በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

ቈላስይስ 2:1-23

2  ለእናንተና በሎዶቅያ ላሉት እንዲሁም በአካል አይተውኝ ለማያውቁ ሁሉ ስል ምን ያህል ብርቱ ትግል እያደረግኩ እንዳለሁ እንድትገነዘቡ እፈልጋለሁ፤  ይህን የማደርገው ልባቸው እንዲጽናና እንዲሁም ታላቅ የሆነውን ብልጽግና ይኸውም ሙሉ በሙሉ እርግጠኛ የሆኑበትን የእውነት ግንዛቤ በማግኘት ብሎም የአምላክ ቅዱስ ሚስጥር ስለሆነው ስለ ክርስቶስ ትክክለኛ እውቀት በመቅሰም ስምም ሆነው በፍቅር እርስ በርስ እንዲተሳሰሩ ነው።  የጥበብና የእውቀት ውድ ሀብት ሁሉ በሚገባ ተሰውሮ የሚገኘው በክርስቶስ ውስጥ ነው።  ይህን የምለው ማንም ሰው አግባብቶ እንዳያታልላችሁ ነው።  በሥጋ ከእናንተ ጋር ባልሆንም በመንፈስ ግን ከእናንተ ጋር ስለሆንኩ ሥርዓት ያለውን አኗኗራችሁንና በክርስቶስ ላይ ያላችሁን ጽኑ እምነት እያየሁና እየተደሰትኩ ነው።  ስለዚህ ጌታ ክርስቶስ ኢየሱስን እንደተቀበላችሁት ሁሉ ከእሱ ጋር በአንድነት መመላለሳችሁን ቀጥሉ፤  በተማራችሁት መሠረት በእሱ ላይ ተተክላችሁና ታንጻችሁ ኑሩ፤ እንዲሁም በእምነት ጸንታችሁ መኖራችሁን ቀጥሉ፤ ለአምላክ ምስጋና ስታቀርቡም እምነታችሁ የተትረፈረፈ ይሁን።  በክርስቶስ ላይ ሳይሆን በዓለም መሠረታዊ ነገሮች እንዲሁም በሰው ወግ ላይ በተመሠረተ ፍልስፍናና ከንቱ ማታለያ ማንም አጥምዶ እንዳይወስዳችሁ ተጠንቀቁ፤  ምክንያቱም የመለኮታዊው ባሕርይ ሙላት ሁሉ በአካላዊ ሁኔታ የሚኖረው በእሱ ውስጥ ነው። 10  በመሆኑም የገዥነትና የሥልጣን ሁሉ ራስ በሆነው በእሱ አማካኝነት ሁሉ ነገር ተሟልቶላችኋል። 11  ከእሱ ጋር ባላችሁ ዝምድናም በእጅ ባልተከናወነ ግርዘት ተገርዛችኋል፤ ይህም ግርዘት ኃጢአተኛውን ሥጋዊ አካል በማስወገድ የሚከናወን የክርስቶስ አገልጋዮች ግርዘት ነው፤ 12  ምክንያቱም በእሱ ጥምቀት ከእሱ ጋር ተቀብራችሁ ነበር፤ ከእሱ ጋር ባላችሁ ዝምድናም አብራችሁ ተነስታችኋል፣ ይህም የሆነው እሱን ከሞት ባስነሳው አምላክ አሠራር ላይ ባላችሁ እምነት አማካኝነት ነው። 13  በተጨማሪም በበደላችሁና በሥጋችሁ አለመገረዝ የተነሳ ሙታን የነበራችሁ ቢሆንም አምላክ ከእሱ ጋር ሕያዋን አድርጓችኋል። በደላችንን ሁሉ በደግነት ይቅር ብሎናል፤ 14  ድንጋጌዎችን የያዘውንና ይቃወመን የነበረውን እንዲሁም በእኛ ላይ ይመሠክር የነበረውን በእጅ የተጻፈ ሰነድም ደመሰሰው፤ በመከራው እንጨት* ላይ ቸንክሮም ከመንገድ አስወገደው። 15  በመከራው እንጨት አማካኝነት መንግሥታትንና ባለሥልጣናትን ገፎ በድል ሰልፍ እየመራ እንደ ምርኮኛ በአደባባይ እንዲታዩ አድርጓቸዋል። 16  ስለዚህ በምትበሉትም ሆነ በምትጠጡት ወይም በዓልን፣ የወር መባቻንና ሰንበትን በማክበር ረገድ ማንም ሰው አይፍረድባችሁ፤ 17  ምክንያቱም እነዚህ ነገሮች ለሚመጡት ነገሮች ጥላ ናቸው፤ እውነተኛው ነገር* ግን የክርስቶስ ነው። 18  በአጉል ትሕትናና በመላእክት አምልኮ የሚደሰት ማንኛውም ሰው ሽልማቱን እንዲያሳጣችሁ አትፍቀዱ። እንዲህ ያሉ ሰዎች ባዩአቸው ነገሮች የሚመጻደቁ ከመሆኑም በላይ ሥጋዊ አስተሳሰባቸው በከንቱ እንዲታበዩ ያደርጋቸዋል፤ 19  እነዚህ ሰዎች ራስ ከሆነው ጋር በጥብቅ የተቆራኙ አይደሉም፤ አካል ሁሉ በመገጣጠሚያዎችና በጅማቶች አማካኝነት የሚያስፈልገውን ነገር የሚያገኘውና እርስ በርስ ስምም ሆኖ የተያያዘው ራስ በሆነው አማካኝነት ሲሆን አምላክ በሚሰጠው እድገት እያደገ ይሄዳል። 20  ለዚህ ዓለም መሠረታዊ ነገሮች ከክርስቶስ ጋር አብራችሁ ከሞታችሁ አሁንም የዓለም ክፍል የሆናችሁ ይመስል እንደዚህ ላሉት ድንጋጌዎች ለምን ራሳችሁን ታስገዛላችሁ? 21  ድንጋጌዎቹም “አትያዝ፣ አትቅመስ፣ አትንካ” የሚሉ ናቸው። 22  እነዚህ ድንጋጌዎች የሰው ትእዛዛትና ትምህርቶች ስለሆኑ ሁሉም ጥቅም ላይ ውለው እንዲጠፉ የተወሰነባቸው ናቸው። 23  እነዚህ ነገሮች በገዛ ፈቃድ በሚደረግ አምልኮ፣ በአጉል ትሕትናና ሰውነትን በመጨቆን የሚገለጹ ናቸው፤ በእርግጥ ጥበብ ያለባቸው ይመስላሉ፤ ነገር ግን የሥጋን ፍላጎት በማሸነፍ ረገድ አንዳች ፋይዳ የላቸውም።

የግርጌ ማስታወሻዎች

ቆላ 2:14 * ከተጨማሪው መረጃ ላይ 6ኛውን ርዕስ ተመልከት።
ቆላ 2:17 * ቃል በቃል፣ “አካሉ።”