በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

የሐዋርያት ሥራ 19:1-41

19  ከጊዜ በኋላ፣ አጵሎስ በቆሮንቶስ ሳለ ጳውሎስ በመሃል አገር አቋርጦ ወደ ኤፌሶን ወረደ፤ በዚያም አንዳንድ ደቀ መዛሙርትን አገኘ፤  እነሱንም “አማኞች በሆናችሁ ጊዜ መንፈስ ቅዱስ ተቀብላችኋል?” አላቸው። እነሱም “ኧረ እኛ መንፈስ ቅዱስ ስለመኖሩም የሰማነው ነገር የለም” አሉት።  እሱም “ታዲያ ምን ዓይነት ጥምቀት ነው የተጠመቃችሁት?” አላቸው። እነሱም “የዮሐንስን ጥምቀት” አሉት።  ጳውሎስም “ዮሐንስ ያጠምቅ የነበረው ሰዎች ከእሱ በኋላ በሚመጣው በኢየሱስ እንዲያምኑ በመንገር የንስሐ ምልክት የሆነውን ጥምቀት ነበር” አለ።  እነሱም ይህን ሲሰሙ በጌታ ኢየሱስ ስም ተጠመቁ።  ጳውሎስም እጁን በላያቸው በጫነ ጊዜ መንፈስ ቅዱስ ወረደባቸው፤ እነሱም በልሳን መናገርና መተንበይ ጀመሩ።  ሰዎቹም በአጠቃላይ አሥራ ሁለት ያህል ነበሩ።  ጳውሎስም ወደ ምኩራብ እየገባ ንግግር በመስጠትና ስለ አምላክ መንግሥት አሳማኝ ማስረጃዎች በማቅረብ ለሦስት ወራት ያህል በድፍረት ይናገር ነበር።  ሆኖም አንዳንዶቹ በግትርነታቸው ጸንተው ለማመን እምቢተኛ በመሆን የጌታን መንገድ በሕዝቡ ፊት ባጥላሉ ጊዜ ከእነሱ በመራቅ ደቀ መዛሙርቱን ለይቶ ወሰዳቸው፤ በጢራኖስ የትምህርት ቤት አዳራሽም በየዕለቱ ንግግር ይሰጥ ነበር። 10  ይህም ለሁለት ዓመት ያህል ቀጠለ፤ ከዚህም የተነሳ በእስያ አውራጃ የሚኖሩ አይሁዳውያንና ግሪካውያን ሁሉ የጌታን ቃል ሰሙ። 11  አምላክም በጳውሎስ እጅ እጅግ አስደናቂ የሆኑ ነገሮችን መፈጸሙን ቀጠለ፤ 12  ሰዎችም የጳውሎስን ጨርቆችና ሽርጦች ወደታመሙት ሰዎች ሲወስዱ ሰዎቹ በሽታቸው ይለቃቸው ነበር፤ ርኩሳን መናፍስትም ይወጡ ነበር። 13  ይሁንና እየዞሩ አጋንንትን ያስወጡ ከነበሩት አይሁዳውያን አንዳንዶቹም “ጳውሎስ በሚሰብከው በኢየሱስ አጥብቄ አዝሃለሁ” እያሉ ክፉ መናፍስት በያዟቸው ሰዎች ላይ የጌታ ኢየሱስን ስም ለመጥራት ሞከሩ። 14  አስቄዋ የተባለ የአንድ አይሁዳዊ ሊቀ ካህናት ሰባት ወንዶች ልጆችም ይህን ያደርጉ ነበር። 15  ክፉው መንፈስ ግን መልሶ “ኢየሱስን አውቀዋለሁ፤ ጳውሎስንም አውቀዋለሁ፤ ደግሞ እናንተ እነማን ናችሁ?” አላቸው። 16  ከዚያም ክፉው መንፈስ ያደረበት ሰው ዘሎ ጉብ አለባቸው፣ አሸነፋቸውም፤ ስለዚህ ራቁታቸውን ሆነውና ቆስለው ከዚያ ቤት ሸሹ። 17  በኤፌሶን የሚኖሩት አይሁዳውያንና ግሪካውያን ሁሉ ይህን ሰሙ፤ በመሆኑም ሁሉም ፍርሃት አደረባቸው፤ የጌታ ኢየሱስ ስምም ይበልጥ እየገነነ ሄደ። 18  አማኞች ከሆኑት መካከል ብዙዎቹም እየመጡ ያደረጉትን ይናዘዙና በግልጽ ይናገሩ ነበር። 19  ደግሞም አስማት ይሠሩ ከነበሩት መካከል ብዙዎች መጽሐፎቻቸውን አንድ ላይ ሰብስበው በማምጣት በሁሉ ሰው ፊት አቃጠሉ። የመጽሐፎቹንም ዋጋ ሲያሰሉ ሃምሳ ሺህ የብር ሳንቲሞች* ሆኖ አገኙት። 20  በዚህ መንገድ የይሖዋ ቃል በኃይል እያደገና እያሸነፈ ሄደ። 21  ይህ ሁሉ ከሆነ በኋላ ጳውሎስ በመቄዶንያና በአካይያ በኩል አልፎ ወደ ኢየሩሳሌም ለመሄድ በመንፈሱ አስቦ “እዚያ ከደረስኩ በኋላ ደግሞ ወደ ሮም መሄድ አለብኝ” አለ። 22  ስለዚህ ከሚያገለግሉት መካከል ሁለቱን ማለትም ጢሞቴዎስንና ኤርስጦስን ወደ መቄዶንያ ላካቸው፤ እሱ ራሱ ግን በእስያ አውራጃ ለተወሰነ ጊዜ ቆየ። 23  በዚህ ወቅት የጌታን መንገድ በተመለከተ ታላቅ ሁከት ተፈጠረ። 24  ምክንያቱም ድሜጥሮስ የተባለ አንድ የብር አንጥረኛ የአርጤምስን ቤተ መቅደስ ምስሎች እየሠራ ለአንጥረኞች ከፍተኛ ገቢ ያስገኝ ነበር፤ 25  እሱም እነሱንና በተመሳሳይ ሙያ የተሠማሩ ሰዎችን ሰብስቦ እንዲህ አለ:- “ሰዎች፣ መቼም ብልጽግናችን የተመካው በዚህ ሥራ ላይ እንደሆነ ታውቃላችሁ። 26  በተጨማሪም ይህ ጳውሎስ የተባለ ሰው በኤፌሶን ብቻ ሳይሆን በመላው የእስያ አውራጃ ማለት ይቻላል፣ በእጅ የተሠሩ አማልክት ሁሉ አማልክት አይደሉም እያለ ብዙ ሰዎችን አሳምኖ አመለካከታቸውን እንዳስለወጠ ያያችሁትና የሰማችሁት ጉዳይ ነው። 27  ከዚህም በላይ አሳሳቢ የሆነው ይህ የእኛ ሥራ መናቁ ብቻ ሳይሆን የታላቋ አምላክ የአርጤምስ ቤተ መቅደስ ዋጋ ቢስ ሆኖ ሊቀርና መላው የእስያ አውራጃም ሆነ ዓለም በሙሉ የሚያመልከው ገናናው ክብሯ ሳይቀር ሊገፈፍ መሆኑ ጭምር ነው።” 28  ሰዎቹ ይህን ሲሰሙ በቁጣ ተሞልተው “የኤፌሶኗ አርጤምስ ታላቅ ናት!” እያሉ ይጮኹ ጀመር። 29  በመሆኑም ከተማዋ በረብሻ ተሞላች፤ ሕዝቡም የመቄዶንያ ሰዎች የሆኑትን የጳውሎስን የጉዞ ጓደኞች ይኸውም ጋይዮስንና አርስጥሮኮስን በኃይል ይዘው በአንድነት ወደ ጨዋታ ማሳያው ስፍራ እየተጣደፉ ገቡ። 30  ጳውሎስም ሕዝቡ ወዳለበት ሊገባ ፈልጎ ነበር፤ ደቀ መዛሙርቱ ግን አልፈቀዱለትም። 31  ጳውሎስን ይወዱት የነበሩ አንዳንድ የበዓላትና የውድድር አዘጋጆች እንኳ ሳይቀሩ ወደ ጨዋታ ማሳያው ስፍራ በመግባት ራሱን ለአደጋ እንዳያጋልጥ መልእክት በመላክ ይለምኑት ጀመር። 32  በተሰበሰበው ሕዝብ መካከል ከፍተኛ ትርምስ ተፈጥሮ ስለነበር አንዳንዶቹ አንድ ነገር ሲናገሩ ሌሎቹ ደግሞ ሌላ ነገር እየተናገሩ ይጯጯኹ ነበር፤ አብዛኛውም ሰው ለምን እዚያ እንደተገኘ እንኳ አያውቅም ነበር። 33  አንዳንዶች እስክንድርን ከሕዝቡ መካከል ባወጡት ጊዜ አይሁዳውያን ወደፊት ገፉት፤ እስክንድርም የመከላከያ ሐሳቡን ለሕዝቡ ሊያቀርብ ፈልጎ በእጁ ምልክት ሰጣቸው። 34  ሆኖም እሱ አይሁዳዊ መሆኑን ባወቁ ጊዜ ሁሉም በአንድ ድምፅ “የኤፌሶኗ አርጤምስ ታላቅ ናት!” እያሉ ለሁለት ሰዓት ያህል ጮኹ። 35  በመጨረሻ የከተማዋ ዋና ጸሐፊ ሕዝቡን ጸጥ አሰኝቶ እንዲህ አለ:- “የኤፌሶን ሰዎች ሆይ፣ የኤፌሶናውያን ከተማ ለታላቋ አርጤምስና ከሰማይ ለወረደው ምስሏ የቤተ መቅደስ ጠባቂ እንደሆነች የማያውቅ ማን አለ? 36  ስለዚህ ይህ ፈጽሞ የማይታበል ሐቅ ስለሆነ ልትረጋጉና የችኮላ እርምጃ ከመውሰድ ልትቆጠቡ ይገባል። 37  ምክንያቱም እነዚህ ያመጣችኋቸው ሰዎች ቤተ መቅደስ የዘረፉ ወይም የምናመልካትን አምላክ የሰደቡ አይደሉም። 38  ስለዚህ ድሜጥሮስና አብረውት ያሉት አንጥረኞች የሚከሱት ሰው ካለ ችሎት የሚሰየምባቸው ቀናትና ክሱን የሚሰሙ አገረ ገዥዎች አሉ፤ እዚያ መሟገት ይችላሉ። 39  ከዚህ ያለፈ ልታቀርቡት የምትፈልጉት ክስ ካለ ደግሞ በሕጋዊ ጉባኤ መዳኘት ይኖርበታል። 40  አለዚያ ዛሬ በተፈጸመው ነገር የተነሳ ሕዝብ አሳድማችኋል ተብለን እንዳንከሰስ ያሰጋል፤ ለዚህ ሁሉ ሁከት መንስኤው ምን እንደሆነ ብንጠየቅ ልንሰጠው የምንችለው አጥጋቢ መልስ የለም።” 41  ይህን ከተናገረ በኋላ የተሰበሰበው ሕዝብ እንዲበተን አደረገ።

የግርጌ ማስታወሻዎች

ሥራ 19:19 * ብር ከተባለው ማዕድን የተሠራ ሳንቲም።