በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

የሐዋርያት ሥራ 20:1-38

20  ሁከቱ ከበረደ በኋላ ጳውሎስ ደቀ መዛሙርቱን አስጠርቶ አበረታታቸው፤ ከዚያም ተሰናብቷቸው ወደ መቄዶንያ ለመጓዝ ተነሳ።  በሚያልፍባቸው ስፍራዎች የሚያገኛቸውን ሁሉ በብዙ ቃል እያበረታታ ወደ ግሪክ መጣ።  በዚያም ሦስት ወር ከቆየ በኋላ ወደ ሶርያ በመርከብ ለመሄድ ተዘጋጅቶ ሳለ አይሁዳውያን ሴራ ስለጠነሰሱበት ሐሳቡን ቀይሮ በመቄዶንያ አድርጎ ለመመለስ ወሰነ።  የጳይሮስ ልጅ የቤርያው ሶጳጥሮስ፣ የተሰሎንቄዎቹ አርስጥሮኮስና ሲኮንዱስ፣ የደርቤው ጋይዮስ፣ ጢሞቴዎስ እንዲሁም ከእስያ አውራጃ የመጡት ቲኪቆስና ጢሮፊሞስ አብረውት ነበሩ።  እነዚህም ቀድመውን ሄደው በጥሮአስ ጠበቁን፤  እኛ ግን ያልቦካ ቂጣ በዓል ካለፈ በኋላ ከፊልጵስዩስ በመርከብ ተነሳን፤ በአምስት ቀን ጊዜ ውስጥም እነሱ ወዳሉበት ወደ ጥሮአስ ደረስን፤ በዚያም ሰባት ቀን ቆየን።  በሳምንቱ የመጀመሪያ ቀን ምግብ ልንበላ አንድ ላይ ተሰብስበን ሳለን ጳውሎስ በማግስቱ ይሄድ ስለነበር ንግግር ይሰጣቸው ጀመር፤ ንግግሩንም እስከ እኩለ ሌሊት ድረስ አስረዘመ።  ተሰብስበንበት በነበረው ፎቅ ላይ ባለው ክፍል ውስጥ ብዙ መብራት ነበር።  ጳውሎስ ንግግሩን ባስረዘመ ጊዜ መስኮት ላይ ተቀምጦ የነበረ አውጤኪስ የሚባል አንድ ወጣት ከባድ እንቅልፍ ያዘው፤ እንቅልፍ ስለጣለውም ከሁለተኛ ፎቅ ላይ ወደቀ፣ ሲያነሱትም ሞቶ ነበር። 10  ጳውሎስም ከፎቅ ላይ ወርዶ በላዩ ላይ ተኝቶ አቀፈውና “ነፍሱ* በውስጡ ስላለች አትንጫጩ” አላቸው። 11  ከዚያም ወደ ፎቅ ወጥቶ ማዕዱን ካስጀመረ በኋላ እሱም በላ፤ እስከ ንጋት ድረስም ሲነጋገር ቆየና በመጨረሻ ከዚያ ተነስቶ ሄደ። 12  ሰዎቹም ወጣቱን ሕያው ሆኖ ወሰዱት፤ በዚህም እጅግ ተጽናኑ። 13  እኛም ጳውሎስን ልናሳፍር ወዳሰብንበት ወደ አሶስ ለመጓዝ ወደ መርከቧ ቀድመን ሄድን፤ ይህንም ያደረግነው ጳውሎስ ይህን በተመለከተ ለእኛ መመሪያ በመስጠት እሱ ራሱ በእግሩ ለመጓዝ አስቦ ስለነበር ነው። 14  ስለዚህ አሶስ ላይ ከተገናኘን በኋላ አሳፍረነው ወደ ሚጢሊኒ ሄድን፤ 15  በቀጣዩም ቀን ጉዟችንን በመቀጠል ከኪዮስ ትይዩ ወዳለው ስፍራ ደረስን፤ በሚቀጥለው ቀን ደግሞ ሳሞስ ላይ አጭር ቆይታ አደረግን፤ በማግስቱም ሚሊጢን ደረስን። 16  ጳውሎስ በእስያ አውራጃ ምንም መቆየት ስላልፈለገ ኤፌሶንን አልፎ ለመሄድ ወሰነ፤ ምክንያቱም ቢችል ለጴንጤቆስጤ በዓል ኢየሩሳሌም ለመድረስ ቸኩሎ ነበር። 17  ይሁን እንጂ ከሚሊጢን ወደ ኤፌሶን መልእክት ልኮ የጉባኤውን ሽማግሌዎች አስጠራ። 18  ወደ እሱም በመጡ ጊዜ እንዲህ አላቸው:- “በእስያ አውራጃ እግሬ ከረገጠበት ከመጀመሪያው ቀን አንስቶ በዚያ በቆየሁበት ጊዜ ሁሉ ከእናንተ እንዳልተለየሁ ታውቃላችሁ፤ 19  በአይሁዳውያን ሴራ ምክንያት ብዙ መከራ ቢደርስብኝም እንኳ በታላቅ ትሕትናና በእንባ ጌታን አገለግል ነበር፤ 20  ደግሞም የሚጠቅማችሁን ማንኛውንም ነገር ከመንገርም ሆነ በአደባባይና ከቤት ወደ ቤት ከማስተማር ወደኋላ ብዬ አላውቅም። 21  ከዚህ ይልቅ አይሁዳውያንም ሆኑ ግሪኮች ንስሐ እንዲገቡና ወደ አምላክ እንዲመለሱ እንዲሁም በጌታችን በኢየሱስ እንዲያምኑ በሚገባ መሥክሬላቸዋለሁ። 22  አሁን ደግሞ እዚያ ምን እንደሚደርስብኝ ባላውቅም መንፈስ ወደ ኢየሩሳሌም እንድሄድ ግድ እያለኝ ነው፤ 23  ሆኖም እስራትና መከራ እንደሚጠብቀኝ መንፈስ ቅዱስ በደረስኩበት ከተማ ሁሉ በተደጋጋሚ ይመሠክርልኛል። 24  ይሁንና ሩጫዬን እስካጠናቀቅኩ እንዲሁም የአምላክን ጸጋ ምሥራች በሚገባ ለመመሥከር ከጌታ ኢየሱስ የተቀበልኩትን አገልግሎት እስከፈጸምኩ ድረስ ለነፍሴ ምንም አልሳሳም። 25  “እንግዲህ የአምላክን መንግሥት የሰበክሁላችሁ እናንተ ሁላችሁ ከዚህ በኋላ ፊቴን እንደማታዩ አውቃለሁ። 26  ስለዚህ ከሰው ሁሉ ደም ንጹሕ መሆኔን በዚች ቀን እናንተን ምሥክር አድርጌ መጥራት እችላለሁ፤ 27  ምክንያቱም የአምላክን ፈቃድ ሁሉ ለእናንተ ከመንገር ወደኋላ አላልኩም። 28  ለራሳችሁም ሆነ አምላክ በገዛ ልጁ ደም የዋጀውን ጉባኤውን እንድትጠብቁ መንፈስ ቅዱስ የበላይ ተመልካቾች አድርጎ በላዩ ለሾማችሁ መንጋ ሁሉ ተጠንቀቁ። 29  እኔ ከሄድኩ በኋላ ጨካኝ* ተኩላዎች በመካከላችሁ እንደሚገቡና መንጋውን በርኅራኄ እንደማይዙ አውቃለሁ፤ 30  ከእናንተ ከራሳችሁ መካከል እንኳ ደቀ መዛሙርቱን ወደ ራሳቸው ለመሳብ ጠማማ ነገር የሚናገሩ ሰዎች ይነሳሉ። 31  “ስለዚህ ነቅታችሁ ጠብቁ፤ ለሦስት ዓመት ያህል ሌሊትና ቀን እያንዳንዳችሁን በእንባ ከመምከር ወደኋላ እንዳላልኩ አስታውሱ። 32  አሁንም ለአምላክ እንዲሁም ሊያንጻችሁና በቅዱሳኑ ሁሉ መካከል ርስት ሊያወርሳችሁ ለሚችለው ለጸጋው ቃል አደራ እሰጣችኋለሁ። 33  የማንንም ብር ወይም ወርቅ ወይም ልብስ አልተመኘሁም። 34  እነዚህ እጆቼ ለእኔም ሆነ ከእኔ ጋር ለነበሩት የሚያስፈልጉንን ነገሮች ለማሟላት እንዳገለገሉ እናንተ ራሳችሁ ታውቃላችሁ። 35  እናንተም እንዲሁ እየሠራችሁ ደካማ የሆኑትን መርዳት እንዳለባችሁ በሁሉም ነገር አሳይቻችኋለሁ፤ እንዲሁም ‘ከመቀበል ይልቅ መስጠት የበለጠ ደስታ ያስገኛል’ በማለት ጌታ ኢየሱስ ራሱ የተናገረውን ቃል ማስታወስ ይኖርባችኋል።” 36  ይህንም ተናግሮ ከጨረሰ በኋላ ከሁሉም ጋር ተንበርክኮ ጸለየ። 37  ከዚያም ሁሉም እጅግ አለቀሱ፤ ጳውሎስንም አንገቱን እቅፍ አድርገው ሳሙት፤ 38  ከሁሉ ይበልጥ ያሳዘናቸው ከዚህ በኋላ ፊቱን እንደማያዩ የተናገረው ቃል ነው። ከዚያም እስከ መርከቧ ድረስ ሸኙት።

የግርጌ ማስታወሻዎች

ሥራ 20:10 * ወይም፣ “ሕይወቱ።” ከተጨማሪው መረጃ ላይ 7ኛውን ርዕስ ተመልከት።
ሥራ 20:29 * ወይም፣ “ጨቋኝ።”