በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

የሐዋርያት ሥራ 24:1-27

24  ከአምስት ቀን በኋላ ሊቀ ካህናቱ ሐናንያ ከተወሰኑ ሽማግሌዎችና ጠርጡለስ ከሚባል ጠበቃ ጋር ወደ ቂሳርያ ወረደ፤ እነሱም በጳውሎስ ላይ ያላቸውን ክስ ለአገረ ገዥው አቀረቡ።  በተጠራም ጊዜ ጠርጡለስ እንዲህ ሲል ይከሰው ጀመር:- “ክቡር ፊሊክስ ሆይ፣ በአንተ አማካኝነት ብዙ ሰላም አግኝተናል፤ አርቆ አስተዋይነትህም ለዚህ ሕዝብ መሻሻል እያስገኘ ነው፤  ይህንም በማንኛውም ጊዜና በየትኛውም ቦታ በታላቅ ምስጋና እንቀበላለን።  ይሁንና አሁን ብዙ እንዳላደክምህ በአጭሩ የምንነግርህን መልካም ፈቃድህ ሆኖ እንድትሰማን እለምንሃለሁ።  ምክንያቱም ይህ ሰው መቅሰፍት ሆኖብናል፤ በዓለም ባሉት አይሁዳውያን ሁሉ መካከል ዓመፅ ያነሳሳል፤ ከዚህም ሌላ የናዝሬታውያን ኑፋቄ ቀንደኛ መሪ ነው፤  በዚህ ላይ ደግሞ ቤተ መቅደሱን ለማርከስ ሲሞክር አግኝተን ይዘነዋል። 7*  ——  ይህን በእሱ ላይ ያቀረብነውን ክስ አንተ ራስህ መርምረህ ከራሱ ማረጋገጥ ትችላለህ።”  አይሁዳውያኑም የተባለው ነገር ሁሉ ትክክል መሆኑን በመግለጽ በውንጀላው ተባበሩ። 10  ጳውሎስም አገረ ገዥው ጭንቅላቱን በመነቅነቅ እንዲናገር ምልክት በሰጠው ጊዜ እንዲህ ሲል መለሰ:- “ለብዙ ዓመታት ለዚህ ሕዝብ ፈራጅ ሆነህ ስታገለግል መቆየትህን አውቃለሁ፤ በመሆኑም ስለ ራሴ የመከላከያ መልስ የማቀርበው በደስታ ነው፤ 11  ለአምልኮ ወደ ኢየሩሳሌም ከወጣሁ ከአሥራ ሁለት ቀን እንደማይበልጥ አንተው ራስህ በቀላሉ ማረጋገጥ ትችላለህ፤ 12  እንዲሁም በቤተ መቅደሱም ሆነ በምኩራቦች ወይም በከተማው ውስጥ ከማንም ጋር ስከራከር ወይም ሕዝቡን ለዓመፅ ሳነሳሳ አላገኙኝም። 13  በተጨማሪም አሁን ላቀረቡብኝ ክስ ሁሉ ምንም ማስረጃ ሊያቀርቡልህ አይችሉም። 14  ይሁን እንጂ በሕጉና በነቢያት የተጻፉትን ነገሮች ሁሉ ስለማምን እነሱ ‘ኑፋቄ’ ብለው የሚጠሩትን የሕይወት መንገድ እንደምከተልና በዚህም መንገድ ለአባቶቼ አምላክ ቅዱስ አገልግሎት እንደማቀርብ አልክድም፤ 15  ደግሞም እነዚህ ሰዎች ራሳቸው ተስፋ እንደሚያደርጉት እኔም ጻድቃንም ሆኑ ዓመፀኞች ከሞት እንደሚነሱ በአምላክ ተስፋ አደርጋለሁ። 16  በመሆኑም በአምላክም ሆነ በሰው ላይ ምንም በደል ባለመፈጸም ንጹሕ ሕሊና ይዤ ለመኖር ሁልጊዜ ጥረት አደርጋለሁ። 17  ስለዚህ ከብዙ ዓመታት በኋላ ለወገኖቼ ምጽዋት ለመስጠትና ለአምላክ መሥዋዕት ለማቅረብ መጣሁ። 18  በቤተ መቅደሱ ውስጥ ያገኙኝ የመንጻት ሥርዓት ፈጽሜ ይህንኑ ሳደርግ እንጂ ከብዙ ሕዝብ ጋር ሆኜ ሁከት ሳነሳሳ አልነበረም። ሆኖም ከእስያ አውራጃ የመጡ አንዳንድ አይሁዳውያን ነበሩ፤ 19  እነሱ እኔን የሚከሱበት ነገር ካላቸው እዚህ ፊትህ ተገኝተው ሊከሱኝ ይገባ ነበር። 20  ወይም እዚህ ያሉት ሰዎች በሳንሄድሪን ሸንጎ ፊት በቀረብኩበት ጊዜ ያገኙብኝ ጥፋት ካለ እነሱ ራሳቸው ይናገሩ፤ 21  በመካከላቸው ቆሜ በነበረበት ጊዜ ‘ዛሬ በፊታችሁ ለፍርድ የቀረብኩት በሙታን ትንሣኤ በማመኔ ነው!’ ብዬ ከፍ ባለ ድምፅ ከመናገር በቀር ያደረግኩት ነገር የለም።” 22  ይሁን እንጂ ፊሊክስ ስለ ጌታ መንገድ በሚገባ ያውቅ ስለነበረ “የሠራዊቱ ሻለቃ ሉስዮስ ሲመጣ ለጉዳያችሁ ውሳኔ እሰጣለሁ” በማለት ያቀረቡትን ክስ በቀጠሮ አሳደረው። 23  ከዚያም ጳውሎስ መጠነኛ ነፃነት ተሰጥቶት በቁጥጥር ሥር እንዲቆይና ወዳጆቹ የሚያስፈልገውን ነገር ለማድረግ ሲመጡ እንዳይከለክላቸው መኮንኑን አዘዘው። 24  ከተወሰኑ ቀናት በኋላ ፊሊክስ አይሁዳዊት ከሆነችው ሚስቱ ከድሩሲላ ጋር መጣ፤ ጳውሎስንም አስጠርቶ በክርስቶስ ኢየሱስ ስለ ማመን ሲናገር አዳመጠው። 25  ስለ ጽድቅ፣ ራስን ስለ መግዛትና ስለሚመጣው ፍርድ ሲናገር ግን ፊሊክስ ፈርቶ “ለጊዜው ሂድ፤ አመቺ ጊዜ ሳገኝ ደግሞ እንደገና አስጠራሃለሁ” አለው። 26  እግረ መንገዱን ግን ጳውሎስ ጉቦ ይሰጠኛል ብሎ ተስፋ ያደርግ ነበር። ከዚህም የተነሳ ብዙ ጊዜ እያስጠራ ያነጋግረው ነበር። 27  ይሁንና ሁለት ዓመት ካለፈ በኋላ ፊሊክስ በጶርቅዮስ ፊስጦስ ተተካ፤ ፊሊክስም በአይሁዳውያን ዘንድ ተወዳጅነት ማትረፍ ስለፈለገ ጳውሎስን እንደታሰረ ተወው።

የግርጌ ማስታወሻዎች

ሥራ 24:7 ማቴዎስ 17:21 ላይ የሚገኘውን የግርጌ ማስታወሻ ተመልከት።