በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ያዕቆብ 2:1-26

2  ወንድሞቼ ሆይ፣ በአንድ በኩል ክብራችን በሆነው በጌታችን በኢየሱስ ክርስቶስ የምታምኑ ሆናችሁ በሌላ በኩል ደግሞ አድልዎ ታደርጋላችሁ?  ምክንያቱም በጣቶቹ ላይ የወርቅ ቀለበቶች ያደረገና ያማረ ልብስ የለበሰ ሰው ወደ ስብሰባችሁ ቢመጣና ያደፈ ልብስ የለበሰ ድሃ ሰውም እንደዚሁ ወደ ስብሰባው ቢገባ  ያማረ ልብስ ለለበሰው ሰው አክብሮት በማሳየት “እዚህ የተሻለው ቦታ ላይ ተቀመጥ” ብትሉትና ድሃውን ደግሞ “አንተ እዚያ ቁም” ወይም “እዚያ ከእግሬ ማሳረፊያ በታች ተቀመጥ” ብትሉት  በመካከላችሁ የመደብ ልዩነት እንዲኖር ማድረጋችሁ አይደለም? ደግሞስ ክፉ ፍርድ የምትፈርዱ ፈራጆች መሆናችሁ አይደለም?  የተወደዳችሁ ወንድሞቼ ስሙ። አምላክ በእምነት ባለጸጋ እንዲሆኑና እሱን ለሚወዱ ቃል የገባውን መንግሥት እንዲወርሱ ከዓለም አንጻር ድሆች የሆኑትን አልመረጠም?  እናንተ ግን ድሃውን ሰው አዋረዳችሁ። እናንተን የሚጨቁኗችሁና ጎትተው ፍርድ ቤት የሚያቀርቧችሁ ሀብታሞች አይደሉም?  እናንተ የተጠራችሁበትን መልካም ስም የሚሳደቡት እነሱ አይደሉም?  እንግዲያው በቅዱስ መጽሐፉ መሠረት “ባልንጀራህን* እንደ ራስህ ውደድ” የሚለውን ንጉሣዊ ሕግ ተግባራዊ የምታደርጉ ከሆነ መልካም እያደረጋችሁ ነው።  አድልዎ ማድረጋችሁን የምትቀጥሉ ከሆነ ግን ኃጢአት እየሠራችሁ ነው፤ ምክንያቱም ሕጉ፣ ሕግ ተላላፊዎች መሆናችሁን ያጋልጣል። 10  አንድ ሰው ሕጉን ሁሉ የሚጠብቅ ሆኖ ሳለ አንዱን ትእዛዝ ሳይጠብቅ ቢቀር ሁሉንም እንደጣሰ ይቆጠራል። 11  ምክንያቱም “ምንዝር አትፈጽም” ያለው እሱ “አትግደል” የሚል ትእዛዝም ሰጥቷል። እንግዲህ ምንዝር ባትፈጽምም እንኳ ከገደልክ ሕግ ተላላፊ ሆነሃል። 12  ነፃ በሆኑ ሰዎች ሕግ ፍርድ የሚሰጣቸው ሰዎች እንደሚናገሩት መናገራችሁንና እነሱ እንደሚያደርጉት ማድረጋችሁን ቀጥሉ። 13  ምክንያቱም ምሕረት የማያደርግ ሰው ያለ ምሕረት ይፈረድበታል። ምሕረት በፍርድ ላይ በሚያገኘው ድል ይደሰታል። 14  ወንድሞቼ ሆይ፣ አንድ ሰው እምነት አለኝ ቢል ነገር ግን እምነቱ በሥራ የተደገፈ ባይሆን ምን ጥቅም ይኖረዋል? እምነቱ ሊያድነው አይችልም፤ ይችላል እንዴ? 15  አንድ ወንድም ወይም አንዲት እህት ቢራቆቱና ለዕለት የሚያስፈልጋቸውን በቂ ምግብ ባያገኙ 16  ሆኖም ከመካከላችሁ አንዱ “በሰላም ሂዱ፣ ይሙቃችሁ፣ ጥገቡም” ቢላቸው ለሰውነታቸው የሚያስፈልጓቸውን ነገሮች ግን ባትሰጧቸው ምን ይጠቅማቸዋል? 17  ስለዚህ በሥራ ያልተደገፈ እምነትም በራሱ የሞተ ነው። 18  ይሁንና አንድ ሰው እንዲህ ይላል:- “አንተ እምነት አለህ፤ እኔ ደግሞ ሥራ አለኝ። እምነትህን ከሥራ ለይተህ አሳየኝ፤ እኔ ደግሞ እምነቴን በሥራ አሳይሃለሁ።” 19  አንድ አምላክ እንዳለ ታምናለህ አይደል? ማመንህ መልካም ነው። ይሁንና አጋንንትም ያምናሉ እንዲሁም በፍርሃት ይንቀጠቀጣሉ። 20  አንተ ከንቱ ሰው፣ እምነት ያለ ሥራ ፍሬ ቢስ መሆኑን ማወቅ ትፈልጋለህ? 21  አባታችን አብርሃም ልጁን ይስሐቅን በመሠዊያ ላይ ካቀረበ በኋላ ጻድቅ ተብሎ የተጠራው በሥራ አይደለም? 22  እምነቱ ከሥራው ጋር አብሮ ይሠራ እንደነበረና እምነቱ በሥራው ፍጹም እንደሆነ ታያለህ፤ 23  ደግሞም “አብርሃም በይሖዋ አመነ፤ እንደ ጽድቅም ተቆጠረለት” የሚለው የቅዱስ መጽሐፍ ቃል ተፈጸመ፤ እሱም “የይሖዋ ወዳጅ” ለመባል በቃ። 24  እንግዲህ ሰው ጻድቅ ተብሎ የሚጠራው በእምነት ብቻ ሳይሆን በሥራም ጭምር እንደሆነ ታያላችሁ። 25  በተመሳሳይም ጋለሞታይቱ ረዓብ መልእክተኞቹን በጥሩ ሁኔታ ተቀብላ ካስተናገደቻቸውና በሌላ መንገድ እንዲሄዱ ካደረገች በኋላ በሥራ ጻድቅ ተብላ አልተጠራችም?  26  በእርግጥም አካል ያለ መንፈስ የሞተ እንደሆነ ሁሉ እምነትም ያለ ሥራ የሞተ ነው።

የግርጌ ማስታወሻዎች

ያዕ 2:8 * “ባልንጀራ” ተብሎ የተተረጎመው ግሪክኛ ቃል የአንድን ሰው የቅርብ ጓደኛ ብቻ ሳይሆን ማንኛውንም ሰው ሊያመለክት ይችላል።