በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

የሐዋርያት ሥራ 4:1-37

4  ጴጥሮስና ዮሐንስ ለሕዝቡ እየተናገሩ ሳሉ የካህናት አለቆቹና የቤተ መቅደሱ ሹም እንዲሁም ሰዱቃውያን ድንገት ወደ እነሱ መጡ፤  እነሱም ጴጥሮስና ዮሐንስ ሕዝቡን እያስተማሩና ኢየሱስ ከሞት እንደተነሳ በመጥቀስ ስለ ትንሣኤ በግልጽ እየተናገሩ ስለነበር እጅግ ተቆጡ፤  ከዚያም ያዟቸው፤ መሽቶም ስለነበር እስከ ማግስቱ ድረስ እስር ቤት አቆዩአቸው።  ይሁን እንጂ ንግግሩን ሰምተው ከነበሩት መካከል ብዙዎቹ አመኑ፤ የወንዶቹም ቁጥር አምስት ሺህ ገደማ ሆነ።  በማግስቱም የሕዝቡ ገዥዎችና ሽማግሌዎች እንዲሁም ጸሐፍት በኢየሩሳሌም አንድ ላይ ተሰበሰቡ፤  (በተጨማሪም ሊቀ ካህናቱ ሐና፣ ቀያፋ፣ ዮሐንስ፣ እስክንድርና በርካታ የሊቀ ካህናቱ ዘመዶች በዚያ ተገኝተው ነበር)፤  ጴጥሮስንና ዮሐንስንም በመካከላቸው አቁመው “ይህን ያደረጋችሁት በምን ሥልጣን ወይም በማን ስም ነው?” ብለው ይጠይቋቸው ጀመር።  በዚህ ጊዜ ጴጥሮስ በመንፈስ ቅዱስ ተሞልቶ እንዲህ አላቸው:- “የሕዝቡ ገዥዎችና ሽማግሌዎች፣  ዛሬ በእኛ ላይ ምርመራ እየተደረገ ያለው ለአንድ በሽተኛ ሰው በተደረገ መልካም ሥራ የተነሳ ከሆነና ይህ ሰው በማን ስም እንደዳነ ለማወቅ ከሆነ 10  ጤናማ ሆኖ እዚህ ፊታችሁ የቆመው፣ እናንተ በሰቀላችሁት ሆኖም አምላክ ከሞት ባስነሳው በናዝሬቱ ኢየሱስ ክርስቶስ ስም እንደሆነ እናንተ ሁላችሁም ሆናችሁ መላው የእስራኤል ሕዝብ ይወቅ። 11  ‘እናንተ ግንበኞች የናቃችሁት፣ የማዕዘን ራስ* የሆነው ድንጋይ’ እሱ ነው። 12  ደግሞም መዳን በሌላ በማንም አይገኝም፤ ምክንያቱም ልንድንበት የሚገባ ከሰማይ በታች ለሰዎች የተሰጠ ሌላ ስም የለም።” 13  ሰዎቹ ጴጥሮስና ዮሐንስ በድፍረት ሲናገሩ ባዩአቸው ጊዜ ያልተማሩ ተራ ሰዎች መሆናቸውን ተረድተው ተደነቁ። ከኢየሱስ ጋር እንደነበሩም ተገነዘቡ፤ 14  የተፈወሰውንም ሰው ከእነሱ ጋር ቆሞ ሲያዩት ሊያስተባብሉ የሚችሉበት ነገር አጡ። 15  ስለዚህ ከሳንሄድሪን ሸንጎ አዳራሽ እንዲወጡ አዘዟቸው፤ ከዚያም እርስ በርሳቸው ይማከሩ ጀመር፤ 16  እንዲህም ተባባሉ:- “እነዚህን ሰዎች ምን ብናደርጋቸው ይሻላል? ምክንያቱም በኢየሩሳሌም ነዋሪዎች ሁሉ ዘንድ የታወቀ አስደናቂ ነገር እንደፈጸሙ የማይታበል ሐቅ ነው፤ ይህን ደግሞ ልንክድ አንችልም። 17  ይሁንና ይህ ነገር በሕዝቡ መካከል ይበልጥ እንዳይስፋፋ ከዚህ በኋላ በዚህ ስም ለማንም ሰው እንዳይናገሩ እናስጠንቅቃቸው።” 18  ከዚያም ጠርተዋቸው የትም ቦታ በኢየሱስ ስም ፈጽሞ እንዳይናገሩ ወይም እንዳያስተምሩ አዘዟቸው። 19  ጴጥሮስና ዮሐንስ ግን መልሰው እንዲህ አሏቸው:- “አምላክን ከመስማት ይልቅ እናንተን መስማት በአምላክ ፊት ተገቢ እንደሆነና እንዳልሆነ እናንተ ለራሳችሁ ፍረዱ። 20  በእኛ በኩል ግን ስላየነውና ስለሰማነው ነገር ከመናገር ወደኋላ ልንል አንችልም።” 21  በዚህ ጊዜ እንደገና ካስፈራሯቸው በኋላ ለቀቋቸው፤ ይህንም ያደረጉት እነሱን ለመቅጣት የሚያስችል ምንም ተጨባጭ ነገር ስላላገኙና ሕዝቡን ስለፈሩ ነው፤ ምክንያቱም ሕዝቡ ሁሉ በተፈጸመው ሁኔታ አምላክን እያከበረ ነበር፤ 22  ይህ ተአምራዊ ምልክት የተፈጸመበት ሰውም ዕድሜው ከአርባ ዓመት በላይ ነበር። 23  ከተለቀቁ በኋላ ወደ እምነት አጋሮቻቸው ሄደው የካህናት አለቆቹና ሽማግሌዎቹ ያሏቸውን ነገር ነገሯቸው። 24  እነሱም ይህን በሰሙ ጊዜ በአንድ ልብ ሆነው ድምፃቸውን ከፍ በማድረግ እንዲህ ሲሉ ወደ አምላክ ጸለዩ:- “ሉዓላዊ ጌታ ሆይ፣ ሰማይን፣ ምድርን፣ ባሕርንና በውስጣቸው ያሉትን ነገሮች ሁሉ የፈጠርክ አንተ ነህ፤ 25  ደግሞም በመንፈስ ቅዱስ አማካኝነት በአገልጋይህ በአባታችን በዳዊት አፍ እንዲህ ብለሃል:- ‘ሕዝቦች ለምን በዓመፅ ተነሱ? ሰዎችስ ለምን ከንቱ ነገር ያውጠነጥናሉ? 26  የምድር ነገሥታት በተቃዋሚነት ተሰለፉ፤ ገዥዎችም በይሖዋና እሱ በቀባው ላይ ተባበሩ።’ 27  በእርግጥም ሄሮድስና* ጳንጥዮስ ጲላጦስ ከአሕዛብና ከእስራኤል ሕዝብ ጋር በዚህች ከተማ ተሰብስበው አንተ በቀባኸው በቅዱስ አገልጋይህ በኢየሱስ ላይ ተነሱ፤ 28  ይህም የሆነው እጅህና ፈቃድህ አስቀድመው የወሰኑት ነገር እንዲፈጸም ነው። 29  አሁንም ይሖዋ ሆይ፣ ዛቻቸውን ተመልከት፤ ባሪያዎችህም ቃልህን በፍጹም ድፍረት መናገራቸውን እንዲቀጥሉ እርዳቸው፤ 30  ለመፈወስም የዘረጋኸውን እጅህን አትጠፍ፤ በቅዱስ አገልጋይህ በኢየሱስ ስም ተአምራዊ ምልክቶችና ድንቅ ነገሮች ማድረግህንም ቀጥል።” 31  ምልጃ ካቀረቡም በኋላ ተሰብስበውበት የነበረው ቦታ ተናወጠ፤ ሁሉም በመንፈስ ቅዱስ ተሞልተው የአምላክን ቃል በድፍረት መናገር ጀመሩ። 32  በተጨማሪም ከፍተኛ ቁጥር የነበራቸው ያመኑት ሰዎች አንድ ልብና ነፍስ ነበራቸው፤ አንዳቸውም እንኳ ቢሆኑ ያላቸው ማንኛውም ንብረት የግላቸው እንደሆነ አይናገሩም ነበር፤ ከዚህ ይልቅ ያላቸው ነገር ሁሉ የጋራ ነበር። 33  ከዚህም በላይ ሐዋርያቱ ስለ ጌታ ኢየሱስ ትንሣኤ በታላቅ ኃይል መመሥከራቸውን ቀጠሉ፤ ሁሉም የአምላክን ጸጋ በብዛት አግኝተው ነበር። 34  ከመካከላቸውም አንድም ችግረኛ አልነበረም፤ ምክንያቱም መሬት ወይም ቤት የነበራቸው ሁሉ እየሸጡ የተሸጠውን ነገር ዋጋ በማምጣት 35  ገንዘቡን ለሐዋርያት ያስረክቡ ነበር። ከዚያም ለእያንዳንዱ ሰው በሚያስፈልገው መጠን ይከፋፈል ነበር። 36  የቆጵሮስ ተወላጅ የሆነ ዮሴፍ የሚባል አንድ ሌዋዊ ነበር፤ ሐዋርያትም በርናባስ ብለው ይጠሩት የነበረ ሲሆን ትርጉሙም የመጽናናት ልጅ ማለት ነው፤ 37  እሱም መሬት ስለነበረው መሬቱን ሸጦ ገንዘቡን በማምጣት ለሐዋርያት አስረከበ።

የግርጌ ማስታወሻዎች

ሥራ 4:11 ማቴዎስ 21:42 ላይ የሚገኘውን የግርጌ ማስታወሻ ተመልከት።
ሥራ 4:27 ሉቃስ 3:1 ላይ የሚገኘውን የግርጌ ማስታወሻ ተመልከት።