በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

የሐዋርያት ሥራ 7:1-60

7  ሊቀ ካህናቱም “ይህ የተባለው ነገር ልክ ነው?” አለው።  እሱም እንዲህ አለ:- “ወንድሞችና አባቶች ሆይ፣ ስሙኝ። አባታችን አብርሃም በካራን መኖር ከመጀመሩ በፊት በሜሶጶጣሚያ ሳለ የክብር አምላክ ተገለጠለት፤  እንዲህም አለው:- ‘ከአገርህና ከዘመዶችህ ተለይተህ እኔ ወደማሳይህ ምድር ሂድ።’  እሱም ከከለዳውያን አገር ወጥቶ በካራን መኖር ጀመረ። አባቱ ከሞተ በኋላ ደግሞ አምላክ ከዚያ ተነስቶ አሁን እናንተ ወደምትኖሩበት ወደዚህ ምድር እንዲዛወር አደረገው።  ሆኖም በወቅቱ በዚህ ምድር ምንም ርስት ሌላው ቀርቶ አንዲት ጫማ እንኳ የምታክል መሬት አልሰጠውም፤ ይሁንና ገና ልጅ ሳይኖረው ለእሱም ሆነ ከእሱ በኋላ ለዘሩ ርስት አድርጎ እንደሚሰጠው ቃል ገባለት።  ከዚህም በላይ አምላክ፣ ዘሮቹ በባዕድ አገር መጻተኞች እንደሚሆኑና የዚያ አገር ሰዎችም ለአራት መቶ ዓመት ባሪያ አድርገው በመግዛት እንደሚያሠቃዩአቸው ተናገረ።  ደግሞም አምላክ ‘በባርነት የሚገዛቸውን ሕዝብ እፈርድበታለሁ፤ ከዚያም በኋላ ከዚያ አገር ወጥተው በዚህ ስፍራ ቅዱስ አገልግሎት ያቀርቡልኛል’ ሲል ተናግሯል።  “በተጨማሪም የግርዘት ቃል ኪዳን ሰጠው፤ በመሆኑም አብርሃም ይስሐቅን ወለደ፤ በስምንተኛውም ቀን ገረዘው። ይስሐቅም ያዕቆብን ወለደ፤ ያዕቆብም አሥራ ሁለቱን የቤተሰብ ራሶች ወለደ።  የቤተሰብ ራሶቹም በዮሴፍ ቀንተው ወደ ግብፅ ሸጡት። ሆኖም አምላክ ከእሱ ጋር ነበር፤ 10  ከመከራውም ሁሉ ነፃ አወጣው፤ በግብፅ ንጉሥ በፈርዖን ፊትም ሞገስና ጥበብ አጎናጸፈው። ፈርዖንም በግብፅና በቤቱ ሁሉ ላይ ገዥ አድርጎ ሾመው። 11  ይሁንና በግብፅና በከነዓን አገር ሁሉ ታላቅ መከራ ያስከተለ ረሃብ ተከሰተ፤ አባቶቻችንም የሚበሉት ነገር አጡ። 12  ሆኖም ያዕቆብ በግብፅ እህል መኖሩን ሲሰማ አባቶቻችንን ለመጀመሪያ ጊዜ ወደዚያ ላካቸው። 13  ለሁለተኛ ጊዜ ሲሄዱ ዮሴፍ ማንነቱን ለወንድሞቹ ገለጠላቸው፤ ፈርዖንም ስለ ዮሴፍ ቤተ ዘመድ ሰማ። 14  ስለዚህ ዮሴፍ ልኮ አባቱን ያዕቆብንና ዘመዶቹን ሁሉ ከዚያ አገር አስጠራ፤ እነሱም ሰባ አምስት ነፍሳት ነበሩ። 15  ያዕቆብም ወደ ግብፅ ወረደ። በዚያም ሞተ፤ አባቶቻችንም በዚያ ሞቱ፤ 16  አፅማቸውም ወደ ሴኬም ተወስዶ አብርሃም በሴኬም ከኤሞር ልጆች በብር ገንዘብ* በገዛው መቃብር ውስጥ ተቀበረ። 17  “አምላክ ለአብርሃም በግልጽ የተናገረው የተስፋ ቃል የሚፈጸምበት ጊዜ ሲቃረብ ሕዝቡ በግብፅ እየበዛና እየተበራከተ ሄደ፤ 18  ይህም የሆነው ዮሴፍን የማያውቅ ሌላ ንጉሥ በግብፅ እስከተነሳበት ጊዜ ድረስ ነው። 19  ይህ ንጉሥ በወገኖቻችን ላይ የተንኮል ዘዴ በመሸረብ ሕፃናት ልጆቻቸው ይሞቱ ዘንድ አሳልፈው እንዲሰጡ አባቶቻችንን አስገደዳቸው። 20  በዚህ ወቅት በአምላክ ፊት እንኳ ሳይቀር እጅግ ውብ የነበረው ሙሴ ተወለደ። በአባቱም ቤት ሦስት ወር በእንክብካቤ ኖረ። 21  በተጣለ ጊዜ ግን የፈርዖን ልጅ አንስታ እንደ ራሷ ልጅ አድርጋ አሳደገችው። 22  ከዚህም የተነሳ ሙሴ የግብፃውያንን ጥበብ ሁሉ ተማረ። እንዲያውም በንግግሩና በተግባሩ ብርቱ ሆነ። 23  “አርባ ዓመት በሞላው ጊዜ ወንድሞቹ የሆኑት የእስራኤል ልጆች ያሉበትን ሁኔታ ለማየት በልቡ አሰበ። 24  አንድ ግብፃዊም በአንድ እስራኤላዊ ላይ በደል ሲፈጽም አየ፤ ለእስራኤላዊውም አግዞ ግብፃዊውን በመግደል ተበቀለለት። 25  ወንድሞቹ አምላክ በእሱ እጅ መዳን እንዲያገኙ እንደሚያደርግ የሚያስተውሉ መስሎት ነበር፤ እነሱ ግን ይህን አላስተዋሉም። 26  በማግስቱም እርስ በርሳቸው ሲጣሉ አገኛቸው፤ እሱም ‘ሰዎች፣ እናንተ እኮ ወንድማማቾች ናችሁ። ለምን እርስ በርሳችሁ ትጣላላችሁ?’ በማለት ሊያስታርቃቸው ሞከረ። 27  ይሁንና በባልንጀራው ላይ በደል እየፈጸመ የነበረው ሰው እንዲህ በማለት ተቃወመው:- ‘አንተን በእኛ ላይ ማን ገዥና ፈራጅ አደረገህ? 28  ትናንት ግብፃዊውን እንደገደልከው እኔንም ልትገድለኝ ትፈልጋለህ እንዴ?’ 29  ሙሴ ይህን ሲሰማ ሸሽቶ በመሄድ በምድያም አገር መጻተኛ ሆኖ ኖረ፤ በዚያም ሁለት ወንዶች ልጆች ወለደ። 30  “ከአርባ ዓመትም በኋላ በሲና ተራራ ምድረ በዳ በሚነድ ቁጥቋጦ ነበልባል ውስጥ አንድ መልአክ ተገለጠለት። 31  ሙሴም ይህን ሲያይ ባየው ነገር ተደነቀ። ሆኖም ሁኔታውን ለማጣራት ወደዚያ ሲቀርብ የይሖዋ ድምፅ መጣ፤ 32  ‘እኔ የአባቶችህ አምላክ፣ የአብርሃም፣ የይስሐቅና የያዕቆብ አምላክ ነኝ።’ ሙሴ በፍርሃት በመዋጡ ሁኔታውን ይበልጥ ለማጣራት አልደፈረም። 33  ይሖዋም እንዲህ አለው:- ‘የቆምክበት ስፍራ ቅዱስ መሬት ስለሆነ ጫማህን ከእግርህ ላይ አውልቅ። 34  በግብፅ ባለው ሕዝቤ ላይ እየደረሰ ያለውን በደል በእርግጥ አይቻለሁ፤ የጭንቅ ጩኸታቸውንም ሰምቻለሁ፤ ላድናቸውም ወርጃለሁ። አሁንም ና፣ ወደ ግብፅ እልክሃለሁ።’ 35  ‘አንተን ማን ገዥና ፈራጅ አደረገህ?’ ብለው የተቃወሙትን ይህንኑ ሙሴን አምላክ በቁጥቋጦው ውስጥ በተገለጠለት መልአክ እጅ ገዥና ነፃ አውጪ አድርጎ ላከው። 36  ይህ ሰው በግብፅ፣ በቀይ ባሕርና በምድረ በዳ ለአርባ ዓመት ድንቅ ነገሮችንና ተአምራዊ ምልክቶችን በመፈጸም እየመራ አወጣቸው። 37  “‘አምላክ ከወንድሞቻችሁ መካከል እንደ እኔ ያለ ነቢይ ያስነሳላችኋል’ ብሎ ለእስራኤል ልጆች የተናገረው ይኸው ሙሴ ነው። 38  በሲና ተራራ ካነጋገረው መልአክና ከአባቶቻችን ጋር በምድረ በዳ በጉባኤው መካከል የነበረው እሱ ነው፤ እሱም ለእናንተ ለመስጠት ሕያው የሆነውን ቅዱስ ቃል ተቀበለ። 39  አባቶቻችን ለእሱ ለመታዘዝ ፈቃደኞች አልሆኑም፤ ከዚህ ይልቅ እሱን በመቃወም በልባቸው ወደ ግብፅ ተመለሱ፤ 40  አሮንንም ‘ፊት ፊታችን የሚሄዱ አማልክት ሥራልን። ምክንያቱም ከግብፅ ምድር መርቶ ያወጣን ያ ሙሴ ምን እንደደረሰበት አናውቅም’ አሉት። 41  ስለሆነም በዚያን ጊዜ ጥጃ ሠርተው ለጣዖቱ መሥዋዕት አቀረቡ፤ በእጃቸውም ሥራ ይደሰቱ ጀመር። 42  በዚህ ጊዜ አምላክ ፊቱን ከእነሱ አዞረ፤ በነቢያትም መጻሕፍት እንዲህ ተብሎ በተጻፈው መሠረት የሰማይ ሠራዊትን እንዲያመልኩ ተዋቸው:- ‘የእስራኤል ቤት ሆይ፣ ለአርባ ዓመት በምድረ በዳ የታረዱ እንስሳትና መሥዋዕት ያቀረባችሁት ለእኔ አልነበረም፤ ነበር እንዴ? 43  ይልቁንም ልታመልኳቸው የሠራችኋቸውን ምስሎች ይኸውም የሞሎክን ድንኳንና ሮምፋ የሚባለውን አምላክ ኮከብ ተሸክማችሁ ተጓዛችሁ። ከዚህም የተነሳ ከባቢሎን ወዲያ እንድትሰደዱ አደርጋችኋለሁ።’ 44  “አባቶቻችን በምድረ በዳ የምሥክሩ ድንኳን ነበራቸው፤ ይህ ድንኳን አምላክ ሙሴን ባነጋገረው ወቅት ባሳየው ንድፍ መሠረት እንዲሠራው ያዘዘው ድንኳን ነበር። 45  ይህን ድንኳን የተረከቡት አባቶቻችን ደግሞ ከኢያሱ ጋር ሆነው አምላክ ከአባቶቻችን ፊት ያባረራቸው አሕዛብ ይኖሩበት ወደነበረው ምድር ይዘውት ገቡ። እስከ ዳዊት ዘመን ድረስም በዚህ ምድር ቆየ። 46  ዳዊትም በአምላክ ፊት ሞገስ አገኘ፤ ለያዕቆብ አምላክም መኖሪያ የመሥራት መብት እንዲሰጠው ጠየቀ። 47  ይሁን እንጂ ቤት የሠራለት ሰለሞን ነበር። 48  ሆኖም ልዑሉ አምላክ የሰው እጅ በሠራው ቤት አይኖርም፤ ይህም ነቢዩ እንዲህ ሲል በተናገረው መሠረት ነው:- 49  ‘ሰማይ ዙፋኔ ነው፤ ምድር ደግሞ የእግሬ ማሳረፊያ ናት። ለእኔ የምትሠሩልኝ ምን ዓይነት ቤት ነው? ይላል ይሖዋ። ወይስ የማርፍበት ቦታ ምን ዓይነት ነው? 50  እነዚህን ነገሮች ሁሉ የሠራው እጄ አይደለም?’ 51  “እናንተ ግትሮች፣ ልባችሁና ጆሯችሁ ያልተገረዘ፣ ሁልጊዜ መንፈስ ቅዱስን እንደተቃወማችሁ ነው፤ አባቶቻችሁ እንዳደረጉት እናንተም እንዲሁ ታደርጋላችሁ። 52  ከነቢያት መካከል አባቶቻችሁ ስደት ያላደረሱበት ማን አለ? አዎ፣ እነሱ የጻድቁን መምጣት በተመለከተ አስቀድመው የተናገሩትን ገድለዋቸዋል፤ እናንተም አሁን ይህን ጻድቁን አሳልፋችሁ ሰጣችሁት፣ ገደላችሁትም፤ 53  በመላእክት አማካኝነት የተላለፈውን ሕግ ተቀበላችሁ፤ ግን አልጠበቃችሁትም።” 54  እነሱም ይህን ሲሰሙ በንዴት አረሩ፤ ጥርሳቸውንም ያፋጩበት ጀመር። 55  እሱ ግን በመንፈስ ቅዱስ ተሞልቶ ትኩር ብሎ ወደ ሰማይ ሲመለከት የአምላክን ክብር እንዲሁም ኢየሱስ በአምላክ ቀኝ ቆሞ አየ፤ 56  ከዚያም “እነሆ፣ ሰማያት ተከፍተው የሰው ልጅም በአምላክ ቀኝ ቆሞ አያለሁ” አለ። 57  በዚህ ጊዜ በኃይል እየጮኹ ጆሯቸውን በእጃቸው ደፍነው በአንድነት ወደ እሱ ሮጡ። 58  ይዘውት ከከተማው ውጭ ካስወጡት በኋላ በድንጋይ ይወግሩት ጀመር። ምሥክሮቹም መደረቢያቸውን ሳኦል በተባለ ወጣት እግር አጠገብ አስቀመጡ። 59  እስጢፋኖስም እየወገሩት ሳለ “ጌታ ኢየሱስ ሆይ፣ መንፈሴን ተቀበል” ብሎ ተማጸነ። 60  ከዚያም በጉልበቱ ተንበርክኮ በታላቅ ድምፅ “ይሖዋ ሆይ፣ ይህን ኃጢአት አትቁጠርባቸው” ብሎ ጮኸ። ይህን ከተናገረ በኋላም በሞት አንቀላፋ።

የግርጌ ማስታወሻዎች

ሥራ 7:16 * ብር ከተባለው ማዕድን የተሠራ ገንዘብ።