በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ኤፌሶን 5:1-33

5  ስለዚህ የተወደዳችሁ ልጆች በመሆን አምላክን የምትኮርጁ ሁኑ፤  ክርስቶስ እንደወደዳችሁና ጥሩ መዓዛ እንዳለው ሽታ ራሱን ስለ እናንተ መባና መሥዋዕት አድርጎ ለአምላክ እንደሰጠ ሁሉ እናንተም በፍቅር መመላለሳችሁን ቀጥሉ።  ለቅዱሳን የማይገባ ስለሆነ ዝሙትና ማንኛውም ዓይነት ርኩሰት ወይም ስግብግብነት በመካከላችሁ ከቶ አይነሳ፤  አሳፋሪ ምግባር፣ የማይረባ ንግግርም ሆነ ጸያፍ ቀልድ የማይገቡ ነገሮች ናቸው፤ ከዚህ ይልቅ አምላክን የምታመሰግኑ ሁኑ።  እንደምታውቁትና በሚገባ እንደምትገነዘቡት ሴሰኛ ወይም ርኩስ ወይም ስግብግብ ማለትም ጣዖት አምላኪ የሆነ ማንኛውም ሰው በክርስቶስና በአምላክ መንግሥት ምንም ውርሻ የለውም።  በእነዚህ ነገሮች ምክንያት የአምላክ ቁጣ በማይታዘዙት ልጆች ላይ ስለሚመጣ ማንም በከንቱ ንግግር አያታላችሁ።  ስለዚህ ከእነዚህ ሰዎች ጋር አትተባበሩ፤  ምክንያቱም እናንተ በአንድ ወቅት ጨለማ ነበራችሁ፤ አሁን ግን የጌታ በመሆናችሁ ብርሃን ናችሁ። የብርሃን ልጆች ሆናችሁ መመላለሳችሁን ቀጥሉ፤  የብርሃን ፍሬ ሁሉንም ዓይነት ጥሩነት፣ ጽድቅና እውነት የያዘ ነውና። 10  በጌታ ዘንድ ተቀባይነት ያለው ነገር ምን እንደሆነ ምንጊዜም መርምራችሁ አረጋግጡ፤ 11  ፍሬ ቢስ በሆኑ የጨለማ ሥራዎች ከእነሱ ጋር መተባበራችሁን አቁሙ፤ ይልቁንም አውግዟቸው፤ 12  ምክንያቱም በድብቅ የሚፈጽሟቸው ነገሮች ለመናገር እንኳ የሚያሳፍሩ ናቸው። 13  ደግሞም ተጋልጠው ይፋ የሚወጡት ነገሮች ሁሉ እንዲገለጡ የሚደረገው በብርሃን ነው፤ ምክንያቱም እንዲገለጥ የሚደረገው ነገር ሁሉ ብርሃን ነው። 14  በመሆኑም እንዲህ ይላል:- “አንተ እንቅልፋም፣ ንቃ፤ ከሞትም ተነሳ፤ ክርስቶስ በአንተ ላይ ያበራል።” 15  ስለዚህ የምትመላለሱት ጥበብ እንደጎደላቸው ሰዎች ሳይሆን እንደ ጥበበኛ ሰዎች መሆኑን ምንጊዜም በጥንቃቄ አስተውሉ፤ 16  ቀኖቹ ክፉዎች ስለሆኑ ለራሳችሁ አመቺ የሆነውን ጊዜ ግዙ። 17  ከዚህ የተነሳ የይሖዋ ፈቃድ ምን እንደሆነ አስተውሉ እንጂ ማስተዋል የጎደላችሁ አትሁኑ። 18  በተጨማሪም መረን ለለቀቀ ሕይወት ስለሚዳርጋችሁ በወይን ጠጅ አትስከሩ፤ ከዚህ ይልቅ በመንፈስ መሞላታችሁን ቀጥሉ፤ 19  በመዝሙርና በውዳሴ እንዲሁም በመንፈሳዊ ዝማሬ እርስ በርሳችሁ ተነጋገሩ፤ በልባችሁም ለይሖዋ የምስጋና መዝሙር አዚሙ፤ 20  በጌታችን በኢየሱስ ክርስቶስ ስም ስለ ሁሉም ነገር አምላካችንንና አባታችንን ሁልጊዜ አመስግኑ። 21  ክርስቶስን በመፍራት አንዳችሁ ለሌላው ተገዙ። 22  ሚስቶች ለጌታ እንደሚገዙ ሁሉ ለባሎቻቸው ይገዙ፤ 23  ምክንያቱም ክርስቶስ አካሉ ለሆነውና አዳኙ ለሆነለት ጉባኤ ራስ እንደሆነ ሁሉ ባልም የሚስቱ ራስ ነው። 24  ደግሞም ጉባኤው ለክርስቶስ እንደሚገዛ ሁሉ ሚስቶችም በሁሉም ነገር ለባሎቻቸው ይገዙ። 25  ባሎች ሆይ፣ ክርስቶስ ጉባኤውን እንደወደደና ለእሱ ራሱን አሳልፎ እንደሰጠ ሁሉ እናንተም ሚስቶቻችሁን መውደዳችሁን ቀጥሉ፤ 26  እሱ ይህን ያደረገው ጉባኤውን በቃሉ አማካኝነት በውኃ አጥቦ በማንጻት ይቀድሰው ዘንድ ነው፤ 27  ይህም ጉባኤውን ጉድፍ ወይም የቆዳ መጨማደድ ወይም እንዲህ ያሉ ነገሮች ምንም የማይገኙበት ቅዱስና እንከን የለሽ አድርጎ ውበቱን እንደጠበቀ ለራሱ ለማቅረብ ነው። 28  በዚህ መንገድ ባሎች ሚስቶቻቸውን እንደ ገዛ አካላቸው አድርገው ሊወዷቸው ይገባል። ሚስቱን የሚወድ ራሱን ይወዳል፤ 29  ምክንያቱም የገዛ ሥጋውን የሚጠላ ማንም ሰው የለም፤ ከዚህ ይልቅ ይመግበዋል እንዲሁም ይሳሳለታል፤ ክርስቶስም ለጉባኤው ያደረገው እንደዚሁ ነው፤ 30  ምክንያቱም እኛ የእሱ አካል ክፍሎች ነን። 31  “ከዚህ የተነሳ ሰው ከአባቱና ከእናቱ ተለይቶ ከሚስቱ ጋር ይጣበቃል፤ ሁለቱም አንድ ሥጋ ይሆናሉ።” 32  ይህ ቅዱስ ሚስጥር ታላቅ ነው። እኔም እየተናገርኩ ያለሁት ክርስቶስንና ጉባኤውን በተመለከተ ነው። 33  ይሁንና ከእናንተ እያንዳንዱ ራሱን እንደሚወድ ሁሉ ሚስቱንም ይውደድ፤ በሌላ በኩል ደግሞ ሚስት ባሏን በጥልቅ ልታከብር ይገባል።

የግርጌ ማስታወሻዎች