በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

የሐዋርያት ሥራ 25:1-27

25  ፊስጦስም ወደ አውራጃው መጥቶ ኃላፊነቱን ከተረከበ ከሦስት ቀን በኋላ ከቂሳርያ ወደ ኢየሩሳሌም ወጣ፤  የካህናት አለቆችና አንዳንድ የታወቁ አይሁዳውያንም በጳውሎስ ላይ ያላቸውን ክስ ለእሱ አቀረቡ። ከዚያም ይለምኑት ጀመር፤  ጳውሎስን ወደ ኢየሩሳሌም በማስመጣት እንዲተባበራቸው ጠየቁት፤ ይህንም ያሉት መንገድ ላይ አድፍጠው ሊገድሉት ፈልገው ስለነበረ ነው።  ይሁን እንጂ ፊስጦስ፣ ጳውሎስ እዚያው ቂሳርያ ታስሮ እንደሚቆይና እሱ ራሱም በቅርቡ ወደዚያ እንደሚሄድ ነገራቸው።  “በመሆኑም ከእናንተ መካከል ባለሥልጣን የሆኑት ከእኔ ጋር ይውረዱና ሰውየው ያጠፋው ነገር ካለ ይክሰሱት” አላቸው።  ስለዚህ ፊስጦስ ከስምንት ወይም ከአሥር ቀን ያልበለጠ ጊዜ ከእነሱ ጋር ካሳለፈ በኋላ ወደ ቂሳርያ ወረደ፤ በማግስቱም በፍርድ ወንበር ላይ ተቀምጦ ጳውሎስን እንዲያመጡት አዘዘ።  ጳውሎስ በቀረበ ጊዜ ከኢየሩሳሌም የመጡት አይሁዳውያን በዙሪያው ቆመው በማስረጃ ያልተደገፉ በርካታ ከባድ ክሶች አቀረቡበት።  ጳውሎስ ግን “እኔ በአይሁድ ሕግ ላይም ሆነ በቤተ መቅደሱ ወይም በቄሳር ላይ ምንም የፈጸምኩት በደል የለም” ሲል የመከላከያ መልሱን ሰጠ።  ፊስጦስም በአይሁዳውያን ዘንድ መወደድ ስለፈለገ ጳውሎስን “ወደ ኢየሩሳሌም ወጥተህ ስለዚህ ጉዳይ እዚያ እኔ ባለሁበት መዳኘት ትፈልጋለህ?” ሲል ጠየቀው። 10  ጳውሎስ ግን እንዲህ አለ:- “እኔ ልዳኝበት በሚገባኝ በቄሳር የፍርድ ወንበር ፊት ቆሜያለሁ። አንተ ራስህ በሚገባ እንደደረስክበት በአይሁዳውያን ላይ የፈጸምኩት ምንም በደል የለም። 11  በእርግጥ ጥፋተኛ ሆኜ ከተገኘሁና ለሞት የሚያበቃ ነገር ፈጽሜ ከሆነ ከሞት ልዳን አልልም፤ በሌላ በኩል ግን እነዚህ ሰዎች ያቀረቡብኝ ክሶች ሁሉ መሠረተ ቢስ ከሆኑ እነሱን ለማስደሰት ብሎ ማንም ሰው ለእነሱ አሳልፎ ሊሰጠኝ አይችልም። ወደ ቄሳር ይግባኝ ብያለሁ!” 12  በዚህ ጊዜ ፊስጦስ ከአማካሪዎቹ ጋር ከተመካከረ በኋላ “ወደ ቄሳር ይግባኝ ስላልክ ወደ ቄሳር ትሄዳለህ” ሲል መለሰለት። 13  የተወሰኑ ቀናት ካለፉ በኋላ ንጉሥ አግሪጳና በርኒቄ ለፊስጦስ ክብር ይፋዊ ጉብኝት ለማድረግ ወደ ቂሳርያ መጡ። 14  በዚያም ብዙ ቀናት ቆዩ፤ ፊስጦስም የጳውሎስን ጉዳይ አንስቶ ለንጉሡ እንዲህ አለው:- “ፊሊክስ እስር ቤት የተወው አንድ ሰው አለ፤ 15  ኢየሩሳሌም በነበርኩበት ጊዜ የካህናት አለቆቹና የአይሁዳውያን ሽማግሌዎች ይህን ሰው በመክሰስ እንዲፈረድበት ጥያቄ አቅርበው ነበር። 16  እኔ ግን ክስ የቀረበበት ሰው ከከሳሾቹ ጋር ፊት ለፊት ተገናኝቶ ለቀረበበት ክስ የመከላከያ መልስ መስጠት የሚችልበት አጋጣሚ ሳያገኝ እንዲሁ ሰውን ለማስደሰት ተብሎ ብቻ አሳልፎ መስጠት የሮማውያን ሥርዓት እንዳልሆነ ገለጽኩላቸው። 17  ስለዚህ ከሳሾቹ ተሰብስበው ወደዚህ በመጡ ጊዜ ሳልዘገይ በማግስቱ በፍርድ ወንበር ላይ ተቀምጬ ሰውየውን እንዲያመጡት አዘዝኩ። 18  ከሳሾቹም ቆመው በተናገሩ ጊዜ እኔ የጠበቅኩትን ያህል ከባድ ክስ አላቀረቡበትም። 19  ከዚህ ይልቅ ይከራከሩ የነበረው ስለ አምልኳቸውና ስለሞተው፣ ጳውሎስ ግን ሕያው ነው ስለሚለው ኢየሱስ ስለተባለ ሰው ነው። 20  እኔም ይህን ክርክር እንዴት እንደምፈታው ግራ ስለገባኝ ጳውሎስ ወደ ኢየሩሳሌም ሄዶ ስለዚህ ጉዳይ እዚያ መፋረድ ይፈልግ እንደሆነ ጠየቅኩት። 21  ጳውሎስ ግን አውግስጦስ* ውሳኔ እስኪሰጥ ድረስ ታስሮ እንዲቆይ ይግባኝ በጠየቀ ጊዜ ወደ ቄሳር እስከምልከው ድረስ በእስር ቤት እንዲቆይ አዘዝኩ።” 22  በዚህ ጊዜ አግሪጳ ፊስጦስን “እኔም ይህ ሰው ሲናገር ብሰማው ደስ ይለኝ ነበር” አለው። እሱም “እንግዲያውስ ነገ ትሰማዋለህ” አለው። 23  ስለዚህ በማግስቱ አግሪጳና በርኒቄ በታላቅ ክብር ደምቀው እንዲሁም በሻለቃዎችና በከተማይቱ ታላላቅ ሰዎች ታጅበው ወደ መሰብሰቢያ አዳራሹ ገቡ፤ ፊስጦስ ትእዛዝ በሰጠም ጊዜ ጳውሎስ እንዲቀርብ ተደረገ። 24  ፊስጦስም እንዲህ አለ:- “ንጉሥ አግሪጳና ከእኛ ጋር እዚህ የተሰበሰባችሁ ሰዎች ሁሉ፣ ይህ የምታዩት ሰው አይሁዳውያን ሁሉ ከእንግዲህ በሕይወት ሊኖር አይገባውም እያሉ በመጮኽ በኢየሩሳሌምም ሆነ እዚህ፣ ለእኔ አቤቱታ ያቀረቡበት ሰው ነው። 25  እኔ ግን ለሞት የሚያበቃ ምንም ነገር እንዳልፈጸመ ተረድቻለሁ። በመሆኑም እሱ ራሱ ወደ አውግስጦስ ይግባኝ ስላለ ልልከው ወስኛለሁ። 26  ይሁንና ስለ እሱ ወደ ጌታዬ የምጽፈው ምንም የተረጋገጠ ነገር አላገኘሁም። ስለዚህ አሁን በችሎቱ ፊት ከተመረመረ በኋላ ልጽፈው የምችለው ነገር አገኝ ዘንድ በእናንተ በተለይ ደግሞ በአንተ በንጉሥ አግሪጳ ፊት አቀረብኩት። 27  ምክንያቱም አንድን እስረኛ የተከሰሰበትን ምክንያት ሳይገልጹ መላክ ተገቢ አልመሰለኝም።”

የግርጌ ማስታወሻዎች

ሥራ 25:21 * የቄሳር ኔሮ የማዕረግ ስም ሲሆን ኔሮ ለመጀመሪያ ጊዜ በዚህ የማዕረግ ስም ከተጠራው ከኦክታቪያን አንስቶ አራተኛው ንጉሠ ነገሥት ነው።