በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

የሐዋርያት ሥራ 23:1-35

23  ጳውሎስ የሳንሄድሪንን ሸንጎ ትኩር ብሎ እየተመለከተ “ወንድሞች፣ እኔ እስከዚህ ቀን ድረስ በአምላክ ፊት ሙሉ በሙሉ ንጹሕ በሆነ ሕሊና ተመላልሻለሁ” አለ።  በዚህ ጊዜ ሊቀ ካህናቱ ሐናንያ፣ ጳውሎስ አጠገብ የቆሙት ሰዎች አፉን እንዲመቱት አዘዘ።  ጳውሎስም “አንተ በኖራ የተለሰንክ ግድግዳ! አምላክ አንተን ይመታሃል። በሕጉ መሠረት በእኔ ላይ ለመፍረድ ተቀምጠህ ሳለ አንተ ራስህ ሕጉን በመጣስ እንድመታ ታዛለህ?” አለው።  አጠገቡ የቆሙትም “የአምላክን ሊቀ ካህናት ትሳደባለህ?” አሉት።  ጳውሎስም “ወንድሞች፣ እኔ እኮ ሊቀ ካህናት መሆኑን አላወቅኩም። ምክንያቱም ‘በሕዝብህ ገዥ ላይ ክፉ ቃል አትናገር’ ተብሎ ተጽፏል” አላቸው።  ጳውሎስ ግማሾቹ ሰዱቃውያን ግማሾቹ ደግሞ ፈሪሳውያን መሆናቸውን ባስተዋለ ጊዜ “ወንድሞች፣ እኔ ከፈሪሳውያን የተወለድኩ ፈሪሳዊ ነኝ። ለፍርድ የቀረብኩት በሙታን ትንሣኤ ተስፋ በማመኔ ነው” ሲል በሳንሄድሪን ሸንጎ ውስጥ ድምፁን ከፍ አድርጎ ተናገረ።  ይህንም በመናገሩ በፈሪሳውያንና በሰዱቃውያን መካከል ግጭት ተፈጥሮ ሸንጎው ለሁለት ተከፈለ።  ምክንያቱም ሰዱቃውያን ትንሣኤም መልአክም መንፈስም የለም ይሉ የነበረ ሲሆን ፈሪሳውያን ግን በእነዚህ ነገሮች መኖር ያምኑ ነበር።  ስለዚህ ከፍተኛ ሁካታ ተፈጠረ፤ ከፈሪሳውያን ወገን የሆኑ አንዳንድ ጸሐፍት ተነስተው እንዲህ ሲሉ አጥብቀው ይከራከሩ ጀመር:- “በዚህ ሰው ላይ ምንም ጥፋት አላገኘንም፤ መንፈስ ወይም መልአክ አናግሮት ከሆነ ግን . . . ።” 10  በመካከላቸው የተፈጠረው ግጭት እየከረረ ሲሄድ የሠራዊቱ ሻለቃ ጳውሎስን እንዳይገነጣጥሉት ፈርቶ ወታደሮቹ ወርደው ከመካከላቸው ነጥቀው እንዲያመጡትና ወደ ጦር ሰፈሩ እንዲያስገቡት አዘዘ። 11  ሆኖም በዚያኑ ቀን ሌሊት ጌታ በጳውሎስ አጠገብ ቆሞ እንዲህ አለው:- “አይዞህ፣ አትፍራ! ምክንያቱም በኢየሩሳሌም ስለ እኔ የተሟላ ምሥክርነት እንደሰጠህ ሁሉ በሮምም ልትመሠክርልኝ ይገባል።” 12  በነጋም ጊዜ አይሁዳውያን በጳውሎስ ላይ በማሴር እሱን እስኪገድሉ ድረስ እህል ውኃ የሚባል ነገር ላለመቅመስ ተማማሉ።* 13  ይህን ሴራ ለመፈጸም የተማማሉት ሰዎች ቁጥራቸው ከአርባ በላይ ነበር፤ 14  ወደ ካህናት አለቆቹና ወደ ሽማግሌዎቹ ሄደውም እንዲህ አሉ:- “ጳውሎስን እስክንገድል ድረስ አንዳች እህል ላለመቅመስ ጽኑ መሐላ ተማምለናል። 15  ስለዚህ እናንተ ከሳንሄድሪን ሸንጎ ጋር ሆናችሁ የጳውሎስን ጉዳይ ይበልጥ በትክክል ማጣራት እንደምትፈልጉ በማስመሰል እሱን ወደ እናንተ እንዲያመጣው ለሠራዊቱ ሻለቃ ንገሩት። ይሁንና እኛ እዚህ ከመድረሱ በፊት እሱን ለመግደል ተዘጋጅተን እንጠብቃለን።” 16  ይሁን እንጂ የጳውሎስ የእህቱ ልጅ ደባቸውን በመስማቱ ወደ ጦር ሰፈሩ ገብቶ ጉዳዩን ለጳውሎስ ነገረው። 17  ስለዚህ ጳውሎስ ከመኮንኖቹ አንዱን ጠርቶ “ይህ ወጣት ለሠራዊቱ ሻለቃ የሚነግረው ነገር ስላለው ወደ እሱ ውሰደው” አለው። 18  እሱም ወደ ሻለቃው ይዞት ሄደና “እስረኛው ጳውሎስ ጠርቶኝ ይህ ወጣት የሚነግርህ ነገር ስላለው ወደ አንተ እንድወስደው ጠየቀኝ” አለው። 19  ሻለቃውም እጁን ይዞ ገለል ካደረገው በኋላ “ልትነግረኝ የፈለግከው ነገር ምንድን ነው?” ሲል ለብቻው ይጠይቀው ጀመር። 20  እሱም እንዲህ አለ:- “አይሁዳውያን ስለ ጳውሎስ ይበልጥ በትክክል ማወቅ እንደፈለጉ በማስመሰል ነገ ወደ ሳንሄድሪን ሸንጎ እንድታመጣው ሊጠይቁህ ተስማምተዋል። 21  አንተ ግን በዚህ እንዳትታለል፤ ምክንያቱም ከመካከላቸው ከአርባ በላይ የሚሆኑ ሰዎች አድብተው እየጠበቁት ነው፤ ደግሞም እሱን እስኪገድሉ ድረስ እህልም ሆነ ውኃ ላለመቅመስ ተማምለዋል፤ አሁንም ተዘጋጅተው የአንተን ፈቃድ እየተጠባበቁ ነው።” 22  በዚህ ጊዜ የሠራዊቱ ሻለቃ “ይህን ነገር ለእኔ መንገርህን ለማንም እንዳታወራ” ብሎ ካዘዘው በኋላ ወጣቱን አሰናበተው። 23  ከዚያም ከመኮንኖቹ መካከል ሁለቱን ጠርቶ እንዲህ አላቸው:- “ከምሽቱ ሦስት ሰዓት ወደ ቂሳርያ የሚሄዱ ሁለት መቶ ወታደሮች እንዲሁም ሰባ ፈረሰኞችና ጦር የያዙ ሁለት መቶ ሰዎች አዘጋጁ። 24  በተጨማሪም ጳውሎስ የሚጓዝባቸው የጋማ ከብቶች አዘጋጁ፤ ወደ አገረ ገዥው ወደ ፊሊክስም በደህና አድርሱት።” 25  እንዲህ የሚል ደብዳቤም ጻፈ:- 26  “ከቀላውዴዎስ ሉስዮስ፤ ለክቡር አገረ ገዥ ለፊሊክስ:- ሰላም ለአንተ ይሁን። 27  አይሁዳውያን ይህን ሰው ይዘው ሊገድሉት ነበር፤ ሆኖም ሮማዊ መሆኑን ስላወቅኩ ወታደሮች ይዤ በድንገት በመድረስ አዳንኩት። 28  እሱን የከሰሱት ለምን እንደሆነ ለማረጋገጥ ስለፈለግኩም ወደ ሳንሄድሪን ሸንጎአቸው አቀረብኩት። 29  የተከሰሰውም ከሕጋቸው ጋር በተያያዘ በተነሳ ውዝግብ እንደሆነ ተረድቻለሁ፤ ሆኖም ለሞት ወይም ለእስራት የሚያበቃ አንድም ክስ አላገኘሁም። 30  ይሁንና በዚህ ሰው ላይ የተሸረበ ሴራ እንዳለ ስለተነገረኝ ወዲያውኑ ወደ አንተ ልኬዋለሁ፤ ከሳሾቹም ክሳቸውን በአንተ ፊት እንዲያቀርቡ ነግሬአቸዋለሁ።” 31  ስለዚህ ወታደሮቹ በታዘዙት መሠረት ጳውሎስን ይዘው በሌሊት ወደ አንቲጳጥሪስ ወሰዱት። 32  በማግስቱም ፈረሰኞቹ ከጳውሎስ ጋር ጉዟቸውን እንዲቀጥሉ በማድረግ እነሱ ወደ ጦር ሰፈሩ ተመለሱ። 33  ፈረሰኞቹም ቂሳርያ በደረሱ ጊዜ ደብዳቤውን ለአገረ ገዥው በመስጠት ጳውሎስን አስረከቡት። 34  እሱም ደብዳቤውን ካነበበ በኋላ የየትኛው አውራጃ ሰው እንደሆነ ጠየቀ፤ የኪልቅያ ሰው መሆኑንም አረጋገጠ። 35  ከዚያም “ከሳሾችህ ሲመጡ ደግሞ ጉዳይህን በደንብ አየዋለሁ” አለው። በሄሮድስ ቤተ መንግሥት ውስጥ በጥበቃ ሥር ሆኖ እንዲቆይም አዘዘ።

የግርጌ ማስታወሻዎች

ሥራ 23:12 * ይህን መሐላ ካልጠበቁ እርግማን እንደሚደርስባቸው ያምናሉ ማለት ነው።