በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

ዕብራውያን 11:1-40

11  እምነት ተስፋ የተደረጉ ነገሮችን በእርግጠኝነት መጠበቅ ማለት ሲሆን እውነተኛዎቹ ነገሮች ባይታዩም እንኳ መኖራቸውን የሚያሳይ ተጨባጭ ማስረጃ ነው።  በጥንት ዘመን የኖሩት ሰዎች የተመሠከረላቸው በዚህ አማካኝነት ነው።  ሥርዓቶቹ* የተቋቋሙት በአምላክ ቃል መሆኑን የምንረዳው በእምነት ነው፤ በመሆኑም የሚታየው ነገር የተገኘው ከማይታዩ ነገሮች ነው።  አቤል፣ ቃየን ካቀረበው መሥዋዕት የበለጠ ዋጋ ያለው መሥዋዕት ለአምላክ በእምነት አቀረበ፤ አምላክ ስለ ስጦታው ምሥክርነት ስለሰጠ በዚህ እምነቱ የተነሳ ጻድቅ እንደሆነ ተመሥክሮለታል፤ ቢሞትም እንኳ በእምነቱ አማካኝነት አሁንም ይናገራል።  ሄኖክ ሞትን እንዳያይ በእምነት ወደ ሌላ ቦታ ተወሰደ፤ አምላክ ወደ ሌላ ቦታ ስለወሰደውም የትም ቦታ ሊገኝ አልቻለም፤ ምክንያቱም ከመወሰዱ በፊት አምላክን በሚገባ ደስ እንዳሰኘ ተመሥክሮለት ነበር።  በተጨማሪም ያለ እምነት አምላክን በሚገባ ደስ ማሰኘት አይቻልም፤ ምክንያቱም ወደ አምላክ የሚቀርብ ሰው እሱ መኖሩንና ከልብ ለሚፈልጉትም ወሮታ ከፋይ መሆኑን ማመን ይኖርበታል።  ኖኅ ገና ስላልታዩት ነገሮች መለኮታዊ ማስጠንቀቂያ ከተሰጠው በኋላ አምላካዊ ፍርሃት ያሳየውና ቤተሰቡን ለማዳን መርከብ የሠራው በእምነት ነበር፤ በዚህ እምነት አማካኝነትም ዓለምን ኮነነ፣ እንዲሁም በእምነት የሚገኘውን ጽድቅ ወራሽ ሆነ።  አብርሃም በተጠራ ጊዜ ወደፊት ርስት አድርጎ እንዲወስደው ወደተወሰነለት ስፍራ ለመሄድ በመነሳት በእምነት ታዘዘ፤ ወዴት እንደሚሄድ ባያውቅም ይኖርበት የነበረውን ስፍራ ለቆ ወጣ።  በባዕድ አገር እንዳለ እንደ መጻተኛ በተስፋይቱ ምድር በእምነት ተቀመጠ፤ ከእሱ ጋር የዚሁ ተስፋ ቃል ወራሾች ከሆኑት ከይስሐቅና ከያዕቆብ ጋርም በድንኳን ኖረ። 10  ምክንያቱም አምላክ የገነባትንና የሠራትን እውነተኛ መሠረት ያላትን ከተማ ይጠባበቅ ነበር። 11  ሣራም የተስፋን ቃል የሰጠው እሱ ታማኝ እንደሆነ አድርጋ ስላሰበች የዕድሜ ገደቧ ካለፈ በኋላም እንኳ ዘር ለመፀነስ በእምነት ኃይል አገኘች፤ 12  በመሆኑም እንደሞተ ያክል ከሚቆጠረው ከአንድ ሰው እንደ ሰማይ ከዋክብት የበዙና በባሕር ዳር እንዳለ አሸዋ የማይቆጠሩ ልጆች ተወለዱ። 13  እነዚህ ሁሉ የተስፋውን ቃል ፍጻሜ ባያገኙም እምነታቸውን እንደጠበቁ ሞቱ፤ ሆኖም ከሩቅ አይተው በደስታ ተቀበሉት፤ በምድሩም ላይ እንግዶችና ጊዜያዊ ነዋሪዎች መሆናቸውን በይፋ ተናገሩ። 14  እንዲህ ብለው የሚናገሩት ሰዎች የራሳቸው የሆነ ቦታ ለማግኘት ከልብ እንደሚሹ ያሳያሉ። 15  ይሁንና ትተውት የወጡትን ቦታ ዘወትር ያስታውሱ የነበረ ቢሆን ኖሮ መመለስ የሚችሉበት አጋጣሚ በኖራቸው ነበር። 16  አሁን ግን የተሻለውን ይኸውም ከሰማይ የሆነውን ስፍራ ለማግኘት ይጣጣራሉ። ስለዚህ አምላክ ከተማን ስላዘጋጀላቸው አምላካችን ብለው ቢጠሩት አያፍርባቸውም። 17  አብርሃም በተፈተነበት ጊዜ ይስሐቅን መሥዋዕት አድርጎ እስከ ማቅረብ ድረስ እምነት አሳይቷል፤ የተስፋን ቃል በደስታ የተቀበለው ይህ ሰው አንድያ ልጁን መሥዋዕት አድርጎ ለማቅረብ ሞክሯል፤ 18  ይህን ያደረገው “‘ዘርህ’ በይስሐቅ በኩል ይጠራል” ተብሎ ተነግሮት እያለ ነው። 19  ይሁንና አምላክ ከሞት እንኳ ሳይቀር ሊያስነሳው እንደሚችል ተገንዝቦ ነበር፤ እንደ ምሳሌ ሆኖ በሚያገለግል ሁኔታም ልጁን ከሞት አፋፍ መልሶ አገኘው። 20  ይስሐቅም ወደፊት ከሚሆኑት ነገሮች ጋር በተያያዘ ያዕቆብንና ኤሳውን በእምነት ባረካቸው። 21  ያዕቆብ መሞቻው በተቃረበ ጊዜ የዮሴፍን ልጆች እያንዳንዳቸውን የባረካቸውና የበትሩን ጫፍ ተመርኩዞ ዘንበል በማለት አምልኮ ያቀረበው በእምነት ነው። 22  ዮሴፍ ሊሞት በተቃረበ ጊዜ ስለ እስራኤል ልጆች ከግብፅ መውጣት* በእምነት ተናገረ፤ ስለ አፅሙም ትእዛዝ ሰጠ። 23  ሙሴ ከተወለደ በኋላ ወላጆቹ መልከ መልካም ሕፃን መሆኑን ስላዩ የንጉሡን ትእዛዝ ሳይፈሩ ለሦስት ወር የሸሸጉት በእምነት ነው። 24  ሙሴ ካደገ በኋላ የፈርዖን ሴት ልጅ፣ ልጅ ተብሎ ለመጠራት በእምነት እምቢ አለ፤ 25  በኃጢአት ከሚገኝ ጊዜያዊ ደስታ ይልቅ ከአምላክ ሕዝብ ጋር መንገላታትን መረጠ፤ 26  ምክንያቱም የሚከፈለውን ወሮታ በትኩረት በመመልከቱ ቅቡዕ* ሆኖ የሚደርስበት ነቀፋ በግብፅ ከሚገኝ ውድ ሀብት የላቀ እንደሆነ አስቧል። 27  በእምነት ግብፅን ለቆ ወጣ፤ ሆኖም ይህን ያደረገው የንጉሡን ቁጣ ፈርቶ አይደለም፤ ምክንያቱም የማይታየውን እንደሚያየው አድርጎ በጽናት ቀጥሏል። 28  አጥፊው የበኩር ልጆቻቸውን እንዳይገድል ሙሴ ፋሲካን ያከበረውና መቃኖቹ ላይ ደም የረጨው በእምነት ነው። 29  እስራኤላውያን በደረቅ ምድር እንደሚሄዱ ሆነው ቀይ ባሕርን በእምነት ተሻገሩ፤ ይሁንና ግብፃውያን እንዲህ ለማድረግ በደፈሩ ጊዜ ሰመጡ። 30  እስራኤላውያን የኢያሪኮን ግንብ ሰባት ቀን ከዞሩት በኋላ በእምነት ወደቀ። 31  ጋለሞታይቱ ረዓብ ታዛዥ ሳይሆኑ ከቀሩት ሰዎች ጋር ከመጥፋት የዳነችው በእምነት ነው፤ ምክንያቱም ሰላዮቹን ሰላማዊ በሆነ መንገድ ተቀብላለች። 32  እንግዲህ ከዚህ በላይ ምን እላለሁ? ምክንያቱም ስለ ጌዴዎን፣ ስለ ባርቅ፣ ስለ ሳምሶን፣ ስለ ዮፍታሔ፣ ስለ ዳዊት እንዲሁም ስለ ሳሙኤልና ስለ ሌሎቹ ነቢያት እንዳልተርክ ጊዜ ያጥረኛል፤ 33  እነዚህ ሰዎች በእምነት መንግሥታትን በውጊያ ድል ነስተዋል፣ ጽድቅ እንዲፈጸም የሚያደርግ ተግባር ፈጽመዋል፣ የተስፋ ቃል አግኝተዋል፣ የአንበሶችን አፍ ዘግተዋል፣ 34  የእሳትን ኃይል ተቋቁመዋል፣ ከሰይፍ ስለት አምልጠዋል፣ ደካማ የነበሩት ብርቱዎች እንዲሆኑ ተደርገዋል፣ በጦርነት ኃያላን ሆነዋል፣ የባዕድ አገር ሠራዊትን አባረዋል። 35  ሴቶች ሙታናቸውን በትንሣኤ ተቀበሉ፤ ሌሎች ወንዶች ግን የተሻለ ትንሣኤ ለማግኘት ሲሉ ሥቃይ ደርሶባቸዋል፤ ምክንያቱም ቤዛ ተከፍሎላቸው ነፃ መሆን አልፈለጉም። 36  አዎ፣ ሌሎች ደግሞ መዘባበቻ በመሆንና በመገረፍ ፈተና ደርሶባቸዋል፤ በዚህ ብቻ ሳያበቃ ለእስራት ተዳርገዋል እንዲሁም ወህኒ ቤት ተጥለዋል። 37  በድንጋይ ተወግረዋል፣ ተፈትነዋል፣ በመጋዝ ተሰንጥቀዋል፣ በሰይፍ ተቀልተው ሞተዋል፤ እየተቸገሩ፣ መከራ እየተቀበሉና እየተንገላቱ የበግና የፍየል ሌጦ ለብሰው ተንከራተዋል፤ 38  ዓለም እንዲህ ዓይነት ሰዎች የሚገቡት ሆኖ አልተገኘም። በየበረሃው፣ በየተራራው፣ በየዋሻውና በምድር ውስጥ ባሉ ጉድጓዶች ተቅበዝብዘዋል። 39  ይሁንና እነዚህ ሁሉ በእምነታቸው ምክንያት የተመሠከረላቸው ቢሆኑም እንኳ የተስፋውን ቃል ፍጻሜ አላገኙም፤ 40  አምላክ ያለ እኛ ወደ ፍጽምና እንዲደርሱ ዓላማው ስላልነበረ ለእኛ የተሻለ ነገር ለመስጠት አስቀድሞ አስቧል።

የግርጌ ማስታወሻዎች

ዕብ 11:3 * ወይም፣ “በአጽናፈ ዓለም ውስጥ ያሉት ነገሮች።”
ዕብ 11:22 * እዚህ ላይ የገባው ግሪክኛ ቃል ለዘፀአት መጽሐፍ ከተሰጠው ግሪክኛ ስያሜ ጋር ተዛማጅነት አለው።
ዕብ 11:26 * በግሪክኛ፣ “ክርስቶስ።”