በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

የሐዋርያት ሥራ 2:1-47

2  በጴንጤቆስጤ* በዓል ቀን ሁሉም በአንድ ቦታ ተሰብስበው ነበር፤  ድንገትም እንደ ኃይለኛ ነፋስ ያለ ድምፅ ከሰማይ መጣ፤ ተቀምጠውበት የነበረውንም ቤት ሞላው።  የእሳት ነበልባል የሚመስሉ ምላሶች ታዩአቸው፤ ተከፋፍለውም በእያንዳንዳቸው ላይ አረፉ፤  ሁሉም በመንፈስ ቅዱስ ተሞሉ፤ መንፈስም እንዲናገሩ ባስቻላቸው መሠረት በተለያዩ ልሳኖች ይናገሩ ጀመር።  በዚያን ጊዜ ከሰማይ በታች ካለ አገር ሁሉ የመጡ ፈሪሃ አምላክ ያላቸው አይሁዳውያን በኢየሩሳሌም ነበሩ።  ስለዚህ ይህ ድምፅ በተሰማ ጊዜ ብዙ ሕዝብ ተሰበሰበ፤ እያንዳንዱም ሰው ደቀ መዛሙርቱ በገዛ ቋንቋው ሲናገሩ በመስማቱ ግራ ተጋባ።  ደግሞም ሕዝቡ በመገረምና በመደነቅ እንዲህ ይሉ ጀመር:- “እንዴ፣ እነዚህ የሚናገሩት ሁሉ የገሊላ ሰዎች አይደሉም እንዴ?  ታዲያ እያንዳንዳችን የተወለድንበትን የገዛ ቋንቋችንን ሲናገሩ የምንሰማው እንዴት ነው?  ከጳርቴና፣ ከሜዶን፣ ከኤላም፣ ከሜሶጶጣሚያ፣ ከይሁዳ፣ ከቀጰዶቅያ፣ ከጳንጦስ፣ ከእስያ አውራጃ፣ 10  ከፍርግያ፣ ከጵንፍልያ፣ ከግብፅ፣ በቀሬና አጠገብ ካሉት የሊቢያ አውራጃዎችና ከሮም የመጣን አይሁዶችና ወደ ይሁዲነት የተለወጥን ሰዎች፣ 11  እንዲሁም የቀርጤስና የዓረብ ሰዎች ሁላችን ስለ አምላክ ታላቅ ሥራ በገዛ ራሳችን ልሳን ሲናገሩ እየሰማናቸው ነው።” 12  ስለዚህ ሁሉም ተገርመውና ግራ ተጋብተው እርስ በርሳቸው “ይህ የሆነው ለምን ይሆን?” ይባባሉ ነበር። 13  ይሁን እንጂ ሌሎች “ያልፈላ የወይን ጠጅ ተግተው ነው” በማለት ያፌዙባቸው ጀመር። 14  ጴጥሮስ ግን ከአሥራ አንዱ ጋር ተነስቶ በመቆም ድምፁን ከፍ አድርጎ እንዲህ ሲል ለሕዝቡ ተናገረ:- “እናንተ የይሁዳ ሰዎችና የኢየሩሳሌም ነዋሪዎች ሁሉ፣ አንድ ማወቅ ያለባችሁ ነገር ስላለ ንግግሬን በጥሞና አድምጡ። 15  ጊዜው ገና ከጠዋቱ ሦስት ሰዓት ስለሆነ እነዚህ ሰዎች እናንተ እንዳሰባችሁት አልሰከሩም። 16  ከዚህ ይልቅ ይህ የሆነው ነቢዩ ኢዩኤል እንዲህ ሲል በተናገረው መሠረት ነው:- 17  ‘አምላክ እንዲህ ይላል:- “በመጨረሻው ቀን መንፈሴን በሥጋ ለባሽ ሁሉ ላይ አፈሳለሁ፤ ወንዶች ልጆቻችሁና ሴቶች ልጆቻችሁ ትንቢት ይናገራሉ፤ ወጣቶቻችሁ ራእይ ያያሉ፤ ሽማግሌዎቻችሁም ሕልም ያልማሉ፤ 18  በዚያ ቀን በወንዶች ባሪያዎቼና በሴቶች ባሪያዎቼ ላይ ሳይቀር መንፈሴን አፈሳለሁ፤ እነሱም ትንቢት ይናገራሉ። 19  በላይ በሰማይ ድንቅ ነገሮች፣ በታች በምድር ደግሞ ተአምራዊ ምልክቶች አሳያለሁ፤ ደም፣ እሳትና የጭስ ጭጋግም ይታያል፤ 20  ታላቁና ዕፁብ ድንቅ የሆነው የይሖዋ ቀን ከመድረሱ በፊት ፀሐይ ወደ ጨለማ፣ ጨረቃም ወደ ደም ይለወጣሉ። 21  የይሖዋን ስም የሚጠራ ሁሉ ይድናል።”’ 22  “የእስራኤል ሰዎች ሆይ፣ ይህን ቃል ስሙ:- እናንተ ራሳችሁ እንደምታውቁት፣ አምላክ በእሱ አማካኝነት በመካከላችሁ ተአምራትን፣ ድንቅ ነገሮችንና ምልክቶችን በመፈጸም ለእናንተ በይፋ የገለጠው የናዝሬቱ ኢየሱስ 23  አምላክ አስቀድሞ በወሰነው ውሳኔውና አስቀድሞ ባወቀው እውቀቱ መሠረት ለእናንተ አልፎ ተሰጠ፤ እናንተም በክፉ ሰዎች እጅ በእንጨት ላይ ሰቅላችሁ ገደላችሁት። 24  አምላክ ግን ከሞት እስራት አላቅቆ አስነሳው፤ ምክንያቱም ሞት ይዞ ሊያስቀረው አልቻለም። 25  ዳዊትም ስለ እሱ እንዲህ ይላል:- ‘ይሖዋን ሁልጊዜ በፊቴ አየዋለሁ፤ እሱ በቀኜ ስለሆነ ምንጊዜም አልናወጥም። 26  ስለዚህ ልቤ ደስ አለው፤ አንደበቴም ሐሴት አደረገ። ደግሞም ሥጋዬ እንኳ ሳይቀር በተስፋ ይኖራል፤ 27  ምክንያቱም ነፍሴን በሔዲስ* አትተዋትም፤ ታማኝ አገልጋይህም እንዲበሰብስ አትፈቅድም። 28  የሕይወትን መንገድ አሳውቀኸኛል፤ ሞገስ በማሳየት በደስታ እንድሞላ ታደርገኛለህ።’ 29  “ወንድሞች፣ ከቀድሞ አባቶች አንዱ የሆነው ዳዊት እንደሞተና እንደተቀበረ እንዲሁም መቃብሩ እስከ ዛሬ ድረስ በመካከላችን እንደሚገኝ ለእናንተ በግልጽ እንድናገር ፍቀዱልኝ። 30  እሱ ነቢይ ስለነበረና አምላክ ከአብራኩ ክፋይ አንዱን በዙፋኑ ላይ እንደሚያስቀምጥ በመሐላ ቃል እንደገባለት ስላወቀ 31  አምላክ ክርስቶስን በሔዲስ እንደማይተወውና ሥጋውም እንደማይበሰብስ አስቀድሞ ተረድቶ ስለ ትንሣኤው ተናገረ። 32  ይህን ኢየሱስን አምላክ ከሞት አስነሳው፤ እኛ ሁላችንም ለዚህ ነገር ምሥክሮች ነን። 33  ስለዚህ ወደ አምላክ ቀኝ ከፍ ከፍ ስለተደረገና ቃል የተገባውን ቅዱስ መንፈስ ከአብ ስለተቀበለ ይህን እናንተ የምታዩትንና የምትሰሙትን አፈሰሰው። 34  እርግጥ ዳዊት ወደ ሰማያት አልወጣም፤ ሆኖም እሱ ራሱ እንዲህ ሲል ተናግሯል:- ‘ይሖዋ ጌታዬን እንዲህ ብሎታል:- “በቀኜ ተቀመጥ፤ 35  ጠላቶችህን ለእግርህ እንደ መርገጫ እስከማደርግልህ ድረስ።”’ 36  ስለዚህ ይህን እናንተ የሰቀላችሁትን ኢየሱስን አምላክ ጌታም ክርስቶስም እንዳደረገው የእስራኤል ቤት ሁሉ በእርግጥ ይወቅ።” 37  ሰዎቹም ይህን በሰሙ ጊዜ ልባቸው እጅግ ተነክቶ ጴጥሮስንና የቀሩትን ሐዋርያት “ወንድሞች፣ ታዲያ ምን ብናደርግ ይሻላል?” አሏቸው። 38  ጴጥሮስም እንዲህ አላቸው:- “ንስሐ ግቡ፤ እያንዳንዳችሁም ለኃጢአታችሁ ይቅርታ እንድታገኙ በኢየሱስ ክርስቶስ ስም ተጠመቁ፤ የመንፈስ ቅዱስንም ነፃ ስጦታ ትቀበላላችሁ። 39  ምክንያቱም የተስፋው ቃል ለእናንተና ለልጆቻችሁ እንዲሁም ይሖዋ አምላካችን ወደ ራሱ ለሚጠራቸው በሩቅ ላሉ ሁሉ ነው።” 40  በሌላ ብዙ ቃልም በሚገባ መሠከረላቸው፤ “ከዚህ ጠማማ ትውልድ ዳኑ” እያለም አጥብቆ ያሳስባቸው ጀመር። 41  ስለዚህ ቃሉን ከልባቸው የተቀበሉ ተጠመቁ፤ በዚያም ቀን ሦስት ሺህ ገደማ የሚሆኑ ነፍሳት ተጨመሩ። 42  የሐዋርያቱንም ትምህርት በትኩረት መከታተላቸውን ቀጠሉ፤ ያላቸውን ነገር ሁሉ አብረው ይካፈሉ፣ ምግባቸውንም አብረው ይበሉ እንዲሁም በጸሎት ይተጉ ነበር። 43  በእያንዳንዱም ነፍስ ላይ ፍርሃት ወደቀ፤ ሐዋርያቱም ብዙ ድንቅ ነገሮችና ተአምራዊ ምልክቶች ያደርጉ ጀመር። 44  አማኝ የሆኑትም ሁሉ አብረው ነበሩ፤ ያላቸውም ነገር ሁሉ የጋራ ነበር፤ 45  በተጨማሪም ያላቸውን ሀብትና ንብረት በመሸጥ ገንዘቡን ለእያንዳንዱ ሰው እንደሚያስፈልገው ያከፋፍሉ ነበር። 46  በየዕለቱም በአንድ ልብ ሆነው በቤተ መቅደሱ አዘውትረው ይገኙ ነበር፤ ምግባቸውንም በግለሰብ ቤቶች ይበሉ የነበረ ሲሆን የሚመገቡትም በታላቅ ደስታና በንጹሕ ልብ ነበር፤ 47  አምላክንም ያወድሱ የነበረ ከመሆኑም በላይ በሰው ሁሉ ፊት ሞገስ ነበራቸው። በዚሁ ጊዜም ይሖዋ የሚድኑ ሰዎችን በየዕለቱ በእነሱ ላይ ይጨምር ነበር።

የግርጌ ማስታወሻዎች

ሥራ 2:1 * በግሪክኛ ጴንጤቆስጤ ማለት “ሃምሳኛ” ማለት ነው። ይህ በዓል ኒሳን 16 በዋለ በ50ኛው ቀን ላይ ይከበራል።
ሥራ 2:27 * ከተጨማሪው መረጃ ላይ 8ኛውን ርዕስ ተመልከት።