በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

ዕብራውያን 3:1-19

3  ስለሆነም የሰማያዊው ጥሪ ተካፋዮች የሆናችሁ ቅዱሳን ወንድሞች፣ አምነን በመቀበል በይፋ የምንናገርለትን፣ ሐዋርያና ሊቀ ካህናት የሆነውን ኢየሱስን አስቡ።  ሙሴ በመላው የአምላክ ቤት ላይ ታማኝ እንደነበረ ሁሉ እሱም እንዲህ እንዲሆን ላደረገው ታማኝ ነበር።  ቤቱን የሠራው ከቤቱ የበለጠ ክብር እንዳለው ሁሉ የኋለኛው፣ ከሙሴ የበለጠ ክብር የሚገባው እንደሆነ ተደርጎ ተቆጥሯል።  በእርግጥ እያንዳንዱ ቤት የራሱ ሠሪ አለው፤ ሁሉን ነገር የሠራው ግን አምላክ ነው።  ደግሞም ሙሴ በመላው የአምላክ ቤት እንደ አንድ አገልጋይ መጠን ታማኝ ነበር። አገልግሎቱም ወደፊት ለሚነገሩ ነገሮች ምሥክር ነበር።  ክርስቶስ ግን ልጅ እንደመሆኑ መጠን በአምላክ ቤት ላይ ታማኝ ነበር። እኛም የመናገር ነፃነታችንንና በተስፋው ላይ ያለንን ትምክህት እስከ መጨረሻው አጥብቀን ከያዝን የአምላክ ቤት ነን።  በዚህም ምክንያት መንፈስ ቅዱስ እንዲህ ይላል:- “ዛሬ የእሱን ድምፅ የምትሰሙ ከሆነ  ልባችሁን አታደንድኑ። በምድረ በዳ በፈተና ቀን እጅግ ባስቆጡኝ ጊዜ እንዳደረጉት እናንተም አታድርጉ፤  አባቶቻችሁ በዚያ እኔን በመፈተን ተገዳደሩኝ፤ ይሁንና ያደረግኩትን ሁሉ ለአርባ ዓመት አይተዋል። 10  በዚህም ምክንያት በዚህ ትውልድ በጣም ተንገሸገሽኩ፤ እንዲህም አልኩ:- ‘ልባቸው ሁልጊዜ ይሸፍታል፤ መንገዴንም ሊያውቁ አልቻሉም።’ 11  ስለዚህ ‘ወደ እረፍቴ ፈጽሞ አይገቡም’ ብዬ በቁጣዬ ማልኩ።” 12  ወንድሞች፣ ሕያው ከሆነው አምላክ በመራቅ እምነት የለሽ የሆነ ክፉ ልብ ከእናንተ መካከል በማናችሁም ውስጥ እንዳያቆጠቁጥ ተጠንቀቁ፤ 13  ከዚህ ይልቅ ከእናንተ መካከል አንዳችሁም በኃጢአት የማታለል ኃይል እንዳትደነድኑ “ዛሬ” ተብሎ ሊጠራ የሚችል ጊዜ እስካለ ድረስ በየዕለቱ እርስ በርሳችሁ መመካከራችሁን ቀጥሉ። 14  ምክንያቱም የክርስቶስ ተካፋዮች የምንሆነው በመጀመሪያ የነበረንን ትምክህት እስከ መጨረሻው አጽንተን ከያዝን ብቻ ነው፤ 15  ይህም “ዛሬ የእሱን ድምፅ የምትሰሙ ከሆነ እጅግ ባስቆጡኝ ጊዜ እንዳደረጉት ልባችሁን አታደንድኑ” እንደተባለው ነው። 16  ቢሰሙትም እንኳ እጅግ ያስቆጡት እነማን ነበሩ? ይህን ያደረጉት ሙሴ እየመራቸው ከግብፅ የወጡት ሁሉ አይደሉም? 17  ከዚህም ሌላ ለአርባ ዓመት አምላክ እንዲመረር ያደረጉት እነማን ናቸው? እነዚያ ኃጢአት የሠሩትና ሬሳቸው በምድረ በዳ ወድቆ የቀረው አይደሉም? 18  ደግሞስ እነዚያን ያልታዘዙትን አስመልክቶ ካልሆነ በስተቀር ወደ እረፍቴ አይገቡም ብሎ የማለው ስለ እነማን ነው? 19  ስለዚህ ሊገቡ ያልቻሉት እምነት በማጣታቸው የተነሳ እንደሆነ እንረዳለን።

የግርጌ ማስታወሻዎች