በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ዕብራውያን 10:1-39

10  ሕጉ ወደፊት ለሚመጡት መልካም ነገሮች ጥላ ነው እንጂ የእነዚህ ነገሮች እውነተኛው አካል አይደለም፤ ስለዚህ ካህናት ከዓመት ዓመት ያለማቋረጥ በሚያቀርቧቸው በእነዚያው መሥዋዕቶች ወደ አምላክ የሚቀርቡትን ሰዎች ፍጹም ሊያደርጓቸው አይችሉም።  ቢችሉማ ኖሮ መሥዋዕት ማቅረቡን ይተዉት አልነበረም? ምክንያቱም ለአንዴና ለመጨረሻ ጊዜ የነጹት ቅዱስ አገልግሎት የሚያቀርቡ ሰዎች ከዚህ በኋላ በሕሊናቸው የኃጢአተኝነት ስሜት አይሰማቸውም ነበር።  ከዚህ ይልቅ እነዚህ መሥዋዕቶች ከዓመት ዓመት ኃጢአት እንዲታወስ የሚያደርጉ ናቸው፤  ምክንያቱም የኮርማዎችና የፍየሎች ደም ኃጢአትን ማስወገድ አይችልም።  ስለዚህ ወደ ዓለም በመጣ ጊዜ እንዲህ አለ:- “‘መሥዋዕትንና መባን አልፈለግክም፤ ከዚህ ይልቅ አካል አዘጋጀህልኝ።  ሙሉ በሙሉ በሚቃጠል መባና ለኃጢአት በሚቀርብ መባ ደስ አልተሰኘህም።’  በዚያን ጊዜ ‘እነሆ፣ አምላክ ሆይ፣ (ስለ እኔ በመጽሐፍ ጥቅልል እንደተጻፈ) ፈቃድህን ለማድረግ መጥቻለሁ’ አልኩ።”  በመጀመሪያ “መሥዋዕትን፣ መባን፣ ሙሉ በሙሉ የሚቃጠል መባንና ለኃጢአት የሚቀርብ መባን አልፈለግክም፣ እንዲሁም ደስ አልተሰኘህበትም” ካለ በኋላ (እነዚህ መሥዋዕቶች ሕጉ በሚያዘው መሠረት የሚቀርቡ ናቸው)  በመቀጠል “እነሆ፣ ፈቃድህን ለማድረግ መጥቻለሁ” አለ። ሁለተኛውን ለማቋቋም የመጀመሪያውን ያስወግዳል። 10  እዚህ ላይ በተገለጸው ‘ፈቃድ’ መሠረት ለአንዴና ለመጨረሻ ጊዜ መሥዋዕት ሆኖ በቀረበው የኢየሱስ ክርስቶስ አካል አማካኝነት ተቀድሰናል። 11  በተጨማሪም የሚቀርቡት መሥዋዕቶች መቼም ቢሆን ኃጢአትን ሙሉ በሙሉ ማስወገድ ስለማይችሉ እያንዳንዱ ካህን ሕዝባዊ አገልግሎት ለማከናወንና እነዚያኑ መሥዋዕቶች በየጊዜው ለማቅረብ ዕለት ዕለት በቦታው ይገኛል። 12  ይህ ሰው ግን ስለ ኃጢአት ለሁልጊዜ የሚሆን አንድ መሥዋዕት አቅርቦ በአምላክ ቀኝ ተቀምጧል፤ 13  ከዚያን ጊዜ አንስቶ ጠላቶቹ ለእግሩ እንደ መርገጫ እስኪደረጉ ድረስ በመጠባበቅ ላይ ይገኛል። 14  ምክንያቱም እነዚያን እየተቀደሱ ያሉትን ለዘላለም ፍጹማን ያደረጋቸው አንድ መሥዋዕት በማቅረብ ነው። 15  ከዚህም በተጨማሪ መንፈስ ቅዱስም ስለ እኛ ይመሠክራል፤ ምክንያቱም በመጀመሪያ እንዲህ ይላል:- 16  “‘ከእነዚያ ቀናት በኋላ ከእነሱ ጋር የምገባው ቃል ኪዳን ይህ ነው’ ይላል ይሖዋ። ‘ሕግጋቴን በልባቸው ውስጥ አኖራለሁ፤ በአእምሯቸውም ላይ እጽፋቸዋለሁ’”፤ 17  በመቀጠል እንዲህ ይላል:- “ኃጢአታቸውንና የዓመፅ ድርጊታቸውንም ከእንግዲህ ወዲህ ፈጽሞ አላስታውስባቸውም።” 18  እንግዲህ እነዚህ ይቅር ከተባሉ፣ ከዚህ በኋላ ስለ ኃጢአት የሚቀርብ መሥዋዕት አይኖርም። 19  ስለዚህ ወንድሞች፣ በኢየሱስ ደም አማካኝነት ወደ ቅዱሱ ስፍራ መግባት የሚያስችል ድፍረት አግኝተናል፤ 20  የምንገባውም በመጋረጃው ማለትም በሥጋው በኩል በከፈተልን አዲስና ሕያው መንገድ ነው፤ 21  በተጨማሪም በአምላክ ቤት ላይ የተሾመ ታላቅ ሊቀ ካህናት አለን፤ 22  በመሆኑም ከክፉ ሕሊና ለመንጻት ልባችንን ተረጭተንና ሰውነታችንን በንጹሕ ውኃ ታጥበን ከእምነት በሚመነጭ ታላቅ የመተማመን መንፈስ በእውነተኛ ልብ ወደ አምላክ እንቅረብ። 23  የተስፋን ቃል የሰጠው የታመነ ስለሆነ ተስፋችንን በይፋ ለማወጅ የሚያስችለንን አጋጣሚ ያላንዳች ማወላወል አጥብቀን እንያዝ። 24  እንዲሁም እርስ በርስ ለፍቅርና ለመልካም ሥራዎች መነቃቃት እንድንችል አንዳችን ለሌላው ትኩረት እንስጥ፤ 25  አንዳንዶች ልማድ እንዳደረጉት አንድ ላይ መሰብሰባችንን ቸል አንበል፤ ከዚህ ይልቅ ቀኑ እየቀረበ መምጣቱን ስናይ ከበፊቱ ይበልጥ እርስ በርስ እንበረታታ። 26  ምክንያቱም የእውነትን ትክክለኛ እውቀት ካገኘን በኋላ ሆን ብለን ኃጢአት መሥራትን ልማድ ብናደርግ ለኃጢአታችን የሚቀርብ ሌላ ምንም መሥዋዕት አይኖርም፤ 27  ከዚህ ይልቅ በፍርሃት የሚጠበቅ ፍርድና አምላክን የሚቃወሙትን የሚበላ እሳታማ ቅናት ይኖራል። 28  የሙሴን ሕግ የጣሰ ማንኛውም ሰው ሁለት ወይም ሦስት ሰዎች ከመሠከሩበት ያለ ርኅራኄ ይገደል ነበር። 29  ታዲያ የአምላክን ልጅ የረገጠ፣ የተቀደሰበትን የቃል ኪዳኑን ደም እንደ ተራ ነገር የቆጠረና የጸጋን መንፈስ በንቀት ያጥላላ ሰው ምን ያህል የከፋ ቅጣት የሚገባው ይመስላችኋል? 30  ምክንያቱም “በቀል የእኔ ነው፤ እኔ ብድራትን እመልሳለሁ” ያለው ማን እንደሆነ እናውቃለን፤ ደግሞም “ይሖዋ በሕዝቡ ላይ ይፈርዳል።” 31  በሕያው አምላክ እጅ መውደቅ የሚያስፈራ ነገር ነው። 32  ይሁን እንጂ ብርሃን ከበራላችሁ በኋላ በመከራ ውስጥ በብርቱ ተጋድሎ የጸናችሁበትን የቀድሞውን ጊዜ ዘወትር አስታውሱ፤ 33  በትርዒት ማሳያ ስፍራ እንዳለ ሰው ለነቀፋና ለመከራ የተጋለጣችሁባቸው ጊዜያት ነበሩ፤ እንዲሁም እንዲህ ዓይነት ሁኔታ የደረሰባቸውን ሰዎች መከራ የተጋራችሁባቸው ጊዜያት ነበሩ። 34  እናንተ ራሳችሁ የተሻለና ዘላቂ የሆነ ንብረት እንዳላችሁ ስለምታውቁ በእስር ላይ ላሉት ራራችሁላቸው፤ እንዲሁም ንብረታችሁ ሲዘረፍ ሁኔታውን በደስታ ተቀበላችሁ። 35  እንግዲህ ትልቅ ወሮታ የሚያስገኘውን የመናገር ነፃነታችሁን አሽቀንጥራችሁ አትጣሉት። 36  የአምላክን ፈቃድ ከፈጸማችሁ በኋላ የተስፋውን ቃል ፍጻሜ ማግኘት እንድትችሉ መጽናት ያስፈልጋችኋል። 37  ምክንያቱም “ለጥቂት ጊዜ ነው” እንጂ “የሚመጣው እሱ ይመጣል፤ ደግሞም አይዘገይም።” 38  “ሆኖም ጻድቅ አገልጋዬ በእምነት የተነሳ ይኖራል”፤ ደግሞም “ወደኋላ ቢያፈገፍግ ነፍሴ በእሱ ደስ አይሰኝም።” 39  እንግዲህ እኛ ነፍስን ሕያው አድርጎ ለማኖር የሚያስችል እምነት ያላቸው ዓይነት ሰዎች ነን እንጂ ወደ ጥፋት የሚያፈገፍጉ ዓይነት ሰዎች አይደለንም።

የግርጌ ማስታወሻዎች