በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

የሐዋርያት ሥራ 17:1-34

17  ከዚያም በአምፊጶሊስና በአጶሎንያ በኩል ተጉዘው የአይሁዳውያን ምኩራብ ወዳለበት ወደ ተሰሎንቄ መጡ።  ጳውሎስም እንደ ልማዱ ወደ እነሱ ገባ፤ ለሦስት ሰንበትም ከቅዱሳን መጻሕፍት እየጠቀሰ ከእነሱ ጋር ተወያየ፤  ክርስቶስ መከራ መቀበሉና ከሞት መነሳቱ የግድ አስፈላጊ እንደነበር ማስረጃ እየጠቀሰ በማብራራትና በማስረዳት “ይህ እኔ እያሳወቅኳችሁ ያለሁት ኢየሱስ እሱ ክርስቶስ ነው” አላቸው።  ከዚህም የተነሳ ከእነሱ መካከል አንዳንዶቹ አማኞች በመሆን ከጳውሎስና ከሲላስ ጋር ተባበሩ፤ ከግሪካውያንም መካከል አምላክን የሚያመልኩ ከፍተኛ ቁጥር ያላቸው ሰዎች እንዲሁም ቁጥራቸው ጥቂት የማይባል የታወቁ ሴቶች እንዲሁ አደረጉ።  ሆኖም አይሁዳውያን ቅናት ስላደረባቸው በገበያ ስፍራ ከሚውሉ ሥራ ፈቶች መካከል አንዳንድ ክፉ ሰዎችን አሰባስበው አሳደሙ፤ ከተማዋንም በሁከት አመሷት። ጳውሎስና ሲላስንም አምጥተው ለረብሻ የተሰበሰበው ሕዝብ ፊት ለማቅረብ የያሶንን ቤት ሰብረው ገቡ።  ባጧቸው ጊዜም ያሶንንና አንዳንድ ወንድሞችን እየጎተቱ ወስደው የከተማዋ ገዥዎች ፊት በማቅረብ እንዲህ እያሉ ጮኹ:- “ዓለምን ሁሉ ያናወጡት እነዚያ ሰዎች እዚህም አሉ፤  ያሶንም በእንግድነት ተቀብሏቸዋል። እነዚህ ሰዎች በሙሉ ኢየሱስ የሚባል ሌላ ንጉሥ አለ እያሉ የቄሳርን ሕግ የሚቃረን ነገር ያደርጋሉ።”  ሕዝቡና የከተማዋ ገዥዎች ይህን ሲሰሙ ተቆጡ፤  ያሶንንና ሌሎቹን የዋስትና ገንዘብ እንዲያስይዙ ካደረጓቸው በኋላ ለቀቋቸው። 10  ወንድሞች ወዲያውኑ እንደመሸ ጳውሎስንና ሲላስን ወደ ቤርያ ላኳቸው፤ እነሱም እዚያ እንደደረሱ ወደ አይሁዳውያን ምኩራብ ገቡ። 11  በቤርያ የነበሩት አይሁዳውያን በተሰሎንቄ ከነበሩት ይልቅ ልበ ቀና ነበሩ፤ ምክንያቱም የሰሙት ነገር ትክክል መሆኑን ለማረጋገጥ በየዕለቱ ቅዱሳን መጻሕፍትን በሚገባ በመመርመር ቃሉን በታላቅ ጉጉት ተቀብለዋል። 12  ስለዚህ ከእነሱ መካከል ብዙዎቹ እንዲሁም ቁጥራቸው ጥቂት የማይባል የታወቁ ግሪካውያን ሴቶችና ወንዶች አማኞች ሆኑ። 13  ሆኖም በተሰሎንቄ ያሉት አይሁዳውያን ጳውሎስ የአምላክን ቃል በቤርያም እንደሰበከ ባወቁ ጊዜ ሕዝቡን ለማነሳሳትና ለማወክ ወደዚያም መጡ። 14  በዚህ ጊዜ ወንድሞች ወዲያውኑ ጳውሎስን እስከ ባሕሩ ዳርቻ ድረስ እንዲሄድ ላኩት፤ ሲላስና ጢሞቴዎስ ግን እዚያው ቀሩ። 15  ይሁን እንጂ ጳውሎስን የሸኙት ሰዎች እስከ አቴና ካደረሱት በኋላ ‘ሲላስና ጢሞቴዎስ በተቻለ ፍጥነት ወደ እኔ ይምጡ’ የሚል ትእዛዝ ከጳውሎስ ተቀብለው ተመለሱ። 16  ጳውሎስ በአቴና እየጠበቃቸው ሳለ ከተማዋ በጣዖት የተሞላች መሆኗን አይቶ መንፈሱ ተበሳጨ። 17  ከዚህም የተነሳ በምኩራብ ከአይሁዳውያንና አምላክን ከሚያመልኩ ሌሎች ሰዎች ጋር እንዲሁም በየዕለቱ በገበያ ስፍራ ከሚያገኛቸው ሰዎች ጋር ይወያይ ጀመር። 18  ሆኖም ከኤፊቆሮስና ከኢስጦይክ ፈላስፎች መካከል አንዳንዶቹ ይከራከሩት ጀመር፤ አንዳንዶቹም “ይህ ለፍላፊ ምን ሊያወራ ፈልጎ ነው?” ይሉ ነበር። ሌሎቹ ደግሞ “ስለ ባዕዳን አማልክት የሚሰብክ ይመስላል” ይሉ ነበር። ይህን ያሉት ስለ ኢየሱስና ስለ ትንሣኤው ያውጅ ስለነበር ነው። 19  ስለዚህ ይዘው ወደ አርዮስፋጎስ* ከወሰዱት በኋላ እንዲህ አሉት:- “ይህ የምትናገረው አዲስ ትምህርት ምን እንደሆነ ልታስረዳን ትችላለህ? 20  ምክንያቱም ለጆሯችን እንግዳ የሆነ ነገር እያሰማኸን ነው። ስለዚህ የዚህ ነገር ፍሬ ሐሳብ ምን እንደሆነ መረዳት እንፈልጋለን።” 21  ደግሞም የአቴና ሰዎችና ወደዚያ የመጡ የውጭ አገር ሰዎች ትርፍ ጊዜያቸውን የሚያሳልፉት ስለ አዳዲስ ነገሮች በማውራትና በመስማት ብቻ ነበር። 22  በዚህ ጊዜ ጳውሎስ በአርዮስፋጎስ መካከል ቆሞ እንዲህ አለ:- “የአቴና ሰዎች ሆይ፣ በሁሉም መስክ ከሌሎች ሰዎች ይበልጥ እናንተ አማልክትን እንደምትፈሩ ማየት ችያለሁ። 23  ለአብነት ያህል፣ እየተዘዋወርኩ ሳለሁ ሃይማኖታዊ አክብሮት የምትሰጧቸውን ነገሮች በትኩረት ስመለከት ‘ለማይታወቅ አምላክ’ የሚል ጽሑፍ የተቀረጸበት አንድ መሠዊያ አይቻለሁ። ስለዚህ ይህን ሳታውቁ አምልኮታዊ ክብር የምትሰጡትን እኔ አሳውቃችኋለሁ። 24  ዓለምንና በውስጡ ያለውን ነገር ሁሉ የፈጠረው አምላክ፣ እሱ የሰማይና የምድር ጌታ ስለሆነ በእጅ በተሠሩ ቤተ መቅደሶች ውስጥ አይኖርም፤ 25  በተጨማሪም ሕይወትንና እስትንፋስንም ሆነ ማንኛውንም ነገር ለሰው ሁሉ የሚሰጠው እሱ ስለሆነ የሚጎድለው ነገር ያለ ይመስል በሰው እጅ አይገለገልም። 26  በምድር ሁሉ ላይ እንዲኖሩም የሰውን ወገኖች በሙሉ ከአንድ ሰው ፈጠረ፤ የተወሰኑትን ዘመናትና የሰው ልጆች የሚኖሩበትንም ድንበር ደነገገ፤ 27  ይህንም ያደረገው ሰዎች አምላክን እንዲፈልጉትና አጥብቀው በመሻት እንዲያገኙት ብሎ ነው፤ እንዲህ ሲባል ግን እሱ ከእያንዳንዳችን የራቀ ነው ማለት አይደለም። 28  ምክንያቱም በእናንተ መካከል ያሉ አንዳንድ ባለቅኔዎች ‘እኛም የእሱ ልጆች ነንና’ ብለው እንደተናገሩት ሁሉ ሕይወት ያገኘነው፣ የምንንቀሳቀሰውና የምንኖረው በእሱ ነው። 29  “እንግዲህ እኛ የአምላክ ልጆች ከሆንን አምላክ በሰው ጥበብና የፈጠራ ችሎታ ከወርቅ ወይም ከብር ወይም ከድንጋይ የተቀረጸን ነገር ይመስላል ብለን ልናስብ አይገባም። 30  እርግጥ አምላክ ሰዎች ባለማወቅ የኖሩበትን ጊዜ ቸል ብሎ አልፎታል፤ አሁን ግን የሰው ልጆች ሁሉ በያሉበት ቦታ ንስሐ መግባት አለባቸው ብሎ እየተናገረ ነው። 31  ምክንያቱም በሾመው ሰው አማካኝነት በዓለም ሁሉ ላይ በጽድቅ ለመፍረድ ዓላማ ያለው ሲሆን ይህንንም ለማድረግ ቀን ወስኗል፤ እሱንም ከሞት በማስነሳት ለሰዎች ሁሉ ዋስትና ሰጥቷል።” 32  እነሱም ስለ ሙታን ትንሣኤ በሰሙ ጊዜ አንዳንዶቹ ያሾፉበት ጀመር፤ ሌሎች ግን “በሌላም ጊዜ ስለዚሁ ጉዳይ መስማት እንፈልጋለን” አሉት። 33  ከዚያም ጳውሎስ ከመካከላቸው ወጥቶ ሄደ፤ 34  አንዳንድ ሰዎች ግን ከእሱ ጋር በመተባበር አማኞች ሆኑ፤ ከእነሱም መካከል የአርዮስፋጎስ ፍርድ ቤት ዳኛ የሆነው ዲዮናስዮስና ደማሪስ የተባለች ሴት እንዲሁም ሌሎች ሰዎች ይገኙበታል።

የግርጌ ማስታወሻዎች

ሥራ 17:19 * በጥንቷ አቴና የሚገኝ ኮረብታ ሲሆን በዚህ ቦታ ጠቅላይ ፍርድ ቤቱም ይሰበሰብ ነበር።