤ ደግሞም ይህን ወይም ያን እናደርጋለን” ማለት ይገባችኋል። 16  አሁን ግን እናንተ ራሳችሁን ከፍ ከፍ በማድረጋችሁ ትኩራራላችሁ። እንዲህ ያለው ኩራት ሁሉ ክፉ ነው። 17  ስለዚህ አንድ ሰው ትክክል የሆነውን ነገር እንዴት ማድረግ እንዳለበት ቢያውቅና ሳያደርገው ቢቀር ኃጢአት ይሆንበታል።

የግርጌ ማስታወሻዎች

ያዕ 4:12 * “ባልንጀራ” ተብሎ የተተረጎመው ግሪክኛ ቃል የአንድን ሰው የቅርብ ጓደኛ ብቻ ሳይሆን ማንኛውንም ሰው ሊያመለክት ይችላል።